Екі жылда 6,5 миллион адам қатысқан бастама қоғамдағы жаңа құндылықтардың символына айналып келеді
Қазақстанда соңғы екі жылда экология мәселесі тек қоршаған ортаны қорғау тақырыбы ретінде ғана емес, қоғамдық мәдениет пен азаматтық жауапкершіліктің маңызды көрсеткішіне айналды. Бұған Президент Қасым-Жомарт Тоқаев бастамашылық еткен «Таза Қазақстан» жобасы айқын дәлел.
Дүниежүзілік қоршаған ортаны қорғау күні қарсаңында еліміздің барлық өңірінде кезекті экологиялық акциялар өтіп жатыр. Алайда сарапшылардың айтуынша, бұл бастама әлдеқашан қарапайым сенбіліктер шеңберінен шығып, қоғамды біріктіретін кең ауқымды қозғалысқа айналған.
Мемлекеттік кеңесші Ерлан Қариннің пікірінше, жобаның басты ерекшелігі – оның адамдарға түсінікті әрі күнделікті өмірмен тығыз байланысты болуы.
«Таза Қазақстан» жобасы «Заң және Тәртіп» қағидатымен әрі «Адал азамат» бағдарламасымен қатар жаңа қоғамдық этиканы қалыптастырудың маңызды құралы болып саналады.
Экология алғаш рет Конституция деңгейінде көрініс тапты
Соңғы жылдары қоршаған ортаға деген жауапкершілік мемлекеттік саясаттың маңызды бағыттарының біріне айналды. Мұның символдық әрі тарихи маңызы да бар.
Жаңартылған Конституцияның преамбуласында алғаш рет табиғатты аялау қажеттігі нақты көрсетілді. Сонымен бірге мемлекет қызметінің негізгі қағидаттарының қатарына жауапты әрі жасампаз отаншылдық пен жоғары экологиялық мәдениетті қалыптастыру міндеті енгізілді.
Бұл өзгерістер экология мәселесінің қоғамдық талқылаудан мемлекеттік құндылықтар деңгейіне көтерілгенін көрсетеді.
Миллиондаған адам қатысқан науқан
Статистика бастаманың ауқымын айқын көрсетеді.
Соңғы екі жылда республика бойынша шамамен 1,5 мың экологиялық іс-шара ұйымдастырылды. Оларға 6,5 миллионға жуық адам қатысты.
Белсенді азаматтардың, еріктілердің және жастардың қатысуымен:
- 2 миллион тоннаға жуық қоқыс жиналды;
- шамамен 5,5 миллион ағаш отырғызылды;
- мыңдаған аула, саябақ пен қоғамдық кеңістік абаттандырылды.
Әсіресе жастардың белсенділігі ерекше байқалады. Көптеген өңірде экологиялық акциялар жастар ұйымдарының бастамасымен өткізіліп келеді.
Ағаш отырғызу жаңа дәстүрге айналды
«Таза Қазақстан» жобасының тағы бір ерекшелігі – оның халықаралық деңгейде де қолдау табуы.
Соңғы жылдары Қазақстанға ресми сапармен келген мемлекет басшылары, әлемге танымал мәдениет қайраткерлері мен спортшылар еліміздегі экологиялық акцияларға қатысып, ағаш отырғызуды дәстүрге айналдырды.
Бұл бастама Қазақстанның халықаралық имиджін нығайтып қана қоймай, экологиялық мәдениеттің жаһандық маңызын көрсетеді.
Жаңа идеология қарапайым құндылықтардан басталады
Қоғамды біріктіру үшін әрдайым күрделі идеологиялық тұжырымдамалар қажет емес. Кейде адамдарды ортақ мақсатқа жұмылдыратын қарапайым әрі түсінікті құндылықтар әлдеқайда тиімді болады.
Сарапшылардың пікірінше, «Таза Қазақстанның» табысы да осында. Тазалық сақтау, табиғатты қорғау, қоғамдық мүлікке ұқыпты қарау және вандализмге қарсы тұру сияқты қарапайым қағидаттар бүгінде жаңа қоғамдық мәдениеттің негізіне айналып келеді.
Жуырда Парламентте барлық саяси партиялардың өз бағдарламалары мен жарғыларына «Таза Қазақстан» қағидаттарын енгізуі қажет деген ұсыныстың айтылуы да осы үрдістің күшейіп келе жатқанын аңғартады.
Қоғамдық бастамадан өмір салтына дейін
Бүгінде «Таза Қазақстан» тек мемлекеттік жоба емес. Ол миллиондаған азаматтың қатысуымен қалыптасқан қоғамдық қозғалысқа айналды.
Көшедегі тазалыққа мән беру, ағаш отырғызу, табиғатты қорғау, қоғамдық кеңістіктерге ұқыпты қарау – мұның бәрі жауапты азаматтықтың күнделікті көрінісі болып барады.
Сарапшылардың бағалауынша, жобаның басты жетістігі де осы: «Таза Қазақстан» бір реттік акция емес, біртіндеп қоғамның өмір салтына айналып келеді.
