Маңғыстау облысы бойынша Мемлекеттік кірістер департаменті Қазақстандағы көздерден табыс алатын бейрезиденттерге салық салу тәртібіне қатысты түсіндірме жариялады, деп хабарлайды DKNews.kz.
Ведомство мәліметінше, Қазақстан Республикасының Салық кодексінің 221-бабының 2-тармағына сәйкес, бейрезиденттер Қазақстан аумағындағы көздерден алынған кірістер бойынша салық төлеуге міндетті.
Қандай кірістерге салық салынады
Бейрезиденттердің Қазақстандағы көздерден алатын кірістерінің тізбесі Салық кодексінің 679-бабында көрсетілген.
Егер бейрезидент заңды тұлғаның Қазақстандағы қызметі тұрақты мекеме құруға әкелмесе, мұндай кірістерге салық салу Салық кодексінің 72-тарауы негізінде жүргізіледі.
Салық төлем көзінен ұсталады
Салық кодексінің 683-бабына сәйкес, бейрезиденттердің мұндай кірістері:
- шегерімдерсіз;
- төлем көзінен ұсталып;
- корпоративтік табыс салығына жатады.
Салықты:
- есептеу;
- ұстап қалу;
- бюджетке аудару
міндеті салық агентіне жүктеледі.
Бұл ретте Салық кодексінің 682-бабында белгіленген мөлшерлемелер қолданылады.
Салықты ұстап қалу мерзімдері қандай
Мемлекеттік кірістер органдары салықты ұстап қалу бірнеше жағдайда жүзеге асырылатынын атап өтті.
Атап айтқанда:
- есептелген және нақты төленген кірістер бойынша – төлем жасалған күннен кешіктірмей;
- есептелген, бірақ төленбеген әрі шегерімге жатқызылған кірістер бойынша – корпоративтік табыс салығы декларациясын тапсыру мерзімінен кешіктірмей.
Салықты аудару мерзімдері
Салық агенті ұсталған салықты келесі мерзімдерде аударуға міндетті:
- төленген кірістер бойынша – төлем жасалған ай аяқталғаннан кейін 25 күнтізбелік күннен кешіктірмей;
- есептелген, бірақ төленбеген кірістер бойынша – декларация тапсыру мерзімінен кейін 10 күннен кешіктірмей;
- аванс төленген жағдайда – кіріс есептелген ай аяқталғаннан кейін 25 күннен кешіктірмей;
- тауар, жұмыс немесе қызмет көрсетілген кезде – міндеттемелер сомасы шегінде кіріс есептелген айдан кейінгі 25 күннен кешіктірмей.
Сонымен қатар Салық кодексінің 679-бабы 1-тармағының 39) тармақшасында көзделген кірістер үшін арнайы мерзімдер қарастырылған.
Есеп-қисапты қашан тапсыру қажет
Салық агенттері бейрезиденттердің кірістерінен ұсталған корпоративтік табыс салығы бойынша есеп-қисапты келесі мерзімдерде тапсырады:
- I, II және III тоқсан бойынша – келесі айдың 15-күнінен кешіктірмей;
- IV тоқсан бойынша – келесі жылдың 31 наурызынан кешіктірмей.
Кейбір бейрезиденттер декларация тапсыруға міндетті
Қазақстан аумағында тұрақты мекеме құрмайтын құрылымдық бөлімше арқылы қызмет жүргізетін бейрезиденттер:
- орналасқан жері бойынша;
- Салық кодексінің 359-бабында белгіленген мерзімде;
- корпоративтік табыс салығы декларациясын тапсыруға міндетті.
