Астанада өткен кезектен тыс VI Съезде «Байтақ» жасылдар партиясы Құрылтай депутаттығына ұсынылатын кандидаттардың жаңа партиялық тізімін бірауыздан бекітті.
Тізімнің қайта қаралуына бірнеше кандидаттың өз еркімен сайлау додасынан шығу туралы шешімі себеп болған.
13 шілде күні Астанада «Байтақ» жасылдар партиясының кезектен тыс VI Съезі өтті. Елдің барлық 20 өңірінен келген филиал басшылары мен делегаттардың қатысуымен өткен жиында партияның Құрылтай депутаттығына ұсынатын кандидаттар тізімі қайта қаралып, жаңа құрам бекітілді.
Съезге барлығы 67 делегат қатысты. Күн тәртібіндегі басты мәселе – партиялық тізімді заң талаптарына сәйкес қайта бекіту болды.
Партия төрағасы Азаматхан Әміртаев мұның себебін кандидаттар құрамындағы өзгерістермен байланыстырды.
«Өздеріңіз білесіздер, бұған дейін біздің партия Құрылтай депутаттығына 51 кандидаттан тұратын тізімді бекіткен еді. Алайда бұл тізімдегі төрт адам өз еркімен одан шығу туралы шешім қабылдады. Бұл — олардың құқығы. Сонымен қатар, заң тұрғысынан бәрі мінсіз болуы үшін партиялық тізім қайтадан бекітілуге тиіс.»
Төрағаның ұсынысын Съезге қатысқан өңірлік филиалдардың басшылары толық қолдады. Нәтижесінде делегаттар дауыс беру барысында жаңа партиялық тізімді бірауыздан мақұлдады.
Жаңартылған тізімде – 47 кандидат
Бекітілген тізімге барлығы 47 кандидат енгізілді. Олардың қатарында экология саласының мамандары, қоғам қайраткерлері және түрлі бағытта қоғамдық қызметімен танылған азаматтар бар.
Партияның мәліметінше, тізім төрт кандидаттың сайлау науқанына қатысудан ерікті түрде бас тартуын ескере отырып жасақталған. Осылайша құжат қолданыстағы заңнама талаптарына толық сәйкестендірілді.
.jpeg&w=3840&q=75)
Экологиялық күн тәртібіне басымдық
«Байтақ» жасылдар партиясы Қазақстанда 2022 жылғы 30 қарашада ресми тіркелді. Ал партияның құрылтай съезі сол жылдың 24 қыркүйегінде Алматы қаласында өткен.
Партия өз қызметінде экологиялық жауапкершілік, орнықты даму және әлеуметтік әділеттілік қағидаттарына басымдық береді. Сонымен қатар ұйым Мемлекет басшысы Қасым-Жомарт Тоқаев жүргізіп отырған реформалар аясындағы қоғамдық бастамаларды қолдайтынын мәлімдеп келеді.
Бүгінде партияның құрамында 100 мыңнан астам мүше бар. Сондай-ақ оның өкілдері еліміздің әр өңіріндегі түрлі деңгейдегі мәслихаттарда қызмет атқарады.
Кезектен тыс VI Съезде қабылданған шешім партияның Құрылтай сайлауына дайындық кезеңіндегі маңызды саяси қадамдарының бірі болды. Жаңартылған кандидаттар тізімі енді алдағы сайлау науқанында партияның ресми өкілдігі ретінде ұсынылады.
