Ұлттық ұлан 6698 әскери бөлімінің жауынгерлері Ұлы Жеңістің 80 жылдығына орай Шымкент қаласындағы №2 қалалық кітапхана қызметкерлері ұйымдастырған «Ерлікке тағзым – елдіктің белгісі» атты тарихи танымдық сағатқа қатысты, деп хабарлайды DKnews.kz.
Бұл кеште ел тарихындағы сындарлы соғыс жылдарында Отанымыз үшін отқа түскен қаһармандарымыз – Сабыр Рақымовтың, Рахымжан Қошқарбаевтың, Сағадат Нұрмағамбетовтің ерліктері мен олар туралы жазылған естеліктер жайында айтылды.
Әрқайсысының батырлығы мен қызметі том-том кітап болатын ұлы тұлғалар туралы тың деректер, фильмдерден үзінділер көрсетілді.
Қазақстан мен Орталық Азиядан шыққан тұңғыш генерал Сабыр Рақымов, Отанға қызмет ету, ел қорғау ісінен биік абырой жоқ деп санаған Сағадат Нұрмағамбетов, Берлиндегі Рейхстагқа Жеңіс туын тіккен қазақ азаматы, Халық қаһарманы Рақымжан Қошқарбаев туралы жазылған шығармаларға шолу да жасалды.
Тарихи кешке қонақ ретінде қатысқан ардагерлер де ұлылардың ерлігін ұлықтап қана қоймай, жауынгерлердің патриоттық рухын көтеретін батылдық, адалдық жайындағы тағлымды тәжірибелерімен бөлісті. Өз кезегінде жауынгерлеріміз тарихи кешті ұйымдастырған кітапхана қызметкерлеріне алғысын білдіріп, батыр бабалардың аманатына адал болып, олар жасаған ұлы ерлікті ұмытпай өнеге ететінін айтты.
