Алып ойдың иесі, һәкім Абай атамыз «Ғылым таппай мақтанба» атты өлеңінде «Бес нәрсеге асық бол» деп, талапты, еңбекті, терең ойды, қанағат пен рақымды асыл істер қатарына енгізіп, өсек, өтірік, мақтаншақ, еріншек, бекер мал шашпақ секілді қасиеттерді теріс қылыққа жатқызады.
Яғни, ұлы ойшыл адам баласының саналы ғұмырында адалдықтың ақ туын көтеріп, соқтықпалы, соқпалы жолда тағылым аларлық тұлғаға айналғанын қалайды. Ал, адамзаттың ауызбіршілікте, әділетті, жарқын өмір сүруі үшін мемлекеттің қолданатын негізгі заңы болуы шарт. Бұқараның буалдыр болашағын айқындап, түреннен жол салу үшін кешегі хандарымыз бен билеріміз дала заңдарын қазақ сақарасына дарытып, дүйім елді дүрліктіргендерге дүре соқтырып, жазалар қолданған.
Дала заңдары еліміздің дәулеті мен сәулетін, ынтымағы мен қауіпсіздігін арттыру бағытында жүзеге асқан. Қасым ханның қасқа жолы мен Есім ханның ескі жолы, Тәуке ханның «Жеті жарғысы», міне, бұлар ел игілігі жолында ізгіліктің ізі қалған шаралар еді. Ақсөңке сүйекке толы көне тарихқа үңіле түссек, қазақтың маңдайына біткен «қара қылды қақ жарған» марғасқалары өміршең дала ережелерін жұрт ішінде жаппай қолданып, әрі оны өз заман тынысының қажеттілігіне орай жетілдіріп, жүйелей түсті.
Қастерлі құндылығымыздың қағидаттарын ұрпақ сабақтастығында бұлжытпай орындап, нәтижесінде біз қазіргі таңда мызғымас мемлекетімізді орнатып, Тәуелсіздігімізді тұғырлы еттік. Ата Заң тәуелсіздігіміз бен тұтастығымыздың кепілі ретінде біздің бірлігімізді бекемдеп, елдегі тұрақтылық пен татулықтың берік тұтқасы болды. Ол заңның барлық тілдердегі мойындалған атауы – Конституция.
Бұл орайда еліміз 1995 жылы өзінің талғам-талқысынан өткен басты құжаты Конституциясын жүрек қалауымен қабылдады. Жасампаздықтың жаңылмас жарғысы болған Конституция біздің барша жарқын істеріміздің қайнар бастауына айналды. Осы орайда, Ата заң күніне орай Ұлттық ұланның 6699 әскери бөлімінің мерзімді әскери қызметшісі Нұрасыл Думанов өз пікірімен бөлісті. Өскемен қаласындағы әскери бөлімде Отан алдындағы борышын өткеріп жатқан мерзімді әскери қызметші Ұлттық ұлан сапына Абай облысы Аягөз қаласынан шақыртылыпты. Алты жасынан бастап бокспен шұғылданған ұландық бүгінде түрлі байрақты бәсекелерде ел намысын қорғаған.
"Мен бейбіт күн астындағы шуақты күндерді арайлы Ата заңымызға балаймын. Құқықтық тәртіп әскерінде басымнан бақайшағыма дейін жауынгерлік рухпен қаруландым. Балаң шағымнан спортты жаныма серік етіп, алпауыт елдерді аралап, білек күшімді сынап, ел намысын қорғағаным Ата заңымның арқасы деп ойлаймын. Сондықтан, буырқанған бурадай күшпен толысып, әскери дағдыларды меңгерген мен Ата заңның қадір-қастерін арттырып, қарашығымдай қорғауға серт беремін. Ата заңды айбыныма теңеймін. Өйткені, заң ережелері кез келген жағдайда өз құқығыңды қорғап, аларсамас еңсемді тік ұстап жүруге мүмкіндік береді. Ата заң күні құтты болсын! Жылдан жылға егемендіктің тұғырына айналған құндылықтарымыз – Тәуелсіздігіміз, бірлігіміз нығая берсін. Әр шаңыраққа құт-береке, ырыс-құт пен ынтымақ тілеймін. Келешегіміз кемел болсын!" 6699 әскери бөлімінің қатардағы жауынгер Нұрасыл Думанов
