Бұл туралы Ұлттық ұланның Бас қолбасшылығында Қазақстан Республикасы Қорғаныс министрлігі, ҰҚК, ҰҚК Шекара қызметі және Төтенше жағдайлар министрлігі тыл қызметтері өкілдерінің қатысуымен өткен дөңгелек үстел барысында белгілі болды, деп хабарлайды DKnews.kz.
Айта кетейік, Мемлекет басшысының тапсырмасына сай басқару процестерін одан әрі цифрландыру шеңберінде Ұлттық ұлан қоймаларындағы азық-түлік қорларының жарамдылық мерзімдеріне цифрлық бақылау енгізілді.
Құқықтық тәртіп әскері қазақ халқының ұлттық тағамдарын танымал ету мен мәдени құндылықтарын сақтау аясында әскери қызметшілердің рационына енгізуге бастамашы болды.
Жаңартылған армиялық рационға қазақша ет, сірне, наурыз-көже, нарын, кеспе, бауырсақ және басқа да дәстүрлі тағамдар енгізіледі.
Әскери тамақтануға ұлттық тағамдарды енгізу - бұл аспаздық жаңалық қана емес, әскери қызметшілеріміздің жауынгерлік рухын нығайту мен мәдени бірегейлігін сақтаудағы маңызды қадам Ұлттық ұлан Бас қолбасшысының тыл жөніндегі орынбасары Еркебұлан Хамидуллин
Ұсынылып отырған өзгерістер алдын ала Қазақ тамақтану академиясымен келісілген, себебі калориясы мен энергетикалық құндылығы жоғары ұлттық тағамдармен байытылған рацион зат алмасуды, иммунитетті жақсартуға және қарқынды жүктемеден кейін күш-қуатты қалпына келтіруге ықпал етеді.
Дөңгелек үстел қорытындысы бойынша Ұлттық ұланның бастамасы қолдау тапты. Алдағы уақытта осындай жұмыс ортақ күшпен жалғасатын болады.
Бұл бастама әскери қызметшілердің денсаулығын нығайтып қана қоймай, оларды патриоттық рухта тәрбиелеуде маңызы рөл атқарады.
Дәстүрлі тағамдар туған жерін, жақын адамдарын еске салып, мәдени мұрамен байланысты арттырады деп есептейді әскери медицина және психология саласындағы сарапшылар.
Айта кетсек, өткен жылы құқықтық тәртіп әскерлерінде жаңартылған рационға апробация жүргізілді. Ұландықтар бұл бастаманы ықыласпен қарсы алды. Олар дәстүрлі тағамдардың әскери қызметте қолайлы жағдай жасап, психологиялық көңіл-күйдің жақсы болуына өз септігін тигізетінін атап өтті.
