Қазақстан Республикасының Премьер-министрі Олжас Бектенов Еуразия даму банкі (ЕАДБ) кеңесінің отырысын өткізіп, онда банктің 2025 жылғы қызметінің қорытындылары шығарылып, 2027–2031 жылдарға арналған жаңа даму стратегиясы бекітілді, деп хабарлайды DKNews.kz.
Үкімет басшысы биыл Еуразия даму банкіне 20 жыл толғанын атап өтіп, осы уақыт ішінде қаржы институты қатысушы мемлекеттердің экономикалық дамуына елеулі үлес қосқанын айтты.
ЕАДБ инвестициясының көлемі 64 млрд доллардан асты
Бүгінде Еуразия даму банкі жеті мемлекетті біріктіреді.
2025 жылдың қорытындысы бойынша:
- банктің инвестициялық портфелінде жалпы құны 19,6 млрд доллар болатын 326 жоба бар;
- серіктестердің қаржысын қоса есептегендегі жалпы инвестиция көлемі 64 млрд доллардан асты;
- өткен жылы банк 2,6 млрд доллар көлемінде инвестиция салды.
Қаржыландырудың негізгі бөлігі энергетика, көлік-логистика және химия өнеркәсібі жобаларына бағытталды.
Қазақстанға тиесілі үлес – 65 пайыз
ЕАДБ басқарма төрағасы Николай Подгузовтың айтуынша, банктің қазіргі инвестициялық портфеліндегі Қазақстанның үлесі 4,2 млрд долларды немесе 65 пайызды құрайды.
Қазіргі уақытта елімізде банктің қатысуымен:
- 46 инвестициялық жоба жүзеге асырылып жатыр;
- 2022–2026 жылдары Қазақстан экономикасына 5,2 млрд доллар инвестиция бағытталды.
Бұл көрсеткіш алдыңғы 15 жылда тартылған инвестиция көлемімен шамалас.
Жаңа стратегияның басымдықтары айқындалды
Кеңес отырысында 2027–2031 жылдарға арналған жаңа даму стратегиясы бекітілді.
Құжатқа сәйкес басым бағыттар:
- көлік-логистика кешенін дамыту;
- жоғары қайта өңдеу өнеркәсібін қаржыландыру;
- ірі инвестициялық жобаларға халықаралық капитал тарту.
Жаңа стратегия экономикалық кооперацияны кеңейтуге, инвестициялық белсенділікті арттыруға және қатысушы елдердің тұрақты экономикалық өсіміне серпін беруге бағытталған.
Олжас Бектенов қайтадан кеңес төрағасы болып сайланды
Отырыс қорытындысында бірқатар ұйымдастырушылық шешімдер қабылданды.
Кеңес мүшелерінің ұсынысымен:
- Олжас Бектенов қайтадан ЕАДБ кеңесінің төрағасы болып сайланды;
- ҚР Қаржы министрі Мәди Такиев кеңес төрағасының орынбасары болып қайта тағайындалды;
- 2026 қаржы жылына сыртқы аудитор ретінде KPMG компаниясы бекітілді.
Алматыда ЕАДБ-ның 20 жылдығына арналған форум өтті
Алматыда банктің 20 жылдығына арналған «Еуразия 2030+: инвестициялар, өсу және жаңа мүмкіндіктер» бизнес-форумы ұйымдастырылды.
Форум қатысушыларына жолданған алғысөзінде Олжас Бектенов Еуразия кеңістігінің сауда, технология және жаңа экономикалық өсім бағытында зор әлеуетке ие екенін атап өтті.
«Президент Қасым-Жомарт Кемелұлы Тоқаевтың Әділетті әрі Прогрессивті Қазақстанды құруға, заң үстемдігін нығайтуға, кәсіпкерлікті дамытуға және адами әлеуетті ашуға бағытталған стратегиялық бастамасы инвесторлардың сеніміне, экономиканы жаңғыртуға және халықаралық әріптестікті кеңейтуге берік негіз қалыптастырады. Бүгінде Қазақстанмен ынтымақтастық инвесторлар үшін бірлескен жобаларды жүзеге асыруда үлкен мүмкіндіктер ашуда. Шетелдік инвестициялар үшін «ашық есік» саясаты елдің стратегиялық басымдығы болып қала береді. Оның берік негізі меншік құқығының кепілдіктерін, кәсіпкерлік қызмет еркіндігін, адал бәсекелестік пен барлығының заң алдындағы теңдігін бекітетін Қазақстан Республикасының жаңа Конституциясының ережелері болып саналады. Бұл принциптер инвесторлар үшін маңызды әрі бизнесті жүргізу, инвестицияларды қорғау және ұзақмерзімді жобаларды жүзеге асыру үшін жағдайларды дәйекті түрде жақсартуға мүмкіндік береді», — делінген Олжас Бектеновтің алғысөзінде.
