Қазақстан Республикасы Төтенше жағдайлар министрлігінің 30 жылдық мерейтойына орай Мәлік Ғабдуллин атындағы Азаматтық қорғау академиясы «30 игі іс» республикалық акциясына белсенді қатысуда. Академия курсанттары мен оқытушылары қоғаммен байланысты нығайтуға, азаматтық жауапкершілікті дамытуға және қауіпсіздік мәдениетін насихаттауға бағытталған бірқатар әлеуметтік маңызы бар және патриоттық іс-шараларды ұйымдастырды, деп хабарлайды DKNews.kz.
Күндізгі факультет курсанттары арасында өткен «Батыр QUEST» спорттық марафоны ең жарқын шаралардың бірі болды. Іс-шараның басты мақсаты болашақ құтқарушылардың дене даярлығын жетілдіру, көшбасшылық қасиеттерін дамыту және патриоттық рухты нығайту болды. Курсанттар шынайы төтенше жағдайларға барынша жақын жағдайларда сайысып, үйлесімді әрекет ету, батылдық пен төзімділік дағдыларын көрсетті.
Өскелең ұрпаққа қамқорлық көрсету мақсатында Академияда «Мерей» балабақшасының тәрбиеленушілеріне экскурсия ұйымдастырылды. Балалар өрт сөндірушілердің жұмысымен танысып, олардың жауынгерлік киімдерін көріп, өрт сөндіру техникасымен және құрал-жабдықтарымен жақын танысты. Тіпті нағыз өрт сөндіру көлігінің жолаушысы болу бақытына ие болды. Бұл шара балалар үшін нағыз мереке мен ерлікке бастайтын тәрбиелік сабаққа айналды.
Сонымен қатар акция аясында Академия қызметкерлері өрт қауіпсіздігі бойынша сабақтар мен нұсқаулықтар өткізді. Академия мамандары «Білім-инновация» лицейінің оқушыларымен және Көкшетау қаласының тұрғындарымен кездесті. Оларға қауіпсіздік ережелерін, өрт кезіндегі іс-қимыл тәртібін және тұрмыстағы төтенше жағдайлардың алдын алу тәсілдерін еске салды.
Осы акция аясындағы әрбір игі іс – қоғамдағы қауіпсіздік, бірлік пен өзара түсіністікті нығайтуға қосылған үлес. Азаматтық қорғау академиясы «30 игі іс» бастамасына белсенді қатысуды жалғастырып, Отанға қызмет ету – ізгі істерден басталатынын өз үлгісімен дәлелдеп келеді.
