Алматыда көлік легін талдап, жол қозғалысын тиімді үйлестіруге бағытталған цифрлық шешімдерді енгізу жоспарланып отыр. Бұл мақсатқа жету үшін 7 сәуір күні «Алматы – Шанхай» бизнес форумы аясында «Алматы қаласын дамыту орталығы» АҚ, «IntegraConstruction KZ» ЖШС және Шанхай институты арасында меморандумға қол қойылды, деп хабарлайды DKNews.kz.
Жобаның негізгі мақсаты
Аталған келісімнің басты міндеттері:
- Көлік жүктемесін азайту;
- Жол желісінің тиімділігін арттыру;
- Қаланың жол инфрақұрылымын басқару жүйесін жаңғырту;
- Көлік санын сараптау және цифрлық құралдарды енгізу;
- Қалалық трафикті басқарудың заманауи шешімдерін әзірлеу.
Бұл бастама Алматыдағы көлік жүйесін жаңғыртуға, сапалы және тиімді қозғалысты қамтамасыз етуге бағытталған.
Форум мен халықаралық ынтымақтастық
Бизнес форумға Алматы әкімі Дархан Сатыбалды мен Шанхай мэрі Гун Чжэн қатысты. Кездесу барысында тараптар екі мегаполис арасындағы ынтымақтастықты кеңейту жолдарын, соның ішінде көлік, цифрландыру және орнықты даму бағыттарын талқылады.
- Алматы мен Қытай арасындағы экономикалық байланыс жыл санап нығайып келеді: былтырғы жылдың қорытындысы бойынша өзара тауар айналымы 20%-ға артып, 9,5 миллиард АҚШ долларына жетті.
Алматы цифрландыру және туризм саласында
Алматы цифрландыру саласында көшбасшылық позициясын сақтап отыр: елдегі IT-мамандардың жартысынан астамы осы қалада шоғырланған, бұл озық технологияларды енгізуге кең мүмкіндік береді.
Туризм де тұрақты өсімнің негізгі қозғаушы күштерінің бірі болып қала береді: Қазақстанға келетін әрбір екінші шетелдік турист Алматыны таңдайды. 2025 жылы туристер саны 40%-ға артып, 136 мың адамға жетті.
B2B кездесулер және бірлескен жобалар
Форум аясында өткен B2B форматындағы кездесулер іскерлік байланысты нығайтуға, қалалық инфрақұрылым мен экономиканы дамытуға бағытталған бірлескен жобаларды пысықтауға мүмкіндік берді.
