Алматыдағы Алатау аудандық полиция қызметкерлері әлеуметтік желілер арқылы кешкі көйлектерді сатамын деп алдап, интернет-алаяқтық жасағаны күдікке ілінген әйелді ұстады, деп хабарлайды DKNews.kz.
Полицияның мәліметінше, күдікті Instagram желісінде парақшалар ашып, киім сатуға қатысты хабарландырулар жариялаған. Ол әлеуетті сатып алушылардан алдын ала төлем немесе задаток аударуды сұраған. Ақша түскеннен кейін жәбірленушілермен байланыс үзілген — аккаунттар бұғатталып, хат алмасулар өшірілген.
Қазіргі уақытта күдікті ұсталды. Оқиғаның барлық мән-жайын анықтауға бағытталған кешенді тергеу шаралары жүргізілуде. Құқық қорғау органдары оның осыған ұқсас өзге де интернет-алаяқтық деректеріне қатысы бар-жоғын тексеріп жатыр.
Полиция өкілдері мұндай алаяқтық схемалар интернет кеңістігінде әлі де ең кең таралған тәсілдердің бірі болып отырғанын, көбіне азаматтардың сеніміне негізделетінін атап өтті.
— Алаяқтар өзін нағыз интернет-дүкен ретінде көрсетіп, адамдарды ақша аударуға көндіреді. Біз тұрғындарды онлайн-сатып алулар кезінде барынша сақ болуға, бейтаныс тұлғаларға ақша жібермеуге және мәміле жасамас бұрын сатушыны міндетті түрде тексеруге шақырамыз, — деді Алатау аудандық полиция басқармасының бастығы Еділхан Байғараев.
Полиция департаментінде интернет-алаяқтық фактілері анықталған жағдайда ішкі істер органдарына дереу жүгіну қажеттігін еске салды. Ерте жүгіну күдіктілерді тезірек анықтауға және жаңа алдау деректерінің алдын алуға мүмкіндік береді.
