Елена Рыбакина Australian Open — 2026 турнирінде сенімді ойынын жалғастырып, мұны барынша айқын дәлелдеп келеді, деп хабарлайды DKNews.kz.
Турнирдің төртінші айналымында әлемнің бесінші ракеткасы атақты қарсыласына еш мүмкіндік қалдырмай, матчты екі сетте жеңіспен аяқтады — 6:1, 6:3.
Рыбакинаның қарсыласы WTA рейтингінде 21-орында тұрған бельгиялық теннисші Элисе Мертенс болды. Турдағы ең тәжірибелі ойыншылардың бірі саналатын Мертенс бұл жолы лайықты қарсылық көрсете алмады. Айта кету керек, ол — жұптық сында «Үлкен дулыға» турнирлерінің бес дүркін чемпионы және Австралия ашық чемпионатының екі мәрте жеңімпазы. Мертенс бұл турнирде 2021 және 2024 жылдары чемпион атанған.
Алайда жекелей кездесуде басымдық толықтай Рыбакина жағында болды. Қазақстандық теннисші алғашқы геймдерден-ақ жоғары қарқын орнатып, өз сервисінде сенімді ойнады әрі қабылдауда үнемі қысым көрсетіп отырды. Матч барысында ол 10 эйс орындап, бар болғаны бір қос қателік жіберді және сегіз брейк-пойнттың үшеуін тиімді пайдаланды.
Рыбакинаның ойыны жинақы әрі кемел көрінді: қуатты подача, артқы сызықтағы агрессивті соққылар және шешуші сәттердегі салқынқандылық қарсыласына манёвр жасауға мүмкіндік қалдырмады. Кездесу толықтай әлемнің бесінші ракеткасының бақылауымен өтті.
Енді Australian Open — 2026 турнирінің ширек финалында Елена Рыбакинаны маңызды сын күтіп тұр. Жартылай финал жолдамасы үшін ол әлемнің екінші ракеткасы, польшалық теннисші Ига Швёнтек пен австралиялық Мэддисон Инглистің арасындағы матчтың жеңімпазымен кездеседі.
Мельбурндегі турнир шешуші кезеңге жақындап келеді, ал Рыбакина титулға басты үміткерлердің бірі екенін барған сайын нық дәлелдеп отыр.
