Астанада кәсіпкерлер мен бухгалтерлер үшін жауапты кезең басталды. Есептілікті тапсыру мерзімінің аяқталуына небәрі 4 күн қалды. Қалалық Мемлекеттік кірістер департаменті азаматтарға соңғы күннің өзгергенін ескертті: 15 ақпан демалыс күніне сәйкес келгендіктен, есептілікті тапсыру мерзімі 16 ақпанға ауыстырылды, деп хабарлайды DKNews.kz.
Бұл – кейінге қалдыруға уақыт жоқ деген сөз. Әсіресе, электронды жүйелерге түсетін жүктеме соңғы күндері айтарлықтай артуы мүмкін.
16 ақпанға дейін қандай нысандар тапсырылуы керек?
Көрсетілген күнге дейін 2025 жылдың 4-тоқсаны мен 2-жартыжылдығына қатысты бірқатар декларациялар мен есептер ұсынылуы тиіс:
- 101.03-нысан – төлем көзінен резиденттің табысынан ұсталған корпоративтік табыс салығы бойынша есеп
- 200.00-нысан – жеке табыс салығы және әлеуметтік салық бойынша декларация
- 300.00-нысан – қосылған құн салығы бойынша декларация
- 400.00 және 421.00-нысандар – акциз бойынша декларация және құрылымдық бөлімшелерге арналған есеп (2025 жылғы желтоқсан)
- 701.01-нысан – мүлік салығы бойынша ағымдағы төлемдер есебі
- 710.00-нысан – ойын бизнесі салығы бойынша декларация
- 860.00-нысан – жерүсті су ресурстарын пайдаланғаны үшін төлем бойынша декларация
- 870.00-нысан – қоршаған ортаға теріс әсер үшін төлем бойынша декларация
- 880.00-нысан – цифрлық майнинг үшін төлем бойынша декларация
- 910.00-нысан – шағын бизнес субъектілеріне арналған оңайлатылған декларация (2025 жылдың 2-жартыжылдығы)
- 913.00-нысан – бөлшек салықтың арнайы салық режимін қолданатын салық төлеушілерге арналған декларация
20 ақпанға дейін тапсыру қажет нысандар
Кейбір құжаттар үшін бөлек мерзім белгіленген. 20 ақпаннан кешіктірмей:
- 328.00-нысан – тауарларды әкелу және жанама салықтарды төлеу туралы өтініш
- 851.00-нысан – жер учаскелерін пайдаланғаны үшін төлемдердің ағымдағы сомаларының есебі
Төлем мерзімі – 25 ақпан
Есептілікті тапсырумен іс бітпейді. Салықтар мен міндетті төлемдерді төлеу мерзімі – 2026 жылғы 25 ақпаннан кешіктірілмеуі тиіс.
Мамандардың айтуынша, мерзімді өткізіп алу айыппұл мен өсімпұл есептелуіне әкелуі мүмкін. Қазіргі таңда салық жүйесі толық цифрландырылған, сондықтан барлық дерек автоматты түрде тіркеледі.
Ақпаратты қайдан алуға болады?
Қосымша мәліметтерді 1414/3 нөмірі арқылы немесе Instagram желісіндегі @astana_mkd_dgd_astana парақшасынан алуға болады.
Алдағы төрт күн – тек күнтізбедегі белгі емес, бұл – бизнестің қаржылық тәртібін сақтайтын маңызды шекара. Уақытты тиімді пайдалану – айыппұлсыз әрі тыныш жұмыс істеудің кепілі.
