Қазақстандық GovTech Камбоджаның назарын аударды.
Ел делегациясына мемлекеттік қызметтерді мобильді форматқа көшіру, деректерді шешім қабылдауда пайдалану және жасанды интеллектіні мемлекеттік секторға енгізу тәжірибесі таныстырылды, деп хабарлайды DKNews.kz.
Digitalization of Public Service Delivery in Kazakhstan халықаралық білім беру бағдарламасы Астанада 1-4 қыркүйек аралығында өтті. Бағдарламаның негізгі алаңдарының бірі «Ұлттық ақпараттық технологиялар» АҚ болды.
eGov-тен мемлекеттік деректерді талдауға дейін
Төрт күн ішінде қатысушылар Қазақстанның цифрлық мемлекет моделін зерттеді. Бағдарлама электрондық үкіметтің базалық инфрақұрылымынан бастап, жасанды интеллект негізіндегі заманауи шешімдерге дейінгі бағыттарды қамтыды.
«Ұлттық ақпараттық технологиялар» АҚ мамандары eGov.kz порталының цифрлық инфрақұрылымын, eGov Mobile мобильді үкіметін және Smart Data Ukimet платформасын таныстырды.
Smart Data Ukimet мемлекеттік органдардың ақпараттық жүйелерінде жинақталған мәліметтерді біріктіріп, сақтауға және кешенді талдауға мүмкіндік береді. Платформа туралы ресми ақпарат eGov порталында жарияланған.
Осылайша, Камбоджа делегациясына жеке цифрлық сервистер ғана емес, азаматтардың қызмет алуынан бастап мемлекеттік деректерді талдауға дейінгі тұтас жүйе көрсетілді.
Камбоджаға жасанды интеллектінің мемлекеттік қызметтерде қолданылуы көрсетілді
Бағдарламаның жеке бөлігі мемлекеттік секторда жасанды интеллектіні практикалық қолдануға арналды.
Делегация Alem AI орталығына барып, қазіргі әзірлемелермен және AI технологияларын мемлекеттік басқаруда пайдалану мүмкіндіктерімен танысты.
Камбоджа Ішкі істер министрлігінің делегациясына «Азаматтарға арналған үкімет» мемлекеттік корпорациясында жаңа форматтағы цифрлық ХҚКО жұмысы да көрсетілген. Мұнда азаматтардың қызметтерді өз бетінше алу аймақтары, онлайн-сервистер, консультанттармен жұмыс, жасанды интеллект және биометриялық сәйкестендіру технологиялары қолданылады. Бұл туралы Gov.kz порталында хабарланған.
Бағдарлама практикалық воркшоппен аяқталды. Қатысушылар цифрлық трансформация тәсілдерін талқылап, алған білімдерін нақты міндеттерге қолданды.
Қазақстан GovTech тәжірибесін халықаралық деңгейде таныстырып жатыр
Камбоджа делегациясының қызығушылығы тек eGov интерфейсін көрумен шектелген жоқ. Қазақстан тарапы мобильді сервистерді, мемлекеттік деректермен жұмысты және жасанды интеллектіні қызмет көрсету процестеріне енгізу тәсілдерін бір жүйе ретінде ұсынды.
«Ұлттық ақпараттық технологиялар» АҚ басқарма төрағасы Дәулет Бекманов халықаралық тәжірибе алмасу қазақстандық цифрлық сервистерді одан әрі дамытуға да мүмкіндік беретінін айтты.
«Қазақстандық цифрлық шешімдер мен GovTech дамуының шетелдік әріптестеріміздің қызығушылығын тудырып отырғанына қуаныштымыз. Бүгінде «Ұлттық ақпараттық технологиялар» АҚ үшін жинақталған тәжірибемен бөлісу ғана емес, халықаралық серіктестермен ашық кәсіби диалог жүргізу де маңызды. Мұндай бағдарламалар біздің шешімдерімізді таныстыруға, тәжірибе алмасуға, құнды кері байланыс алуға және цифрлық мемлекеттік қызметтерді одан әрі дамыту мен жетілдіру үшін үздік тәжірибелерді қабылдауға мүмкіндік береді», — деді Дәулет Бекманов.
Қазақстан үшін мұндай бағдарламалар отандық цифрлық шешімдерді шетелдік мемлекеттік құрылымдарға таныстырудың және халықаралық кәсіби ортада тәжірибе алмасудың бір тетігіне айналып отыр.
Бұған дейін біз Қазақстанда eGov 3.0 іске қосылып, мемлекеттік қызметтердің бір бөлігі жасанды интеллектімен диалог форматына көшетіні туралы жазған едік.
