Ерін далабы бояуға айналды.
29 шілдеде атап өтілетін Халықаралық ерін далабы күніне орай «Золотое Яблоко» бьюти-индустрия мен Қазақстанның заманауи өнерін тоғыстырды, деп хабарлайды DKNews.kz.
Қазақстандық үш суретші — Әсел Кенжетаева, Сәуле Дүйсенбина және Kokonja лақап атымен танылған Дария Әшкен — ретейлер ассортиментіндегі ерін далабын пайдаланып, бірегей туындылар жасады.
Авторлар үйреншікті жарнамалық сюжеттен бас тартып, жеке естелікке, әйел болмысына және ұлттық мәдени кодқа үңілді. Туындыларда балалық шақ, дала қызғалдағы мен қазақ киносының классикасына айналған Жібек бейнесі көрініс тапты.
Анасының косметикасынан басталған өнер
Әсел Кенжетаева әйел болмысы, ана болу және ұлттық дәстүр тақырыптарын зерттейді. Арт-жоба үшін ол анасының косметикасын жасырын алып, ерін далабын бетіне батыл жағып жатқан кішкентай қызды бейнеледі.
Картина суретшінің жеке естелігінен туған. Балалық ойын мұнда сұлулықпен және өзінің әйелдік болмысымен алғаш танысу сәтіне айналады.
«Мен өзімнің балалық шағымды есіме түсірдім: дәл осылай істейтінмін. Суретшілік қабілетімнің ұшқыны сол кезде-ақ пайда болған секілді, бетіме әлемнің барлық бояуын жағып жатқандай болатынмын. Бұл — кішкентай қыздың бойында әйел болмысының оянуымен, барлық далапты, қабақ бояуы мен бет әрлегішті өзіне жағып көргісі келетін қалауымен байланысты», — дейді Әсел Кенжетаева.
Кенжетаева Алматыда тұрып, шығармашылықпен айналысады. Оның жұмыстары Ұлыбритания, Австрия, АҚШ және Франциядағы жеке коллекцияларда сақтаулы.
Қызғалдақ, Руми және қазақ даласы
Қазақстандық поп-арттың ең танымал өкілдерінің бірі Сәуле Дүйсенбина туындысының негізгі образы ретінде қызғалдақты таңдады.
Суретші Руми поэзиясынан шабыт алып, каллиграфиялық жолдардың үстіне далаппен қызғалдақтар салды. Осылайша косметикалық өнім бір мезетте бояуға, символға және эмоциялық ишараға айналды.
«Ерін далабы таңдалған түсіне, жылтырына немесе күңгірттігіне қарай ерінді нәзік гүлге де, батыл, жалындаған әрі шабыттандыратын үндеуге де айналдыра алады. Мүмкіндік ауқымы өте кең. Менің есіме қызғалдақ пен парсы ақыны Румидің: “Кел, қызғалдақ, бетімнің алқызыл реңін бойыңа сіңір!” деген жолдары түсті», — дейді Сәуле Дүйсенбина.
Дүйсенбинаның жұмыстары Әбілхан Қастеев атындағы Мемлекеттік өнер музейінің, Almaty Museum of Arts, Лос-Анджелестегі LACMA музейінің және Нью-Йорктегі Стони-Брук университетінің жинақтарына енген.
Киіздегі Жібек бейнесі
Kokonja есімімен де танылған Дария Әшкен ерін далабын қазақ мәдениетіндегі негізгі материалдардың бірі — киізбен үйлестірді.
Ол қалың киіздің бетіне гүл ұстаған әйелдің портретін салып, туындыны киізден жасалған жақтауға орналастырды. Бұл образда ұлттық кино, батыс бейнелеу өнері және Дэвид Линч кинематографиясының эстетикасы тоғысты.
«Мен сүйікті суретшілерім мен режиссерлерімнің туындыларындағы әйелдер бейнесінен — Дэвид Линч, Алекс Кац және “Қыз Жібек” фильміндегі Жібектің образынан шабыт алып, әйел жүзінің сұлулығын жеткізгім келді. Олардың картиналарындағы әйелдер құдайдың нұрындай сәуле шашады, жанары шексіздікке бағытталған. Бұл — уақытқа бағынбайтын, сиқырлы әрі баурап алатын сұлулық», — деп түсіндіреді Дария Әшкен.
Kokonja шығармашылығында тоқыма, коллаж, саунд-арт және сән тоғысады. Ол Кассельдегі Documenta fifteen және Париждегі Asia NOW көрмелеріне қатысты. 2026 жылғы қаңтарда Қазақстанның Ұлттық музейінде жеке көрмесін өткізді.
Брендтер неге заманауи өнерге бет бұрды
Бұл жоба бьюти-индустриядағы жаңа үрдісті көрсетеді: косметикалық компаниялар дәстүрлі жарнама шеңберінен шығып, мәдениетпен, жергілікті болмыспен және өнермен жұмыс істей бастады.
Суретшілер үшін ерін далабы жұмсақ әрі иілгіш құрылымы бар тосын материалға айналды. Ал көрермен үшін ол есею, сұлулық және естелік туралы айтуға мүмкіндік беретін таныс зат болып шықты.
«Золотое Яблоко» Қазақстанда бес дүкен ашқан: үшеуі Алматыда, біреуі Астанада және тағы біреуі Шымкентте орналасқан. Ретейлер ассортиментінде әлемдік және қазақстандық 1 300-ден астам бренд бар.
