Қазақстандағы сайлауалды науқан бұрынғыдан өзгеше сипат ала бастады.
Биыл саяси партиялар тек концерт залдары мен мәдениет үйлерінде ғана емес, қоғамдық көлікте, өндіріс орындарында, жоғары оқу орындарында, тіпті әлеуметтік желілерде де сайлаушылармен кездесіп жүр, деп хабарлайды DKNews.kz.
Үгіт-насихаттың форматы өзгергенімен, халықты алаңдататын мәселелер өзгерген жоқ: жұмыс, жалақы, инфрақұрылым, экология, білім және өңірлердің дамуы.
Партиялардың соңғы күндердегі белсенділігіне қарағанда, негізгі бәсеке енді бағдарламалардың мазмұнымен қатар, оны халыққа қалай жеткізе алатынында болып отыр.
Қоғамдық көлік жаңа саяси алаңға айналды
Биылғы науқанның ерекшеліктерінің бірі – дәстүрлі кездесулерден тыс форматтардың көбеюі.
Мәселен, Павлодарда «Әділет» партиясының кандидаттары қала тұрғындарымен трамвай ішінде кездесіп, күнделікті жол жүруді ашық пікірталас алаңына айналдырды. Ал партияның «Әділетті Қазақстан үшін» мобильді керуені бірнеше өңірді аралап, көшпелі кездесулер өткізді.
Жетісу облысында ұйымдастырылған «Әділет желкені» акциясы қоғамдық бірлікті нығайтуға бағытталса, партия атынан Құрылтай депутаттығына кандидат Екатерина Смышляева сайлауалды бағдарламаны түсіндірудің мүлде басқа тәсілін таңдады. Ол жұмыс сапарлары кезінде көлік тізгінінде отырып түсірілген қысқа видеолар арқылы бағдарламаның негізгі бағыттарын қарапайым тілмен түсіндіріп келеді. Алғашқы ролик Рудный мен Жітіқара арасындағы сапар барысында жазылған.
Өндіріс орындары – басты назарда
Көптеген партиялар өндіріс ұжымдарымен кездесуге ерекше көңіл бөлді.
Маңғыстау облысында «Әділет» партиясының өкілдері мұнай-газ саласының қызметкерлерімен, теңіз сервистік компанияларының мамандарымен, кәсіподақ мүшелерімен және өндіріс ардагерлерімен жүздесті.
Кездесулер барысында еңбек қауіпсіздігі, порт инфрақұрылымын жаңғырту, Транскаспий халықаралық көлік бағытын дамыту, өнеркәсіпті әртараптандыру, кадр даярлау және цифрлық экономикаға қажетті мамандарды оқыту мәселелері көтерілді. Сонымен қатар Каспий теңізінің экожүйесін сақтау тақырыбы да ерекше назарға алынды.
Жаңаөзендегі жұмысшы жастармен кездесуде жаңа технологияларды енгізу, жаңа өндірістер ашу және адами капиталды дамыту жайы талқыланды.
ЖСДП өндіріс пен білім саласына басымдық берді
Жалпыұлттық социал-демократиялық партия (ЖСДП) Ақмола және Қарағанды облыстарында сайлаушылармен кездесті.
Көкшетауда партия өкілдері Eurasia Group кәсіпорнының еңбек ұжымымен жалақы, еңбек қауіпсіздігі, әлеуметтік кепілдіктер және өңір экономикасын дамыту мәселелерін талқылады.
Ал Қарағандыда өткен кездесуде педагогтер, өңір белсенділері мен тұрғындар білім беру сапасы, әлеуметтік қорғау, жер қатынастары және тең мүмкіндіктер тақырыбында пікір алмасты.
Сонымен бірге Алматыдағы футбол матчында партияның рәміздері бейнеленген киіммен алаңға жүгіріп шыққан азаматтың әрекеті де қоғам назарын аударды. Полиция мәліметінше, ол қоғамдық тәртіпті бұзғаны үшін әкімшілік жауапкершілікке тартылған.
Экология әр өңірде әртүрлі мәселе көтеріп отыр
«Байтақ» партиясы экологиялық күн тәртібін сақтай отырып, әр аймақтың ерекшелігіне сай тақырыптарды көтеріп келеді.
Таразда студенттермен табиғи ресурстарды тиімді пайдалану мен «жасыл» экономиканы дамыту талқыланса, Ақтөбеде тұрғындар сапалы ауызсу, жасыл аймақтардың жетіспеуі және қалалық ортаның жағдайын сөз етті.
Шығыс Қазақстанда негізгі назар самырсын ормандарын қорғауға аударылды.
Ал Алматы облысында партия өкілдері апорт өсіруші бағбандармен кездессе, Жамбыл облысындағы «Қызыл Жұлдыз» тұрғын алабында суару жүйесін жаңарту, қалдықтарды бөлек жинау, қоғамдық кеңістіктерді абаттандыру және электр энергиясындағы үзілістер мәселесі көтерілді.
ҚХП акцияларға басымдық берді
Қазақстан халық партиясы бұл жолы қоғамдық акцияларды көбірек ұйымдастырды.
