Қаржы нарығын реттеу және дамыту агенттігі өз қызметіне қатысты таралған ақпараттың шындыққа сәйкес келмейтінін мәлімдеді.
Ведомство бұқаралық ақпарат құралдарының сауалдарына жауап бере отырып, өз құзыретіне кіретін және кірмейтін мәселелерді нақты түсіндірді, деп хабарлайды DKNews.kz.
Сонымен қатар Агенттік микроқаржы ұйымдарын бақылау, азаматтардың борыштық жүктемесін азайту және қаржылық алаяқтықпен күрес бағытындағы жұмыстың нәтижелерін жариялады.
Бірыңғай банкаралық QR-кодты Агенттік реттемейді
Агенттік Бірыңғай банкаралық QR-кодқа қатысты таралған ақпараттың шындыққа жанаспайтынын мәлімдеді.
«Қазақстан Республикасының Ұлттық Банкі туралы» заңға сәйкес QR-кодтың жұмыс істеуі мен төлем жүйелерін реттеу мәселелері Қазақстан Республикасы Ұлттық Банкінің құзыретіне жатады.
Сондай-ақ Агенттік банкаралық эквайринг комиссияларын белгілемейді және төлем жүйелерінің тарифтік саясатын реттемейді.
Ведомство азаматтарды тек ресми ақпарат көздеріне сенуге шақырды.
Микроқаржы ұйымдары тұрақты бақылауда
Агенттік микроқаржы ұйымдарының қызметіне тұрақты түрде қадағалау жүргізетінін атап өтті.
2021 жылдан бері заң талаптарын бұзғаны үшін:
- 127 микроқаржы ұйымының лицензиясы қайтарылды;
- 135 коллекторлық агенттік қызметін тоқтатты;
- 2024–2026 жылдары ғана 55 микроқаржы ұйымы мен 29 коллекторлық агенттік лицензиясынан айырылды;
- жалпы сомасы 500 миллион теңгеден асатын 1,6 мың әкімшілік айыппұл салынды.
Бұл шаралар қаржы нарығындағы тәртіпті күшейтіп, қарыз алушылардың құқықтарын қорғауға бағытталған.
Ондаған мың қазақстандықтың қарызы жеңілдетілді
Агенттік қабылдаған қадағалау шараларының нәтижесінде 2025 жылы:
- 33,9 мың қарыз алушының негізгі қарызы, сыйақысы, айыппұлы мен өсімпұлы толық немесе ішінара есептен шығарылды;
- 722 мың қарыз алушының берешегі қайта құрылымдалды.
Бұл көптеген азаматтың қаржылық жүктемесін азайтуға мүмкіндік берді.
Несиелердің құны төмендеді
2024 жылы Агенттік пен Ұлттық Банктің бірлескен қаулысымен жылдық тиімді сыйақы мөлшерлемесінің шекті деңгейі төмендетілді.
Атап айтқанда:
- кепілсіз банктік қарыздар мен микрокредиттер бойынша – 56 пайыздан 46 пайызға дейін;
- кепілді қарыздар бойынша – 56 пайыздан 40 пайызға дейін;
- 45 АЕК-ке дейінгі онлайн микрокредиттер бойынша тәуліктік мөлшерлеме 1 пайыздан 0,3 пайызға дейін азайтылды.
Қаржылық алаяқтыққа қарсы күрес қалай күшейтілді
Қаржылық алаяқтықтың алдын алу жұмыстары құқық қорғау органдарымен, Ұлттық Банкпен және қаржы нарығының қатысушыларымен бірлесіп жүргізіледі.
Бұл бағытта Ұлттық Банктің Антифрод орталығы нақты уақыт режимінде қаржы ұйымдары мен мемлекеттік органдар арасында ақпарат алмасуды қамтамасыз етеді.
2025 жылдың басынан бері:
- 68 миллиард теңгеден астам сомаға қатысты 163 мыңнан астам алаяқтық операцияның жолы кесілді;
- 28,9 миллиард теңгеден астам сомаға алаяқтық операциялар бұғатталды.
Азаматтарды қорғайтын жаңа тетіктер
Заңнамалық деңгейде алаяқтық жолмен рәсімделетін несиелердің алдын алуға бағытталған бірқатар шаралар енгізілді.
Олардың қатарында:
- міндетті биометриялық сәйкестендіру;
- онлайн несиелерге салқындату кезеңі;
- алғашқы несиені алу кезінде міндетті жеке қатысу;
- тергеу кезеңінде алаяқтық несие бойынша сыйақы есептеуге тыйым салу;
- алаяқтық несиелерді сотқа дейін және сот арқылы есептен шығарудың қосымша негіздерін енгізу.
Соның нәтижесінде 2025 жылы банктер мен микроқаржы ұйымдары азаматтардың жалпы сомасы 1,9 миллиард теңгені құрайтын 1,6 мың алаяқтық несиесін есептен шығарды.
Агенттік қабылданып жатқан шаралар туралы ақпарат жыл сайынғы есептерде және ай сайынғы шолуларда тұрақты түрде жарияланып отыратынын атап өтті.
