Бұл жерде болашақ майдангерлер даярланған.
Бішкектегі Кемел Тоқаев атындағы №33 мектеп-гимназиясының тарихы қарапайым білім ордасының шеңберінен әлдеқайда кең: Ұлы Отан соғысы жылдары оның ғимаратында Фрунзе жаяу әскер училищесі орналасып, Кемел Тоқаев пен Рақымжан Қошқарбаев осында әскери дайындықтан өткен, деп хабарлайды DKNews.kz.
Мектептің Қазақстанмен тарихи байланысы Қазақстанның Қырғызстандағы елшілігінің материалдарында және қырғыз тарапының ресми деректерінде көрсетілген. Қазір бұл сабақтастық екі ел арасындағы білім және гуманитарлық ынтымақтастық арқылы жалғасып отыр.
Соғыс жылдары мұнда жаяу әскер училищесі орналасқан
№33 мектептің тарихы 1940-жылдардың басынан басталады. Оқу орны 1940 жылы құрылған, ал оның ғимараты Бішкектің жергілікті маңызы бар тарих және мәдениет ескерткіштерінің тізіміне енгізілген.
Қалалық тізімде бұл нысан Ұлы Отан соғысы кезінде Фрунзе жаяу әскер училищесі орналасқан №33 мектеп ғимараты ретінде көрсетіледі.
Дәл осы жерде кейін қазақтың белгілі жазушысы атанған майдангер Кемел Тоқаев пен Рақымжан Қошқарбаев әскери дайындықтан өткен.
Соғыс аяқталғаннан кейін ғимарат қайтадан білім беру мақсатында пайдаланыла бастады. 1947 жылғы 1 қыркүйекте мектеп жұмысын қайта жалғастырды, ал 2012 жылы оған мектеп-гимназия мәртебесі берілді.
Кемел Тоқаевтың есімі мектепке 2025 жылы берілді
Мектеп тарихындағы жаңа кезең 2025 жылғы мамырда басталды. Қырғызстан Президенті Садыр Жапаровтың бастамасымен гимназияға ресми түрде Кемел Тоқаевтың есімі берілді.
Бұл шешім жазушының соғыс жылдарындағы өмірбаянымен тікелей байланысты. Майданға аттанар алдында Кемел Тоқаев қазіргі №33 мектеп орналасқан ғимараттағы әскери училищеде дайындықтан өткен.
Кемел Тоқаев 1923 жылы дүниеге келген. Ұлы Отан соғысына қатысып, кейін журналистика мен әдебиетке бет бұрды. Ол қазақ әдебиетіндегі детектив жанрының негізін қалаушылардың бірі ретінде танылды.
2025 жылғы тамызда гимназияға Қазақстан Президенті Қасым-Жомарт Тоқаев пен Қырғызстан Президенті Садыр Жапаров бірге барды.
Мектепте Қошқарбаев пен Тоқаевқа арналған бұрыш ашылған
Қазақстанмен байланыс мектептің атауымен ғана шектелмейді.
2024 жылғы мамырда гимназияда Рақымжан Қошқарбаев пен Кемел Тоқаевқа арналған патриоттық бұрыш ашылды. Онда олардың өмірбаяны, майдандағы жолы және оқу орнының тарихы туралы материалдар қойылды.
Сол кезде Қазақстаннан жеткізілген архив құжаттары мен кітаптардың көрмесі де ұйымдастырылған.
2025 жылдың көктемінде мектеп аумағында Жеңістің 80 жылдығына орай «Даңқ аллеясы» салынды. Соғысқа қатысушылардың құрметіне ағаштар отырғызылып, шараға Бішкек билігінің өкілдері, ардагерлер, қазақстандық дипломаттар, мұғалімдер мен оқушылар қатысты.
Қазақстан гимназияға автобус сыйлады
Соңғы жылдары екі ел арасындағы тарихи байланыс нақты білім беру жобаларымен де толықты.
Қасым-Жомарт Тоқаев мектеп оқушыларын тасымалдауға арналған автобус берген. Көлік гимназияға 2025 жылғы наурызда табысталды.
Автобустың кілтін мектеп директорына Қазақстанның Қырғызстандағы елшісі Рәпіл Жошыбаев тапсырған.
Бұл қолдау тарихи байланысты күнделікті мектеп өмірімен ұштастырып отыр. Бұған қоса, гимназия жаңа компьютерлермен, интерактивті тақталармен және басқа да жабдықтармен қамтамасыз етілген.
Мектептің үздік түлектері үшін Алматыдағы Satbayev University-де тегін білім алуға үш орын қарастырылған.
Бір ғимаратта екі елдің ортақ тарихы тоғысқан
Бүгінде Кемел Тоқаев атындағы №33 мектеп-гимназия Бішкектің Свердлов ауданында жұмыс істейді.
Оның басты ерекшелігі тек білім беру көрсеткіштерінде емес. Бұл ғимаратта бірнеше тарихи кезең тоғысқан: болашақ майдангерлердің әскери дайындығы, белгілі қазақстандықтардың тағдыры, соғыстан кейінгі Бішкек тарихы және Қазақстан мен Қырғызстанның қазіргі білім саласындағы байланыстары.
Бұған дейін біз Кемел Тоқаевтың әскери жолы қай жерден басталғаны және Қазақстан мен Қырғызстан президенттерінің осы гимназияға сапары туралы да жазған едік. Сол кезде №33 мектеп тағы да болашақ жазушыны майданға дайындаған тарихи орын ретінде назарға ілікті.
