Гентте қазақ кітаптарының қоры толықты.
Бұл Бельгияда өсіп келе жатқан қазақстандық балаларға, соның ішінде бельгиялық отбасылар асырап алған балаларға қазақ тілі мен мәдениетімен байланысты сақтаудың тағы бір жолын ұсынады, деп хабарлайды DKNews.kz.
Іс-шара Қазақстан халқы тілдері күніне орай Гент қаласындағы Qazaq Roots қазақ мәдени орталығында өтті. Кездесуді орталық Қазақстанның Бельгиядағы Елшілігінің қолдауымен ұйымдастырды.
Qazaq Roots кітапханасына қазақстандық авторлардың кітаптары берілді
Кездесуге Фландрияда тұратын отандастар, бельгиялық отбасылар асырап алған қазақстандық балалар және Қазақстанның тілі мен мәдениетіне қызығушылық танытатын бельгиялықтар қатысты.
Қатысушылар қазақ тіліндегі кітаптарды оқып, Қазақстан әдебиетімен танысты. Сондай-ақ викториналар мен интерактивті тіл ойындары ұйымдастырылды.
«Кітап оқитын ұлт – Читающая нация» жобасы аясында Qazaq Roots кітап қоры қазақстандық жазушылардың жаңа басылымдарымен толықты. Енді оларды орталықта оқуға және кітап алмасу үшін пайдалануға болады.
Іс-шараға «Кітап оқитын ұлт – Читающая нация» қоғамдық қорының атқарушы директоры Аян Сакошев онлайн қосылды. Ол жобаның мақсаты мен кітап оқу мәдениетін дамыту жөнінде айтты.
«Біздің міндетіміз – кітап оқуды әртүрлі буынды біріктіретін күнделікті мәдениеттің бір бөлігіне айналдыру. Әсіресе шетелде тұратын қазақстандықтардың кітап арқылы ана тілімен, мәдениетімен және Қазақстанмен байланысын сақтауы маңызды», — деді Аян Сакошев.
Бельгияда өскен балалар үшін қазақ тілі — тамырмен байланыс
Кездесудің ерекше тұстарының бірі — оған бельгиялық отбасылар асырап алған қазақстандық балалардың қатысуы.
Qazaq Roots орталығы үшін мұндай балалармен жұмыс істеу маңызды бағыттардың бірі. Қазақ тілі, кітап және ортақ мәдени кеңістік арқылы олар Қазақстанның мәдениетімен жақынырақ таныса алады.
«Бельгияда өсіп келе жатқан балаларымыз үшін қазақ тілі — өз тамырымен байланыс. Біз Qazaq Roots орталығында олардың тілді үйреніп қана қоймай, қазақ кітаптарын оқып, бір-бірімен араласып, Қазақстан мәдениетін тереңірек танығанын қалаймыз», — деді орталық жетекшісі Майнұр Жұманова.
Қазақ тілін Брюссель мен Гентте үйренуге болады
Брюссель мен Гентте ашылған қазақ мәдени орталықтарында қазақ тілін үйренгісі келетіндердің барлығына арналған курстар жұмыс істейді.
Бұл сабақтар шетелдегі отандастарға ана тілін сақтауға көмектессе, бельгиялықтарға Қазақстанды, оның мәдениеті мен дәстүрлерін жақынырақ тануға мүмкіндік береді.
Генттегі кітап қорының толықтырылуы осы жұмыстың практикалық жалғасына айналды. Енді қазақ тілін сабақ үстінде ғана емес, көркем және танымдық әдебиет арқылы да қолдануға болады.
Іс-шара шетелде қазақ тілін ілгерілетуге және кітап оқу мәдениетін насихаттауға бағытталған «Кітап оқитын ұлт» жобасының бір бөлігі болды.
