Су ресурстары және ирригация министрі Нұржан Нұржігітов БҰҰ-ның Қазақстандағы тұрақты үйлестірушісі Саранго Раднарагчамен кездесті, деп хабарлайды DKNews.kz.
Кездесу барысында Мемлекет басшысы Қасым-Жомарт Тоқаевтың су ресурстары саласындағы халықаралық өзара іс-қимылды күшейтуге бағытталған бастамаларын іске асыру мәселелері талқыланды.
Тараптар су қауіпсіздігін өңірлік және жаһандық деңгейде қамтамасыз етуге бағытталған жаңа форматтағы ынтымақтастық мүмкіндіктерін қарастырды.
Халықаралық су ұйымы және өңірлік бастамалар
Кездесуде Президенттің бірқатар стратегиялық ұсыныстары сөз болды: БҰҰ құрылымында Халықаралық су ұйымын құру, Қазақстанда Шанхай ынтымақтастық ұйымының Су проблемаларын зерттеу орталығын ашу, Орталық Азия елдерінің су пайдалану жөніндегі негіздемелік конвенциясын әзірлеу.
Бұл бастамалар трансшекаралық өзендер, су ресурстарын әділ бөлу және климаттық өзгерістер жағдайындағы тұрақты басқару мәселелерін жүйелі түрде шешуге бағытталған.
Астанадағы экологиялық саммитке дайындық
Министр мен БҰҰ-ның Қазақстандағы тұрақты үйлестірушісі 22–24 сәуір аралығында Астанада өтетін өңірлік экологиялық саммитке дайындық барысын да талқылады. Су ресурстарына қатысты іс-шараларды ұйымдастыру және бірлескен ұсыныстар әзірлеу мәселелері пысықталды.
Бұл саммит Орталық Азиядағы су қауіпсіздігі мен экологиялық тұрақтылық тақырыбын халықаралық деңгейде талқылауға мүмкіндік береді.
Бірлескен жобалар мен нақты серіктестік
Кездесу соңында министр Раднарагча ханымды Қазақстан Республикасының су секторын дамыту жөніндегі әріптестердің Үйлестіру кеңесінің алдағы отырысына қатысуға шақырды.
«Біз Қазақстандағы БҰҰ Даму бағдарламасымен, соның ішінде Үйлестіру кеңесі аясында өте тығыз ынтымақтастық орнатып келеміз. Сондай-ақ БҰҰ Даму бағдарламасы Ислам даму банкімен бірлесіп елдегі су шаруашылығы инфрақұрылымын салу және реконструкциялау жобаларына белсенді қатысуда. БҰҰ-ның Азық-түлік және ауыл шаруашылығы ұйымының қолдауымен халықаралық қаржы институттарымен өзара іс-қимыл жүзеге асырылып келеді. Ал ЮНИСЕФ балалар мен жастар арасында су ресурстарын ұқыпты пайдалануға бағытталған жобаларға қатысады. Мемлекет басшысы су қауіпсіздігін қамтамасыз етуде халықаралық ынтымақтастықтың маңызын бірнеше рет атап өтті және біз бұл бағытта БҰҰ-мен бірлесе жұмыс істеуге дайынбыз», – деді Нұржан Нұржігітов.
Қазақстан үшін су қауіпсіздігі тек экологиялық мәселе емес, бұл азық-түлік қауіпсіздігі, энергетика және өңірлік тұрақтылықпен тікелей байланысты стратегиялық бағыт. Сондықтан халықаралық ұйымдармен үйлесімді жұмыс – ұзақ мерзімді тұрақтылықтың басты кепілі.
