4 сәуірде Орал қаласында Энергетика министрлігі ірі мұнай-газ жобаларында елішілік құндылықты дамыту бойынша жүргізіп жатқан жұмыс шеңберінде «Қарашығанақ жобасында жергілікті қамтуды дамыту» форумы өтті, деп хабарлайды DKnews.kz.
Іс-шараға Батыс Қазақстан облысы әкімінің орынбасары Қ.Меңдіғалиев, Энергетика министрлігінің, «Атамекен» ҰКП, «PSA» ЖШС өкілетті органының, «Халықаралық Мұнай-газ машина жасауды дамыту орталығы» ЗТБ өкілдері, сондай-ақ 30-дан астам отандық тауар өндіруші қатысты.
Форум жергілікті қамтуды дамытуға және отандық мұнай-газ жабдықтарын өндірушілерді, сондай-ақ сатып алынатын ҚПО тауарларын және сатып алынатын өнімнің сапасына қойылатын талаптарды көрсету арқылы жұмыстарды (көрсетілетін қызметтерді) берушілерді қолдауға бағытталған.
Министрлік өкілі Т. Қаженов Энергетика министрлігінің ҚПО-мен бірлесе отырып, елішілік құндылықты дамыту бойынша жүргізіліп жатқан жұмысы туралы, оның ішінде қазақстандық тауар өндірушілер мен жұмыстарды (қызметтерді) берушілерді Қарашығанақ жобасын сатып алуға тарту бөлігінде баяндама жасады.
Форум аясында отандық тауар өндірушімен «Орал агроөнеркәсіп» АҚ-мен мамандандырылған автотехниканы жеткізуге келісімшартқа, сондай-ақ «West Oil» ЖШС-мен одан әрі ынтымақтастық туралы меморандумға қол қойылды.
Сондай-ақ 4 сәуірде Батыс Қазақстан облысының мұнай-газ жабдықтарын өндірушілердің бірқатар өндірістік объектілері: «Орал агроөнеркәсіп» АҚ, «West Oil» ЖШС, «Батыс Қазақстан машина жасау компаниясы» АҚ, «QazExpoCentre-Pipe» ЖШС, «КаспиМунайКапитал»» ЖШС-ға барды.
Кездесулер барысында зауыттардың қазіргі қызметі, өндірістік әлеуеті және индустриялық даму перспективалары мәселелері талқыланды.
Бұл оқиға мұнай-газ секторының ірі жер қойнауын пайдаланушыларын сатып алудағы қазақстандық қамтуды ұлғайту және отандық тауар өндірушілерді, сондай-ақ жұмыстарды (көрсетілетін қызметтерді) берушілерді қолдау бойынша Үкімет жұмысындағы кезекті қадам болды.
Энергетика министрлігінің бұл бағыттағы жұмысы жалғастырылатын болады.
