Төтенше жағдайлар және дүлей зілзалалар қаупін азайту орталығының базасында Қазақстан тарапының төрағалығымен Орталық Кеңестің он сегізінші отырысы ұйымдастырылды, деп хабарлайды DKNews.kz.
Отырыс жұмысына кімдер қатысты
Іс-шараға Қазақстан Республикасының Төтенше жағдайлар министрі генерал-лейтенант Шыңғыс Әрінов, Қырғыз Республикасының Төтенше жағдайлар министрі Канатбек Чыныбаев, сондай-ақ Кеңес мүшелері мен бейінді бөлімшелердің өкілдері қатысты.
2025 жылғы қорытындылар және 2026 жылға жоспарлар
Отырыс барысында орталықтың 2025 жылғы қызметі қорытындыланып, 2026 жылға арналған басым бағыттар айқындалды. Қатысушыларға Орталық Азия елдерінде апаттар қаупін азайту, климаттық өзгерістерге бейімделу және ақпараттық-коммуникациялық технологияларды енгізу саласындағы жобалардың іске асырылу барысы ұсынылды.
2025 жылы орталық:
- өңірлік ынтымақтастықты дамытуға;
- халықаралық ұйымдармен өзара іс-қимылды нығайтуға;
- мемлекеттік органдар мен халықтың төтенше жағдайларға дайын болуын арттыруға бағытталған кешенді іс-шараларды жүзеге асырған.
Шыңғыс Әріновтің сөзі
Қазақстанның Төтенше жағдайлар министрі Шыңғыс Әрінов орталықтың өңірлік мемлекеттердің күш-жігерін үйлестіру, тәжірибе алмасу және төтенше жағдайлардың алдын алу мен оларды жою саласында келісілген шешімдер әзірлеу үшін тиімді алаң екенін атап өтті. Сонымен қатар, Орталықты дамыту және халықаралық ынтымақтастықты кеңейту мәселелеріне ерекше назар аударылды.
Ынтымақтастықты одан әрі дамыту
Отырыс соңында Орталық Кеңесінің қызметін тиімділігін арттыруға және өңірлік ынтымақтастықты одан әрі дамытуға бағытталған тиісті шешімге қол қойылды.