Алматыда өткен «Мәңгілік классика» мәдени акциясында концерттік бағдарлама тұрғындармен ашық пікірталаспен ұштастырылды.
Партия сондай-ақ Respublica және «Ақ жол» партияларының кеңселері маңында кездесу өткізіп, өз бағдарламасының негізгі бағыттарын таныстырды.
Сонымен қатар ҚХП өкілдері саяси пікірталасқа да белсенді араласты. Партияның сынының негізгі нысаны ЖСДП болды.
Партия мүшесі Бейбіт Құсайынов бұл туралы былай деді:
«Архаика – бұрыннан белгілі бастамаларды өз жаңалығың ретінде көрсету. Зейнет жасын төмендету – дұрыс ұсыныс. Бірақ Қазақстан Халық партиясы бұл мәселені он жылдан астам уақыттан бері көтеріп келеді».
Бұдан бөлек, партия бастамасымен елдің 20 қаласында «Кәне, құшақтасайық!» акциясы ұйымдастырылып, тұрғындарға бір-біріне жылы лебіз білдіру ұсынылды.
«Ауыл» өңірлердің дамуына назар аударды
«Ауыл» партиясының кездесулерінде өңірлерді кешенді дамыту негізгі тақырыптардың біріне айналды.
Қосшы қаласында мәдени-спорт кешенінің қызметкерлерімен өткен кездесуде халық санының жылдам өсуіне байланысты мектеп, медицина, мәдениет, спорт және инженерлік инфрақұрылымды дамыту қажеттігі талқыланды.
Батыс Қазақстан облысында партия активі сайлауалды науқанның басымдықтарын саралады.
Ал партия атынан Құрылтай депутаттығына кандидат Қарақат Әбден сапарларының бірінде туған-туыстарымен бірге таба нан пісіріп, ұлттық дәстүр мен отбасы құндылықтарын дәріптеген бейнеролик жариялады.
Кәсіпкерлермен диалог жалғасып жатыр
«Ақ жол» демократиялық партиясы кәсіпкерлер қауымдастығымен кездесулер сериясын жалғастыруда.
Көкшетауда партия өкілдері NOVOPACK кәсіпорны мен Қазақстан аграрлық-индустриялық корпорациясында болып, өндірісті дамыту, ауыл шаруашылығы машина жасау, шағын және орта бизнес, жұмыспен қамту, инфляция, міндетті әлеуметтік медициналық сақтандыру және зейнетақы жүйесіне қатысты мәселелерді талқылады.
Сонымен қатар кандидаттар Көкшетаудағы №1 сүт зауытының жұмысымен танысып, өндірісті жаңғырту бағыттарын қарастырды.
Ал Алматыда партия өкілдері Magnum компаниясының ұжымымен кездесіп, бағдарламасының негізгі басымдықтарын таныстырды.
Партия сондай-ақ «Өзгерістер жолы» атты онлайн-жобаны іске қосты. Оның аясында Батыс Қазақстан облысының тұрғыны велосипедпен Астанаға жолға шығып, жол бойы тұрғындардың ұсыныс-пікірлерін жинап келеді. Жоба авторы барлық өтінішті елордаға жеткен соң партия өкілдеріне табыстауды жоспарлап отыр.
Respublica жастар мен өндірісті таңдады
Respublica партиясының негізгі кездесулері өндіріс орындары мен жастар аудиториясында өтті.
Кандидаттар «Восток-Молоко», AN Group және «Қазмырыш» кәсіпорындарының еңбек ұжымдарымен кездесіп, өңдеу өнеркәсібі, кәсіпкерлікті қолдау, салық саясаты және кадрлық әлеуетті арттыру мәселелерін талқылады.
Өскеменде партия жақтастарының форумында жастарды жұмыспен қамту, кәсіпкерлікті дамыту және креативті индустриялар мәселесі көтерілді.
Партия атынан Құрылтай депутаттығына кандидат Маргарита Боярова Threads әлеуметтік желісінде де белсенді жұмыс жүргізіп, оқырмандармен тікелей байланыс орнатып келеді.
Науқанның басты тренді қандай?
Қазіргі сайлауалды науқан бір нәрсені анық көрсетті: партиялар енді сайлаушының өзіне барғанды жөн көреді. Бірі трамвайға мінеді, бірі өндіріс цехына барады, енді бірі әлеуметтік желі арқылы аудитория жинайды.
Формат әртүрлі болғанымен, талқыланып жатқан мәселелер ұқсас. Барлығы дерлік өңірлерді дамыту, экономиканы күшейту, кәсіпкерлікті қолдау, әлеуметтік саясатты жетілдіру, экологияны қорғау және халықтың өмір сүру сапасын арттыру туралы айтып жатыр.
Алдағы апталарда бұл бәсеке одан әрі күшеймек. Себебі бүгінгі сайлаушы үшін тек уәде беру жеткіліксіз. Ең маңыздысы – сол уәдені сенімді жеткізе білу және қоғаммен үздіксіз диалог орнату.
