Ақмола облысындағы Щучинск қаласында өткен XII Халықаралық «Айбын-2026» әскери-патриоттық жастар жиыны өз мәресіне жетті, деп хабарлайды DKNews.kz.
Бір апта бойы мыңға жуық жас төзімділік пен қайсарлықты сынға салып, әскери дайындық пен көшбасшылық қабілеттерін дәлелдеді. Ал финалда жеңімпаздардың есімі жарияланып, аспанды дрондар шоуы жарыққа бөледі.
Биылғы «Айбын» бұрынғыдан да ауқымды өтті. Щучинск қаласына Қазақстанның түкпір-түкпірінен және шет мемлекеттерден келген 52 команда құрамындағы мыңға жуық жас жиналды. Олар бір апта бойы Шоқан Уәлиханов атындағы Әскери колледждің «Амандық» оқу полигонында өзара бақ сынасты.
Жастар әскери-қолданбалы дайындық, тактикалық ойындар, күш пен төзімділікті талап ететін жарыстар, зияткерлік сайыстар мен шығармашылық байқауларда өз мүмкіндіктерін көрсетті. Әр кезеңде командалық үйлесім, батылдық және шешім қабылдау қабілеті ерекше бағаланды.
Жиынның жабылу салтанатына Қорғаныс министрлігінің, жергілікті атқарушы органдардың және ардагерлер ұйымдарының өкілдері қатысты.
Қорғаныс министрінің тәрбие және идеологиялық жұмыс жөніндегі орынбасары генерал-майор Асқар Мұстабеков жастарды жарыстың табысты аяқталуымен құттықтап, жобаның жыл сайын маңызы артып келе жатқанын атап өтті.
«Айбын» жиынының жыл сайын ауқымы кеңейіп, халықаралық ынтымақтастықты нығайтуға, тәжірибе алмасуға және Отан қорғаушылардың жаңа буынын тәрбиелеуге ықпал ететін маңызды алаңға айналды.
Бас жүлде кімге бұйырды?
Биылғы XII Халықаралық «Айбын-2026» жиынының Гран-приін Сағадат Нұрмағамбетов атындағы Әскери колледждің командасы жеңіп алды.
Халықаралық санаттағы жарыста Қазақстан құрамасы бірінші орынды иеленді. Екінші орын Өзбекстан командасына бұйырса, үшінші орынды Әзербайжан, Қырғызстан және Ресей құрамалары өзара бөлісті.
Өзге номинациялар бойынша жеңімпаздар:
- Қарулы Күштердің, басқа да әскерлер мен әскери құралымдардың әскери-патриоттық клубтары арасында – «Оңтүстік арландары»;
- Облыстар мен республикалық маңызы бар қалалар арасында – Жетісу облысының «Жетісу тарландары» әскери-патриоттық клубы;
- Әскери колледждер мен облыстық мамандандырылған әскери мектеп-интернаттар арасында – Шымкент қаласындағы Сабыр Рахымов атындағы Әскери колледж.
Дрондар шоуы мен «Айбын жалыны»
Жарыстың соңғы кеші ерекше атмосферада өтті. «Амандық» полигонының аспанын жүздеген шамнан құралған дрондар шоуы безендіріп, кейін дәстүрлі «Айбын жалыны» алауы жағылды.
Алау маңына жиналған қатысушылар бір апталық жиыннан алған әсерлерімен бөлісіп, жаңа достарымен қоштасты. Көпшілігі үшін бұл жарыс тек жеңіс үшін талас емес, түрлі елден келген жастармен тәжірибе алмасып, өмірлік естеліктер жинаған ерекше мектепке айналды.
Бір аптаға созылған халықаралық жиын тағы бір маңызды шындықты көрсетті: әскери-патриоттық тәрбие бүгінде тек әскери машықпен шектелмейді. Ол жастардың көшбасшылық қасиетін дамытып, жауапкершілік сезімін күшейтіп, мемлекеттер арасындағы достық пен өзара сенімді нығайтатын маңызды алаңға айналып келеді.
