Бұршақ, дауыл және +42°C: 22–23 шілдеге болжам

Ауа райы күрт өзгереді.

22 және 23 шілдеде Қазақстанның басым бөлігінде жаңбыр жауып, найзағай ойнайды, бұршақ пен дауыл күтіледі. Ал елдің батысында ауа температурасы +42 градусқа дейін көтеріледі, деп хабарлайды DKNews.kz.

Мұндай болжамды «Қазгидромет» мамандары ұсынды. Ең үлкен температуралық айырмашылық салқын Павлодар облысы мен аптап ыстық орнайтын Маңғыстау өңірі арасында байқалады.

Қай өңірде ауа температурасы +42 градусқа жетеді?

Маңғыстау облысы аптап ыстықтың негізгі ошағына айналады. Күндіз ауа +37…+42 градусқа дейін қызады, өңірдің батысында шамамен +32 градус күтіледі.

«Ауа температурасы түнде +20…+25, 23 шілдеде +23…+28 градус болады. Күндіз қатты ыстық сақталып, ауа +37…+42 градусқа дейін қызады, облыстың батысында +32 градус күтіледі».

Ыстық ауа райы найзағаймен қатар жүреді. 22 шілдеде облыстың солтүстігі мен шығысында жаңбыр жауып, күндіз бұршақ түсуі мүмкін, желдің екпіні секундына 15–20 метрге жетеді.

Атырау облысында +34…+39 градус ыстық болжанып отыр. 22 шілдеде өңірдің оңтүстігі мен шығысында жаңбыр жауып, найзағай ойнайды және бұршақ түсуі ықтимал.

Батыс Қазақстан облысында да қатты ыстық сақталады. 22 шілдеде температура +30…+35, оңтүстікте +38 градус болса, 23 шілдеде +34…+39 градусқа дейін көтеріледі.

Қазақстанның солтүстігін нөсер жаңбыр басады

Солтүстік облыстарда ауа райы мүлдем басқа сипат алады. Температура төмендегенімен, қауіпті метеорологиялық құбылыстардың қаупі күшейеді.

Ақмола облысында жаңбыр жауып, найзағай ойнайды. Өңірдің солтүстігі мен шығысында қатты жаңбыр, күндіз бұршақ пен дауыл күтіледі.

Күндіз ауа температурасы +20…+25, батысы мен оңтүстігінде +28 градус болады. Солтүстік-шығыстан соққан желдің екпіні секундына 15–20 метрге жетеді.

Солтүстік Қазақстан облысында 22 шілдеде қатты жаңбыр, найзағай, бұршақ және дауыл болжанып отыр. Қолайсыз ауа райы 23 шілдеде де сақталып, түнде және таңертең өңірдің батысы мен солтүстігін тұман басады.

Күндіз ауа +23…+28, ал 23 шілдеде +25…+30 градусқа дейін жылынады.

Қостанай облысының солтүстігінде, шығысында және оңтүстігінде жаңбыр жауып, найзағай ойнайды, бұршақ түседі. Температура +23…+28, 23 шілдеде +25…+30, оңтүстікте +33 градус болады.

Павлодар облысында ең салқын ауа райы күтіледі

Күндізгі ең төмен температураның бірі Павлодар облысында тіркеледі — +21…+26 градус.

Екі күн бойы жаңбыр жауады. Кей аудандарда нөсер жаңбыр, найзағай, бұршақ және секундына 20 метрге дейін жететін екпінді жел күтіледі.

Павлодар мен Маңғыстау облыстарындағы ең жоғары температураның айырмашылығы 20 градустан асуы мүмкін.

Елдің орталығынан найзағайлы фронт өтеді

Қарағанды облысында 22 және 23 шілдеде жаңбыр жауып, найзағай ойнайды. Өңірдің батысы, солтүстігі мен шығысында қатты жаңбыр, күндіз бұршақ және дауыл күтіледі.

Ауа температурасы +22…+27, облыстың оңтүстігінде +32 градус болады.

Ұлытау облысында да осыған ұқсас ауа райы қалыптасады. Қатты жаңбыр, найзағай, бұршақ және екпінді жел болжанып отыр, күндіз ауа +22…+27 градусқа дейін жылынады.

23 шілдеде түнде және таңертең Ұлытау облысының батысы мен солтүстігін тұман басады.

Шығыста жел секундына 25 метрге дейін күшейеді

Шығыс Қазақстан облысында 22 шілдеде солтүстік пен шығыста қатты жаңбыр жауады. Келесі күні нөсер облыстың батыс, солтүстік және шығыс аудандарын қамтиды.

Найзағай бұршақ және дауылмен қатар жүреді. Желдің жылдамдығы кей сәтте секундына 25 метрге дейін жетеді.

Күндіз ауа температурасы +27…+32, шығыста шамамен +22 градус болады. Облыстың оңтүстігінде ауа +35 градусқа дейін қызады.

Абай облысында да жаңбыр, найзағай және бұршақ күтіледі. Күндіз +27…+32, оңтүстікте +35 градус болады, желдің екпіні секундына 25 метрге жетуі мүмкін.

Жетісу облысында желдің жылдамдығы секундына 23–28 метрге дейін күшейеді. Таулы аудандарда қатты жаңбыр, бұршақ және дауыл күтіледі, күндіз ауа +28…+33, тауда шамамен +23 градус болады.

Қазақстанның оңтүстігінде жаңбыр мен ыстық қатар жүреді

Түркістан облысында 22 шілдеде ауа температурасы +30…+35, таулы аудандарда шамамен +25 градус болады. Келесі күні температура +27…+32 градусқа дейін төмендейді.

Өңірдің оңтүстігі мен таулы аймақтарында қатты жаңбыр жауады. Найзағай, бұршақ, дауыл және секундына 20 метрге дейін жететін жел болжанып отыр.

Қызылорда облысында нөсер жаңбыр батыс, солтүстік және орталық аудандарды қамтиды. Күндіз ауа температурасы +28…+33, оңтүстікте +36 градусқа жетеді.

Жамбыл облысында да найзағай ойнайды. Таулы аудандарда қатты жаңбыр жауып, желдің екпіні секундына 25 метрге дейін күшейеді.

22 шілдеде ауа температурасы +30…+35 градус болады. Келесі күні +28…+33 градус күтіледі.

Алматы облысының оңтүстігі мен таулы аудандарында қатты жаңбыр жауады. Күндіз температура +27…+32, тауда +18…+23 градус болады.

Ақтөбе облысында ауа райы қандай болады?

Ақтөбе облысының солтүстігі мен шығысында жаңбыр жауып, найзағай ойнайды. Күндіз бұршақ пен дауыл күтіледі, ал түнде және таңертең батыс пен солтүстік аудандарды тұман басады.

Ауа температурасы +28…+33 градусқа жетеді. 23 шілдеде кей аудандарда +30…+35 градус қатты ыстық орнайды.

Найзағай мен дауыл кезінде жүргізушілер көріну қашықтығының төмендеуін және қатты бүйірлік желді ескергені жөн. Температура +39…+42 градусқа жететін өңірлердің тұрғындарына күндіз далада ұзақ жүрмеу ұсынылады.