ОСК: Сайлаудағы халықаралық байқаушылар саны 251-ге жетті

Қазақстанда өтетін Құрылтай сайлауы халықаралық қауымдастықтың назарын өзіне аударуда.

Орталық сайлау комиссиясы (ОСК) бүгін тағы 155 халықаралық байқаушыны аккредиттеп, жалпы тіркелген байқаушылар санын 251 адамға жеткізді, деп хабарлайды DKNews.kz.

Бұл – алдағы сайлау науқанына шетелдік ұйымдар мен мемлекеттердің қызығушылығы жоғары екенін көрсететін маңызды көрсеткіш.

ЕҚЫҰ, ТМД және шет мемлекеттерден байқаушылар келеді

ОСК мәліметінше, 2026 жылғы 3 тамыздағы жағдай бойынша Қазақстан Республикасы Сыртқы істер министрлігі 9 шет мемлекеттен және 4 халықаралық ұйымнан 155 халықаралық байқаушының кандидатурасын ұсынған.

Олардың ішінде:

• ЕҚЫҰ Парламенттік Ассамблеясынан – 86 байқаушы;
• ТМД Байқаушылар миссиясынан – 22;
• ТМД Парламентаралық Ассамблеясынан – 23;
• ҰҚШҰ Парламенттік Ассамблеясынан – 6 байқаушы.

Ал жекелеген мемлекеттерден Ресейден – 3, Әзербайжан, Армения, Иордания, Қырғызстан, Молдова, Мьянма және Румыниядан екі-екіден, Украинадан бір халықаралық байқаушы ұсынылған.

ОСК: халықаралық қызығушылық жоғары

Комиссия отырысында сөз сөйлеген ОСК төрағасының орынбасары Мұхтар Ерман халықаралық бақылаушылардың Қазақстандағы сайлау үдерісіне ерекше назар аударып отырғанын атап өтті.

«2026 жылғы 3 тамыздағы жағдай бойынша Қазақстан Республикасы Сыртқы істер министрлігі Орталық сайлау комиссиясына 9 шет мемлекеттен және 4 халықаралық ұйымнан 155 халықаралық байқаушының кандидатурасын аккредиттеуге ұсынды. Олардың ішінде ЕҚЫҰ Парламенттік Ассамблеясынан – 86 байқаушы, ТМД Байқаушылар миссиясынан – 22, ТМД ПАА – 23, ҰҚШҰ ПА – 6 байқаушы бар. Шет мемлекеттерден: Ресей Федерациясынан – 3 байқаушы, Әзербайжан Республикасынан, Армения Республикасынан, Иордания Хашимит Корольдігінен, Қырғыз Республикасынан, Молдова Республикасынан, Мьянма Одағы Республикасынан және Румыниядан – әрқайсысынан 2 байқаушы, Украинадан – 1 кандидатура ұсынылды», – деді Мұхтар Ерман.

29 елдің депутаттары қатысады

Халықаралық миссиялардың құрамына 29 елден келген 74 депутат енген.

Олардың қатарында Австрия, Ұлыбритания, Германия, Франция, Италия, Испания, Түркия, Финляндия, Швеция, Польша, Нидерланд, Норвегия, Чехия, Венгрия, Ресей, Қырғызстан, Тәжікстан және басқа да елдердің парламент өкілдері бар.

Бұл Қазақстандағы сайлау науқанына Еуропа мен ТМД кеңістігіндегі саяси институттардың да қызығушылық танытып отырғанын аңғартады.

Сайлау комиссияларының басшылары да келеді

Халықаралық бақылаушылармен қатар Қазақстанға шетелдік орталық сайлау органдарының 12 делегациясы келеді.

Олардың жетеуін Әзербайжан, Армения, Грузия, Қырғызстан, Молдова, Пәкістан және Ресейдің орталық сайлау комиссияларының төрағалары бастап келеді.

Сонымен бірге Тәжікстан, Түркия және Өзбекстанның орталық сайлау органдарының басшылары да сайлауды бақылауға қатысатынын растаған.

Байқаушылар саны әлі де артуы мүмкін

Орталық сайлау комиссиясының мәліметінше, қазіргі таңда Қазақстанда өтетін Құрылтай сайлауына 251 халықаралық байқаушы аккредиттелген.

ОСК аккредиттеу процесі жалғасып жатқанын атап өтті. Сондықтан шет мемлекеттер мен халықаралық ұйымдардан жаңа ұсыныстар түскен сайын халықаралық байқаушылардың тізімі толықтырылып отырады.