Астанада өткен «Байтақ» жасылдар партиясының V кезектен тыс съезі елдегі саяси реформаларға қолдау білдіріп қана қоймай, жаңа саяси кезеңге қатысты негізгі ұстанымдарын жариялады.
Партия өкілдерінің айтуынша, жаңа Конституция Қазақстанның саяси жүйесін жаңартудың басты негізіне айналып отыр, деп хабарлайды DKNews.kz.
Елордада Қазақстанның жасылдар партиясы «Байтақтың» V кезектен тыс съезі басталды. Жиынға партия төрағасы Азаматхан Әміртаев, саяси кеңес мүшелері, өңірлік филиалдардың жетекшілері, экологтар, қоғам қайраткерлері мен сарапшылар қатысты.
Съезд аясында еліміздің барлық өңірінен келген делегаттар бір палаталы Қазақстан Республикасы Құрылтайының алдағы сайлауына арналған партияның сайлауалды бағдарламасын қарап, депутаттыққа ұсынылатын кандидаттардың тізімін бекітеді.
Жаңа Конституция – саяси өзгерістердің бастауы
Съезде сөз сөйлеген партия төрағасы Азаматхан Әміртаев кезектен тыс жиынның өткізілуі еліміздегі конституциялық өзгерістермен тікелей байланысты екенін айтты.
«Биыл 1 шілдеден бастап Қазақстан Республикасының жаңа Конституциясы күшіне енді. Мемлекет басшысы Қасым-Жомарт Кемелұлы Тоқаев атап өткендей, жаңа Негізгі заң еліміздің саяси жүйесін түбегейлі жаңғыртудың негізіне айналды. Біздің бесінші кезектен тыс съезіміз де Президенттің осы саяси бағытын қолдау мақсатында ұйымдастырылып отыр», – деді Азаматхан Әміртаев.
Оның айтуынша, съездің күн тәртібіне енгізілген барлық құжаттар алдын ала әзірленіп, делегаттардың қарауына ұсынылған.
Құрылтай сайлауы – жаңа саяси тәжірибе
Партия төрағасы биыл 23 тамызда Қазақстан азаматтары алғаш рет бір палаталы Қазақстан Республикасы Құрылтайының депутаттарын сайлайтынын ерекше атап өтті.
Оның пікірінше, бұл науқан кезекті электоралдық процесс қана емес, елдің саяси дамуындағы маңызды белес болмақ.
«Бұл – жай ғана кезекті сайлау науқаны емес. Бұл – мемлекет тарихындағы жаңа кезеңнің басталуы», – деді Азаматхан Әміртаев.
«Байтақ» қандай мақсат қойып отыр?
Партия съезінде негізгі назар жаңа саяси жүйе жағдайындағы партияның алдағы жұмысына, сайлауалды бағдарламасына және депутаттыққа ұсынылатын кандидаттарға аударылды. Делегаттардың пікірінше, жаңа Конституция аясында қалыптасып жатқан саяси модель қоғамдық институттардың рөлін күшейтіп, азаматтардың шешім қабылдау үдерісіне қатысу мүмкіндігін кеңейтуге бағытталған.
Осы тұрғыда «Байтақ» өз бағдарламасын жаңа саяси реформалардың басымдықтарымен сабақтастырып, алдағы сайлауға дайындықтың негізгі бағыттарын айқындады.
