Қазақстанда креативті индустрия субъектілеріне мемлекеттік қолдау көрсету және ынталандыру қағидалары бекітілді, деп хабарлайды DKNews.kz.
Жаңа құжат саланы дамытудың жүйелі әрі ашық тәсілін қалыптастырып, креативті жобалардың бүкіл өмірлік циклін қамтиды — идея мен пилоттық шешімдерден бастап халықаралық нарыққа шығу мен коммерцияландыруға дейін
Идеядан экспортқа дейін: саланы дамытудың бірыңғай логикасы
Қабылданған қағидалар креативті бастамаларды сүйемелдеудің тұтас моделін қалыптастырады. Қолдау жобаларды іске асырудың барлық кезеңдерін қамтиды, соның ішінде іске қосу, ауқымын кеңейту, экспорт және зияткерлік меншікті қорғау. Бұл креативті бизнестің тұрақтылығын арттырып, оның экономикаға интеграциялануына ықпал етуі тиіс
Қайтарымдылық қағидаты және жеке инвестицияларға басымдық
Құжаттағы негізгі басымдық — қаражаттың қайтарымдылық қағидаты. Мемлекеттік қолдау жобалардың экономикалық өміршеңдігіне бағытталып, гранттық қаржыландыру үлесін барынша азайтуды және жеке инвесторларды белсенді тартуды көздейді. Мұндай тәсіл саланы дамытудың жауапты әрі орнықты моделін қалыптастыруға бағытталған
Қаржылық қолдау құралдары
Қағидалар қаржылық қолдаудың кең ауқымды тетіктерін қамтиды. Олардың қатарында креативті және пилоттық жобаларды қаржыландыру және бірлесіп қаржыландыру, жеке инвесторлармен бірге бастамаларды іске асыру, креативті өнім экспортын қолдау, зияткерлік меншікті тіркеу мен құқықтық қорғауға кеткен шығындарды өтеу, халықаралық шығармашылық байқаулар мен іс-шараларға қатысу, сондай-ақ халықаралық деңгейдегі жетістіктері үшін марапаттау бар
Қаржылық емес шаралар және экожүйені дамыту
Қаржылық құралдармен қатар қаржылық емес қолдаудың кең спектрі де қарастырылған. Оған консультациялық, акселерациялық және білім беру көмегі, халықаралық мәдени және креативті платформаларға қатысуға жәрдемдесу, жеңілдетілген шарттармен үй-жайлар мен жабдықтар ұсыну, цифрлық сервистер мен онлайн-платформаларды дамыту, жобаларды маркетингтік және құқықтық сүйемелдеу кіреді
Сонымен қатар креативті индустрияны дамытудың өңірлік стратегияларын әзірлеуге, инклюзияны қамтамасыз ету шараларына және саланың жекелеген бағыттары бойынша арнайы бағдарламаларды іске асыруға ерекше назар аударылған
Креативті индустрия — экономиканың толыққанды секторы
Қағидалардың қабылдануы креативті индустрияны дербес әрі маңызды экономикалық секторға айналдыруға институционалдық негіз қалайды
Бұл қосылған құнды арттыруға, жаңа жұмыс орындарын құруға және Қазақстанның халықаралық аренадағы экспорттық әлеуетін күшейтуге мүмкіндік береді
