Инвестициялық құралдарға қаражат салмас бұрын брокерлік ұйымның лицензиясы бар-жоғын міндетті түрде тексеру қажет. Бұл қаржы нарығын реттеуші мамандардың негізгі кеңестерінің бірі, өйткені лицензия — компанияның заңды түрде жұмыс істейтінінің және уәкілетті органның бақылауында екенінің басты дәлелі, деп хабарлайды DKNews.kz.
Лицензия — қаржы ұйымының заңдылығының кепілі
Лицензияның болуы қаржы ұйымының қызметі мемлекет тарапынан қадағаланып отырғанын білдіреді. Ал лицензияның болмауы компанияның заң аясынан тыс әрекет ететінін және қаржылық қызметтерді тұтынушылар құқықтарының қорғалмайтынын көрсетеді. Мұндай жағдайда салынған қаражатты қайтару өте қиын немесе мүлде мүмкін болмауы мүмкін.
Қазақстанда банктердің, микроқаржы ұйымдарының, сақтандыру компанияларының, брокерлердің және қаржы нарығының өзге де қатысушыларының қызметін Қаржы нарығын реттеу және дамыту агенттігі реттеп, қадағалайды.
Брокердің заңдылығын қалай тексеруге болады
Мамандар инвесторларға Агенттіктің интернет-ресурсында орналастырылған лицензияланған қатысушылардың ресми тізілімін пайдалануға кеңес береді. Бұл тізілімде брокерлік және дилерлік қызмет жүргізуге рұқсаты бар заңды тұлғалар туралы мәліметтер, олардың мәртебесі, басшылығы, лицензиялары және қолданылған қадағалау шаралары көрсетілген.
Тексеру кезінде брокерлік қызметке қолданыстағы лицензияның бар-жоғын, компания атауының тізілімдегі деректермен сәйкес келуін, лицензияны тоқтата тұру немесе одан айыру туралы ақпараттың болмауын, тарату немесе қызметін тоқтату туралы мәліметтердің жоқтығын және көрсетілетін қызметтердің лицензия түріне сәйкестігін анықтау қажет.
Шетелдік лицензия Қазақстанда қорғаныс бермейді
Егер брокерлік ұйым шетелде тіркеліп, халықаралық лицензиясы бар екенін немесе лицензия алуды күтіп отырғанын айтса, бұл оның Қазақстан аумағында заңды түрде қызмет көрсетуіне негіз болмайды. Шет ел лицензиясы отандық инвесторлардың құқықтарын қорғауға кепілдік бермейді және мұндай жағдайда реттеуші органға жүгіну мүмкін болмайды.
Алаяқтық белгілеріне ерекше назар аудару қажет
Егер компания лицензияланған қатысушылар тізілімінде болмаса немесе мәліметтерде сәйкессіздік анықталса, мамандар инвестициядан бас тартуға кеңес береді. Сондай-ақ «кепілді табыс», өте жоғары кіріс немесе тәуекелсіз инвестициялар туралы ұсыныстарға ерекше сақ болу қажет, өйткені мұндай уәделер көбіне алаяқтық схемалардың белгісі саналады.
Алаяқтық белгілері байқалған жағдайда азаматтарға ұйыммен байланысты дереу тоқтатып, барлық дәлелдерді сақтап, құқық қорғау органдарына және Қаржы нарығын реттеу және дамыту агенттігіне жүгіну ұсынылады.
Лицензияны тексеру — қаражатты қорғаудың ең қарапайым жолы
Мамандардың айтуынша, қаржы ұйымының лицензиясын тексеру бір минуттан аз уақыт алады, бірақ бұл қаражатты жоғалту қаупін айтарлықтай төмендетуге мүмкіндік береді.
