Қазақстан экономикасындағы белсенділік мемлекеттік қазынаға да оң әсерін тигізді.
Биылғы алғашқы алты айдың қорытындысы бойынша республикалық бюджет кірісі өткен жылдың сәйкес кезеңімен салыстырғанда 24,6%-ға өсіп, 8,5 трлн теңгеге жетті, деп хабарлайды DKNews.kz.
Бұл туралы Үкімет отырысында Қаржы вице-министрі Ержан Біржанов мәлімдеді.
Республикалық бюджет жоспардан асыра орындалды
Вице-министрдің айтуынша, трансферттерді есепке алмағанда республикалық бюджеттің кірісі 8,5 трлн теңгені құрап, жоспар 100,6%-ға орындалған.
Өткен жылдың бірінші жартыжылдығымен салыстырғанда мемлекет кірісі 1,7 трлн теңгеге көбейген. Бұл – 24,6%-дық өсім.
Сонымен қатар:
- салық түсімдері – 8,3 трлн теңге;
- жоспардың орындалуы – 100,3%;
- бір жылдағы өсім – 29% немесе 1,9 трлн теңгеден астам.
Неге кіріс көбейді?
Қаржы министрлігі өсімнің бірнеше негізгі себебін атады.
Біріншіден, әлемдік нарықтағы негізгі экспорттық тауарлардың бағасы көтерілді.
Екіншіден, сыртқы сауда көлемі ұлғайып келеді.
Үшіншіден, электрондық шот-фактура жүйесі арқылы тіркелген сату айналымы 12%-ға өсіп, 10,8 трлн теңгеге жеткен.
Мұнымен қатар көлеңкелі экономиканы қысқарту бағытындағы жұмыстар да нәтиже бере бастаған.
546 мың адам заңдастырылды
Алты ай ішінде бұрын салық органдарында тіркелмеген 546 мыңға жуық жеке тұлға ресми есепке қойылған.
Өзін-өзі жұмыспен қамтығандарды қоса есептегенде, еліміздегі бизнес субъектілерінің саны 2,9 млн-ға жетті. Жыл басынан бері олардың қатары тағы 499 мыңнан астам субъектіге көбейген.
Ал ҚҚС төлеушілерінің саны 22,3 мыңға артып, 158,2 мыңға жетті.
Сондай-ақ:
- «Халық бухгалтері» акциясы аясында 61 мыңнан астам салық төлеуші кеңес алған;
- «Таза парақ» бастамасы бойынша 19 мың шағын және микробизнес субъектісінің 9,3 млрд теңге көлеміндегі өсімпұлы мен айыппұлы есептен шығарылған.
Кеден жаңғыртылды: түсім 400 млрд теңгеге артты
Өткізу бекеттерін жаңғырту да бюджет кірісіне айтарлықтай әсер еткен.
Өткен жылмен салыстырғанда жаңартылған шекара бекеттері арқылы өткен автокөліктер саны 18%-ға өсіп, шамамен 900 мыңға жеткен.
Соның нәтижесінде кедендік төлемдер көлемі 2,4 трлн теңгені құрап, бір жыл ішінде 400 млрд теңгеден астамға немесе шамамен 20%-ға көбейген.
«Өткен жылдың осындай кезеңімен салыстырғанда жаңғыртылған өткізу пункттері арқылы автокөлік құралдарының нақты ағыны 18%-ға өсіп, шамамен 900 мыңға жетті. Бұл өсім қазірдің өзінде фискалдық нәтиже беруде. Кедендік төлемдердің көлемі 2,4 трлн теңгеге жетті. Өткен жылдың осындай кезеңімен салыстырғанда өсім 400 млрд теңгеден астам немесе шамамен қосымша 20%-ды құрады. Осылайша, өткізу пункттерін жаңғырту бюджетке түсетін түсімдерді арттырды, адал бизнес үшін жағдайды жақсартты және елдің транзиттік мүмкіншілігін арттырады. Біздің міндетіміз — жасанды интеллект элементтерін енгізумен кедендік процестерді цифрландыру жұмыстарын жалғастыру», — деді Ержан Біржанов.
Мемлекеттің әлеуметтік міндеттемелері толық орындалды
Қаржы министрлігінің мәліметінше, бірінші жартыжылдықта барлық әлеуметтік төлемдер уақытында қаржыландырылған.
Бюджет қаражатының негізгі бөлігі мына бағыттарға жұмсалды:
- 3,6 трлн теңге – зейнетақылар мен жәрдемақыларға;
- 3 трлн теңге – өңірлерге берілетін субвенцияларға;
- 1,3 трлн теңгеге жуық – экономиканың нақты секторын қолдауға.
Сонымен бірге мемлекеттік бюджет шығыстары 98,2%-ға, ал республикалық бюджет шығыстары 99,6%-ға орындалған.
Мемлекеттік аудит күшейтілуде
Жыл басынан бері жалпы көлемі 1,8 трлн теңгені қамтитын 541 аудиторлық іс-шара жүргізілген.
Нәтижесінде:
- 456 млрд теңге көлемінде қаржылық бұзушылық анықталды;
- оның 318 млрд теңгеден астамы жойылған.
Қазір Қаржы министрлігі мемлекеттік аудитті толық цифрландыруды жалғастырып жатыр. Осы мақсатта SMART AUDIT QAZAQSTAN бірыңғай талдамалық платформасы әзірленуде.
Сонымен қатар әлеуметтік саладағы бақылау да күшейіп келеді. Бүгінде мемлекеттік және жекеменшік мектептердің 78%-ы цифрлық бақылау жүйесіне қосылған. Ал Әлеуметтік медициналық сақтандыру қоры қаржыландыратын медициналық ұйымдардың 100%-ы Qalqan бірыңғай порталы арқылы жұмыс істейді.
