Ұлттық ұлан Бас қолбасшылығында волейболдан Қазақстан Республикасының Тәуелсіздігі күніне арналған турнир өтті, деп хабарлайды DKnews.kz.
Жарысқа құқықтық тәртіп әскерінің Бас қолбасшылығынан және Ұлттық қорғаныс университетінің Ұлттық ұлан факультетінен барлығы 16 құрама команда, 130-ға жуық әскери қызметші қатысты.
Тартысты бәсекеде Байланыс басқармасының командасы бірінші орын иеленді. Екінші орынға Ұлттық қорғаныс университеті Ұлттық ұлан факультетінің командасы жайғасса, үшінші орын Құжаттамалық қамтамасыз ету басқармасы және Бюджет-қаржы басқармасының командасына бұйырды.
Сонымен қатар Қазақстан Республикасы Ішкі істер министрінің орынбасары – Ұлттық ұланның Бас қолбасшысы генерал-майор Аңсаған Балтабековтың бұйрығымен Байланысты қамтамасыз ету орталығы байланыс торабының бөлініс бастығы кіші сержант Таңат Сейітжан «Турнирдің үздік ойыншысы», Кадр және әскери білім басқармасының қызметшісі Дәулет Күлекенов «Жасы үлкен ойыншы», Жауынгерлік даярлық бас басқармасының қызмет бастығы полковник Рауан Байбосынов «Үздік тосқауыл қоюшы», Әскерді басқару орталығының офицері майор Рүстем Қазиханов «Үздік ойыншы» номинациялары бойынша марапатталды. Бұдан бөлек аталмыш біріншілікті өткізуге қосқан үлесі үшін Әскерді басқару орталығының аға офицері (Жедел кезекші) подполковник Дмитрий Мекаевқа «Әділ төреші» номинациясы берілді.
Марапаттау рәсімінде Ұлттық ұлан Бас қолбасшысының орынбасары генерал-майор Бауыржан Әбжанов Қазақстан Республикасы Ішкі істер министрінің орынбасары - Ұлттық ұланның Бас қолбасшысы генерал-майор Аңсаған Балтабековтің атынан жеңімпаздарды ауыспалы кубокпен, дипломдармен және грамоталармен марапаттады.
"Ұлттық ұланның әскери қызметшілері әрқашан спорттық шараларда белсенділік танытады. Волейболдан өткен турнир осы жылда ұйымдастырылған спартакиаданы қорытындылады. Турнир барысында сіздер тек спорттық шеберлік қана емес, тәртіп пен өзара құрмет және командалық рух сияқты қасиеттеріңізді де көрсеттіңіздер. Турнирге қатысқан барша ұжымға алғыс білдіремін және жүлделі орындарға ие болған командаларды құттықтаймын!" Бауыржан Садықұлы
Айта кетейік, Ұлттық ұлан Бас қолбасшылығында жыл сайын дәстүрлі түрде әр түрлі спорт түрлерінен сайыстар өткізіліп тұрады.
