Қазақстанда болашақ әскери инженерлер тек аудиторияда білім алып қана қоймай, қауіпсіздік саласына арналған нақты технологияларды өздері әзірлеп жатыр, деп хабарлайды DKNews.kz.
Радиоэлектроника және байланыс әскери-инженерлік институтының курсанттары ұсынған жаңа жобалар бүгінгі заманның өзекті мәселелеріне – ұшқышсыз ұшу аппараттарына қарсы іс-қимылға және стратегиялық нысандардағы қауіпсіздікті күшейтуге бағытталған.
Қазіргі әскери технологиялар күн сайын өзгеріп жатқан кезде инженерлік ойлау мен практикалық тәжірибе бұрынғыдан да маңызды. Институтта курсанттар алғашқы курстардан бастап ғылыми-зерттеу және жобалау жұмыстарына тартылып, теориялық білімдерін нақты инженерлік шешімдерге айналдыруға мүмкіндік алады.
Дрондарға қарсы ықпал ету құрылғысы
Институттың 3-курс курсанты Шыңғысхан Шынтемиров радиоэлектрондық ықпал етуге арналған шағын көлемді құрылғы әзірледі. Жоба басқару және байланыс арналарын басуға, радиоэлектрондық кедергілер жасауға және ұшқышсыз ұшу аппараттарына қарсы әрекет етуге арналған.
Құрылғы Wi-Fi желілерінің жұмысын бұғаттай алады және арнайы міндеттерді орындау барысында пайдалануға мүмкіндік береді. Мұндай шешімдер қазіргі қауіпсіздік саласында ерекше маңызға ие болып отыр, өйткені ұшқышсыз ұшу аппараттарының қолданылу аясы жылдан-жылға кеңейіп келеді.
Көліктің астын бірнеше секундта тексеруге мүмкіндік береді
Тағы бір қызықты жобаның авторы – курсант Василий Копильцев. Ол әзірлеген Under Car Vision жүйесі автокөліктердің астыңғы бөлігін жылдам әрі сапалы тексеруге арналған.
Жүйе ауа райының кез келген жағдайында анық визуалды бақылауды қамтамасыз етеді. Құрылғы электр желісінен де, аккумулятордан да жұмыс істейді. Бұл оны тұрақты бақылау-өткізу бекеттерінде ғана емес, көшпелі тексерулер кезінде де тиімді пайдалануға мүмкіндік береді.
Мұндай технологиялар әскери нысандарда, маңызды инфрақұрылым объектілерінде және қауіпсіздік қызметтерінің күнделікті жұмысында қолданылуы мүмкін.
«Инженер жаңа шешім ұсына білуі керек»
Радиоэлектрондық барлау және радиоэлектрондық күрес кафедрасының аға оқытушысы, жоба жетекшісі подполковник Александр Кушнаревтің айтуынша, қазіргі әскери инженер үшін дайын технологияны меңгеру жеткіліксіз.
«Бүгінде инженер тек қолданыстағы технологияларды меңгеріп қана қоймай, нақты міндеттерге сай жаңа шешімдер әзірлей білуі қажет. Сондықтан біз курсанттарды алғашқы курстан бастап ғылыми-зерттеу және жобалау жұмыстарына тартамыз. Өз жобаларымен жұмыс істеу олардың инженерлік ойлау қабілетін дамытып, талдау жасауға, тәжірибе жүргізуге және тың шешімдер табуға үйретеді. Дәл осындай құзыреттер болашақ офицерлердің кәсіби дамуының негізін қалыптастырып, қазіргі қауіпсіздік саласындағы сын-қатерлерге тиімді жауап беруге мүмкіндік береді», – деді ол.
Ғылым мен әскери дайындық қатар жүреді
Радиоэлектроника және байланыс әскери-инженерлік институтында ғылыми әлеуетті дамыту оқу процесінің маңызды бөлігіне айналған. Курсанттар инженерлік жобалар арқылы конструкторлық қабілеттерін жетілдіріп, тәжірибелік міндеттерді шешуге машықтанады.
Институтта жасалған ғылыми әзірлемелер салалық көрмелерде, ғылыми-практикалық конференцияларда және түрлі байқауларда тұрақты түрде таныстырылып келеді. Бұл жас әскери инженерлердің кәсіби дайындығының жоғары деңгейін ғана емес, олардың инновациялық әлеуетін де көрсетеді.
Бүгінгі қауіпсіздік саласы тек әскери дайындықпен шектелмейді. Ол жаңа технологияны түсінетін, оны әзірлей алатын әрі нақты жағдайда қолдануға бейім инженерлерді талап етеді. Ал институт курсанттарының соңғы жобалары Қазақстанда осындай мамандардың қалыптасып келе жатқанын аңғартады.
