Қазақстан армиясының ертеңгі келбетін айқындайтын офицерлер мен әскери ғалымдар оқуын аяқтады, деп хабарлайды DKNews.kz.
Алматыдағы Қарулы күштердің Ұлттық әскери-патриоттық орталығында Қазақстан Республикасы Ұлттық қорғаныс университетінің «Бас штаб академиясы» факультеті түлектері мен докторанттарына диплом тапсыру рәсімі өтті.
Салтанатты шараға университет басшылығы, профессор-оқытушылар құрамы, күштік құрылымдардың өкілдері, Қарулы күштердің ардагерлері және түлектердің жақындары қатысты.
Іс-шара барысында Қорғаныс министрі, авиация генерал-лейтенанты Дәурен Қосанов қазіргі әлемдегі қауіпсіздік сын-қатерлері әскери басшыларға қойылатын талаптарды бұрынғыдан да күшейткенін атап өтті.
«Әскери-стратегиялық ахуалдың қарқынды өзгеруі жағдайында мемлекетке терең білімді, стратегиялық ойлай алатын және ұлттық қауіпсіздік мүддесі жолында жедел әрі салмақты шешім қабылдауға қабілетті жоғары білікті әскери басшылар қажет. Сіздердің алған білімдеріңіз бен кәсіби дағдыларыңыз ең күрделі әрі жауапты міндеттерді абыроймен орындауға, Қарулы күштердің дамуына және елдің қорғаныс қабілетін нығайтуға қызмет етеді деп сенемін», – деді министр.
Ол сондай-ақ Ұлттық қорғаныс университетінің елдің кадрлық әлеуетін нығайтудағы маңызды рөлін атап өтіп, әскери мамандарды даярлауға үлес қосқан профессорлық-оқытушылық құрамға алғыс білдірді.
Әскери мансаптағы жаңа белес
Салтанатты рәсімде «Бас штаб академиясы» факультетінің түлектері мен университет докторанттарына дипломдар табысталды. Бұл құжат олардың әскери қызметтегі келесі маңызды кезеңіне жол ашады.
Түлектер атынан үздік диплом иегері, топ командирі полковник Ержан Ембергенов сөз сөйледі.
«Ұлттық қорғаныс университетінде оқу біз үшін кәсіби әрі тұлғалық дамудың маңызды кезеңіне айналды. Біз білім мен тәжірибе жинақтап, еліміздің үздік оқытушылары мен әскери мамандарынан тәлім алдық. Мемлекет сенімін ақтап, Отанымыздың игілігі жолында қызмет ету әрбіріміз үшін – үлкен мәртебе әрі жауапкершілік», – деді ол.
Бұл күн тек түлектер үшін ғана емес
Диплом тапсыру рәсімі түлектердің отбасылары үшін де ерекше күн болды. Солардың бірі – Нұрбаевтар отбасы. Отбасындағы ерлі-зайыптылардың екеуі де әскери қызметте еңбек етеді.
«Бас штаб академиясы» факультетінің магистрі, подполковник Мерген Нұрбаев үшін диплом алу тек жеке жетістік емес, бүкіл отбасының ортақ қуанышы болды. Оның айтуынша, кәсіби жолында жұбайы, кіші сержант Жанар Нұрбаева әрдайым қолдау көрсетіп келеді.
Ал магистр полковник Асхат Ұлубаевтың анасы Нұрипа Назарымбетова бұл күннің маңызын ерекше толқыныспен жеткізді.
«Менің педагогикалық еңбек өтілім – 40 жыл. Балаларымның бойына әрдайым патриоттық сезімді сіңіріп, оларды Отан қорғауға дайын, елге адал азамат етіп тәрбиелеуге тырыстым. Бүгін отбасымыз үшін ерекше қуанышты күн. Ұлымның еліміздің жетекші әскери жоғары оқу орындарының бірі – Ұлттық қорғаныс университетін тәмамдап, магистр дәрежесін алғанын мақтан тұтамыз», – деді ол.
Мыңдаған офицер даярлаған білім ордасы
Салтанатты рәсім Орталық әскери оркестрдің сүйемелдеуімен және Құрмет қарауыл ротасы әскери қызметшілерінің қатысуымен өтті. Шарадан кейін қонақтар Әскери-тарихи музейді аралады.
Айта кетейік, Қазақстан Республикасының Ұлттық қорғаныс университеті құрылған күннен бастап жоғары буындағы әскери кадрларды даярлайтын жетекші білім ордаларының біріне айналды. Осы жылдар ішінде оқу орны Қарулы күштерге, басқа да әскерлер мен әскери құралымдарға мыңдаған офицер даярлады. Бүгінде мұнда қазақстандық әскери қызметшілермен қатар шетелдік тыңдаушылар да білім алады.
Қазіргі геосаяси жағдайда мұндай мамандарды даярлау ұлттық қауіпсіздікті қамтамасыз етудің маңызды бағыттарының бірі болып саналады. Сондықтан бүгін диплом алған түлектердің қатарынан ертең Қазақстан армиясының жаңа буын әскери басшылары шығуы әбден мүмкін.
