Маңғыстау облысы бойынша Мемлекеттік кірістер департаменті кәсіпкерлерге маңызды ескерту жасады. Оңайлатылған декларация негізіндегі Арнаулы салық режимін қолдануды жоспарлаған салық төлеушілер 2026 жылғы 1 наурызға дейін арнайы хабарлама ұсынуы тиіс, деп хабарлайды DKNews.kz.
Мерзімнен кешіксеңіз не болады?
Егер хабарлама 1 наурызға дейін ұсынылмаса, салық төлеуші 2026 жылғы 1 қаңтардан бастап автоматты түрде жалпыға бірдей белгіленген салық салу тәртібіне көшіріледі.
Яғни арнайы режим қолданылмайды.
Хабарламаны қалай ұсынуға болады?
Салық режимін таңдау немесе өзгерту туралы хабарламаны бірнеше тәсілмен беруге болады:
- Салық төлеуші кабинеті арқылы
- «e-Salyq Business» мобильді қосымшасы арқылы
- орналасқан жері бойынша Мемлекеттік кірістер басқармасына қағаз түрінде
- банктердің мобильді қосымшалары арқылы
Қазіргі таңда бұл сервис Kaspi қосымшасында да қолжетімді. Ол «Мемлекеттік қызметтер» бөлімінде орналасқан.
Қате жібергендер не істеуі керек?
2025 жылдың соңында «көшу» себебімен хабарламаны қате ұсынған салық төлеушілерге қайта түзету мүмкіндігі берілген.
2026 жылғы 12 қаңтардан бастап ақпараттық жүйеде хабарламаны қайта ұсыну функциясы іске қосылды.
Егер бұрын хабарлама қате берілген болса, жаңа хабарламаны қайта жолдау қажет.
Неге бұл маңызды?
Салық режимін дұрыс таңдамау:
- салық жүктемесінің артуына
- есептіліктің өзгеруіне
- айыппұл тәуекелдеріне
әкелуі мүмкін.
Салық органдары кәсіпкерлерге белгіленген мерзімді өткізіп алмауға және режимді уақытында рәсімдеуге кеңес береді.
