Қазақстан Испанияны футболдан әлем чемпионатындағы жеңісімен құттықтады

Испания тарихи жеңіске жетті. Мемлекет басшысы Қасым-Жомарт Тоқаев Король VI Фелипеге құттықтау жеделхатын жолдап, Испания құрамасының футболдан әлем чемпионатындағы жеңісімен құттықтады, деп хабарлайды DKNews.kz.

Президент Испания ұлттық құрамасының әлем чемпионы атағын өз тарихында екінші рет жеңіп алғанын атап өтіп, бұл жетістік миллиондаған жанкүйердің құрметіне ие болғанын айтты.

Испания футболын өзгеге үлгі етті

Қасым-Жомарт Тоқаев өз жеделхатында Испания құрамасының кәсіби деңгейіне, ұйымшыл ойынына және жеңіске деген жігеріне ерекше тоқталды.

«Ұлттық құрамаңыздың жоғары шеберлігі, үйлесімді командалық ойыны және жеңіске деген жігері миллиондаған жанкүйерді тәнті етті. Испанияның жаһандық деңгейде мойындалған футболдан озық тәжірибесі баршаға үлгі. Осы ретте биыл Қазақстанда «Атлетико Мадрид» клубы академиясының ашылғанын ерекше қуанышпен атап өтемін. Бұл бастама халықтарымыз арасындағы достық пен сан қырлы ынтымақтастықты нығайтуға, сондай-ақ жастар арасындағы байланыстарды тереңдетуге зор серпін береріне кәміл сенемін», – деп жазылған жеделхатта.

«Атлетико Мадрид» академиясына ерекше назар аударды

Президент биыл Қазақстанда «Атлетико Мадрид» клубы академиясының ашылуын екі ел арасындағы ынтымақтастықтың маңызды қадамы ретінде бағалады.

Мемлекет басшысының айтуынша, бұл бастама жастар футболын дамытуға ғана емес, Қазақстан мен Испания арасындағы мәдени-гуманитарлық байланыстарды күшейтуге де жаңа мүмкіндік береді.

Испания халқына ізгі тілегін жеткізді

Жеделхат соңында Қасым-Жомарт Тоқаев Король VI Фелипеге мемлекет игілігі жолындағы бастамаларына табыс тілеп, достас Испания халқына бақ-береке мен өркендеу тіледі.