Экологиялық бастама кеңейіп келеді.
«Таза Қазақстан» аясындағы «Мөлдір бұлақ» акциясы мыңдаған адамды біріктіріп, еліміздің ондаған өңірінде бұлақтар мен су айдындарын тазалауға жол ашты, деп хабарлайды DKNews.kz.
Биыл өткен республикалық акцияның екі кезеңінде Қазақстанның барлық өңірінде бұлақтар мен өзен-көл жағалауларын тазалау, абаттандыру және қалпына келтіру жұмыстары жүргізілді. Жоба Мемлекет басшысының «Таза Қазақстан» бастамасы аясында ұйымдастырылды.
Екі кезеңде жүзге жуық бұлақ тазартылды
Акцияның алғашқы кезеңі 23 наурызда, екіншісі 11 шілдеде өтті.
Нәтижесінде Алматы, Ақмола, Ақтөбе, Атырау, Шығыс Қазақстан, Жамбыл, Батыс Қазақстан, Қарағанды, Қостанай, Қызылорда, Маңғыстау, Павлодар, Солтүстік Қазақстан, Түркістан, Абай, Жетісу, Ұлытау облыстары мен Шымкент қаласында 94 бұлақ және 62 су нысаны тазартылды.
Акцияға 23,7 мыңнан астам адам қатысып, олардың шамамен 3 мыңы ерікті ретінде атсалысты.
«Болашақтың қайнары» атты жаңа еріктілер қозғалысы құрылды
«Мөлдір бұлақ» акциясының маңызды нәтижелерінің бірі – су саласындағы алғашқы еріктілер қозғалысы «Болашақтың қайнарының» құрылуы болды.
Қозғалыстың негізгі мақсаты – жастар арасында экологиялық мәдениетті қалыптастыру және су ресурстарын қорғауға деген жауапкершілікті күшейту.
Алғашқы құрамына Тараз қаласындағы Қазақ ұлттық су шаруашылығы және ирригация университетінің студенттері енді. Қазір бұл бастама еліміздің басқа өңірлерінде де жалғасып жатыр.
Қозғалыс мүшелері өз күштерімен қосымша тағы 5 бұлақ пен 6 су айдынының жағалауын тазартты. Бұл жұмыстарға негізінен жастардан құралған 3 мыңнан астам адам қатысты.
Өңірлердегі экологиялық бастамалар жалғасуда
«Мөлдір бұлақ» акциясы ресми кезеңдермен ғана шектелген жоқ.
Сәуір айында Қостанай облысында колледж студенттері мен оқытушылары Тобыл өзенінің жағалауын және оған іргелес аумақтарды тазалады.
Мамыр айында Ақтөбе су қоймасының аумағынан 2 тоннадан астам тұрмыстық қалдық шығарылды.
Сол кезеңде Балқаш-Алакөл бассейндік инспекциясы «Алма-Арасан» шатқалындағы бұлақ аумағын қоқыстан тазартты.
Ал Қостанай облысында өткен тағы бір сенбілік барысында Тобыл өзенінің жағалауынан 3 тонна қоқыс жиналды.
Экологиялық мәдениетке жаңа серпін
Су ресурстары және ирригация вице-министрі Талғат Момышев акцияның қоғамдағы экологиялық жауапкершілікті арттыруға ықпал еткенін атап өтті.
«Қысқа уақыт ішінде «Мөлдір бұлақ» акциясы азаматтардың экологиялық мәдениетін қалыптастыруға елеулі үлес қосып, бұлақтардың табиғат үшін маңызын кеңінен насихаттай алды. Еліміздің түкпір-түкпіріндегі қазақстандықтар бұл бастаманы белсенді қолдап, өз күштерімен бұлақтардың көзін ашу және қалпына келтіру, қоқыс тазалау, көшет отырғызу жұмыстарын ұйымдастыра бастады. Акцияда су ресурстарын сақтауға бейжай қарамайтын жастарға ерекше мән берілді. Сондай-ақ мұндай іс-шаралардың бастамашысы әрі ұйымдастырушысы болып жүрген аға буын өкілдерінің еңбегін де ерекше атап өткен жөн», – деді Су ресурстары және ирригация вице-министрі Талғат Момышев.
Неліктен бұл маңызды
«Таза Қазақстан» бастамасы бүгінде бір реттік сенбіліктен әлдеқайда ауқымды қоғамдық қозғалысқа айналып келеді. «Мөлдір бұлақ» акциясы табиғатты тазартумен қатар, жастарды еріктілікке тартуға, жергілікті қауымдастықтардың белсенділігін арттыруға және су ресурстарын қорғау мәдениетін қалыптастыруға нақты үлес қосып отыр.
