Шымкент тағы бір мәрте әскери-патриоттық тәрбиенің мықты мектебі екенін дәлелдеді.
XII халықаралық «Айбын-2026» жастар жиынында жоғары нәтиже көрсеткен қала жастары туған жеріне жеңіспен оралып, теміржол вокзалында салтанатты түрде қарсы алынды, деп хабарлайды DKNews.kz.
Бұл тек жүлде ғана емес, жас буынның тәртібі, табандылығы мен Отанға деген адалдығын айқындаған жеңіс болды.
Шымкент теміржол вокзалында ерекше көңіл күй орнады. Мұнда Ақмола облысының Щучинск қаласында өткен XII халықаралық әскери-патриоттық жастар жиыны «Айбын-2026» додасында үздік нәтиже көрсеткен Сабыр Рахымов атындағы әскери колледждің курсанттары мен қалалық «Сұңқар» әскери-патриоттық клубының мүшелерін жақындары, ұстаздары, әскери қызметшілер мен ардагерлер зор құрметпен қарсы алды.
Әскери оркестрдің әуенімен өткен салтанатты рәсім жас сарбаздардың еңбегіне көрсетілген ерекше құрметтің белгісіне айналды.
Шымкенттің қос жеңісі
Биылғы халықаралық жарыс шымкенттіктер үшін табысты болды.
Әскери мектеп-лицейлер мен әскери оқу орындары арасындағы жарыста Сабыр Рахымов атындағы әскери колледж жалпыкомандалық есепте І орынды жеңіп алды.
Ал өңірлер мен республикалық маңызы бар қалалардың әскери-патриоттық клубтары арасында бақ сынаған «Сұңқар» командасы ІІ орынға ие болды.
Қазақстанның түкпір-түкпірінен және шетелден келген ондаған мықты командалардың арасынан суырылып шығу – бірнеше айлық дайындықтың, тәртіптің және командалық бірліктің нәтижесі.
«Қазақстан Республикасына қызмет етемін»
Жеңімпаздардың қуанышын олардың жүзінен-ақ байқауға болатын еді. Сабыр Рахымов атындағы әскери колледждің ұланы Ернұр Өмірәлі бұл жеңістің оңай келмегенін айтты.
«Біз бұл жарыста колледжіміздің намысын қорғап, жүлделі бірінші орынды иелендік. Осы жетістікке жету жолында көптеген спорттық сайыстарда шеберлігімізді көрсетуге тырыстық. Нәтижесінде төрт түрлі конкурс бойынша бірінші орын алып, жалпы командалық есепте алға шығуға мүмкіндік туды. Жарыс өте қызықты өтті, барлық қатысушылар жоғары дайындық деңгейін көрсетті. Бізді туған жерімізде ерекше ықыласпен қарсы алып жатқанына қуаныштымыз. Көңіл-күйіміз керемет. Қазақстан Республикасына қызмет етемін».
«Келер жылы бас жүлдені алуға ниеттіміз»
Қала намысын қорғаған «Сұңқар» әскери-патриоттық клубы да үздіктер қатарынан көрінді.
Шымкент қаласы «Жас сарбаз» әскери-патриоттық қоғамдық қозғалысының төрағасы Еркін Сабит команданың алдағы мақсаты бұдан да биік екенін жеткізді.
«XII халықаралық әскери-патриоттық жастар жиыны "Айбын-2026" сайысында қаламыздың мектептері атынан қатысқан "Сұңқар" командасы жүлделі екінші орын алды. Сайыскерлер 11 түрлі бағдарлама бойынша бақ сынады. Жалпы есепте екінші орынды иелендік. Алған әсеріміз өте керемет. Келер жылы бұдан да жоғары дайындықпен келіп, бас жүлдені алуға ниеттіміз».
Команда мүшесі Асылайым Тәтіш те бұл жеңістің артында үлкен еңбек жатқанын айтты.
«Осындай халықаралық жарыста қаламыздың атынан қатысқаныма өте қуаныштымын. Бұл жетістіктің артында айлар бойы жүргізілген тынымсыз жаттығулар, орасан еңбек пен темірдей тәртіп жатыр. Тәлімгерлерімнің сенімін ақтағаныма қуаныштымын. Келер жылы бұдан да жоғары нәтиже көрсетуге бар күшімді саламын».
Биылғы «Айбынның» басты ерекшелігі
«Айбын» – Қазақстандағы ғана емес, Орталық Азиядағы ең беделді әскери-патриоттық жастар жобаларының бірі. Биылғы жиын Ақмола облысындағы Шоқан Уәлиханов атындағы әскери колледж базасында өтті.
Жарысқа Қазақстанмен қатар Қырғызстан, Өзбекстан, Ресей және Әзербайжаннан келген мыңға жуық жас сарбаз қатысты.
Қатысушылар әскери-қолданбалы, спорттық, шығармашылық және зияткерлік кезеңдер бойынша сынға түсті. Биыл алғаш рет бағдарламаға жүзу және жасанды интеллектіні меңгеру дағдылары енгізіліп, бұл сайыстың заман талабына сай жаңарып келе жатқанын көрсетті.
Сонымен қатар жастар белтемірге тартылу, жалпыәскери қорғаныс жиынтығын уақытқа кию, пневматикалық мылтықпен ату, граната лақтыру, АК-74 автоматын бөлшектеу және жинау, қысқа және ұзақ қашықтыққа жүгіру бойынша шеберліктерін сынады.
Президент қолдау білдірді
Жиынның жабылу рәсіміне Қазақстан Республикасының Президенті арнайы қатысып, жас сарбаздармен жүздесті. Мемлекет басшысы қатысушылармен қол алысып амандасып, естелік суретке түсті.
Бұл кездесу халықаралық додада ел намысын қорғаған жастар үшін ерекше әсер қалдырған маңызды сәттердің біріне айналды.
Бұл жеңіс нені көрсетті?
Шымкент құрамасының жетістігі – жай ғана спорттық немесе әскери нәтиже емес. Бұл жастардың жауапкершілігі, тәртібі, төзімі және елге қызмет етуге деген ұмтылысының нақты дәлелі.
Халықаралық деңгейдегі бәсекеде екі командасының бірдей жүлдемен оралуы Шымкенттегі әскери-патриоттық тәрбиенің жүйелі дамып келе жатқанын көрсетті. Ал бүгін вокзалда өткен салтанатты қарсы алу рәсімі сол еңбектің ел тарапынан лайықты бағаланғанының айқын белгісі болды.
