Қазақстанда қайтарылған активтер есебінен қаржыландырылып жатқан әлеуметтік жобалардың қатары артып келеді.
Бұл жолы Үкімет Солтүстік Қазақстан облысіндегі ауылдарды сапалы ауыз сумен қамтамасыз ету үшін 2,7 млрд теңге бөлді, деп хабарлайды DKNews.kz.
Қаражат Арнаулы мемлекеттік қордан бөлініп, Преснов және Соколов топтық су құбырларын реконструкциялауды аяқтауға бағытталады. Жоба іске қосылғаннан кейін ондаған ауылдың тұрғындары үшін ауыз суға қолжетімділік жақсарады.
43 ауылдағы 34,5 мың адамға әсер етеді
Ең ауқымды жұмыстардың бірі – Преснов топтық су құбырының реконструкциясы.
Бұл жоба аяқталғаннан кейін Есіл, Мамлют және Жамбыл аудандарындағы 43 елді мекеннің сумен жабдықтау жүйесі жаңарады. Мұнда 34,5 мыңнан астам адам тұрады.
Қазірдің өзінде:
- 171 шақырым магистральдық су құбыры мен тарату желілері тартылды;
- 46 шақырым ауылішілік су желісі салынды;
- суды жинақтау, тарату және қажетті қысымды ұстап тұратын инженерлік нысандар жаңартылып жатыр.
Тағы 10 ауыл таза суға қол жеткізеді
Жобаның екінші бөлігі Соколов топтық су құбырына қатысты.
Қызылжар ауданындағы 10 ауылды қамтитын бұл жоба төрт мыңнан астам тұрғынның тұрмыс сапасына әсер етеді.
Жоспар бойынша:
- 59 шақырым тарату желісі;
- 77 шақырым ауылішілік су құбыры салынады.
Нысандар қашан пайдалануға беріледі?
Үкіметтің жоспарына сәйкес, Преснов және Соколов су құбырлары 2026 жылдың соңына дейін пайдалануға беріледі.
Жобалар аяқталғаннан кейін:
- су жүйесінің сенімділігі артады;
- тасымалдау кезіндегі шығын азаяды;
- тұрғындарға жеткізілетін ауыз судың сапасы жақсарады.
Неліктен дәл Солтүстік Қазақстан?
Солтүстік Қазақстан облысында еліміздегі ең ұзын топтық су құбырлары желісі орналасқан.
Оның жалпы ұзындығы 3 мың шақырымнан асады және 229 ауылдағы 175 мың адамды сумен қамтамасыз етеді.
Инфрақұрылымды жаңғырту жұмыстары соңғы жылдары қарқын алған. Тек 2025 жылы Арнаулы мемлекеттік қордан өңірдің су жүйесін дамытуға 45 млрд теңгеден астам қаражат бөлініп, 48 жоба қаржыландырылған.
Қайтарылған активтер қайда жұмсалып жатыр?
Үкіметтің мәліметінше, 2024–2026 жылдар аралығында Арнаулы мемлекеттік қор есебінен жалпы құны 610 млрд теңгеден асатын 500-ден астам әлеуметтік жобаны қаржыландыру мақұлданған.
Соның ішінде 267 жоба су инфрақұрылымын дамытуға бағытталған. Бұл мақсатқа 226,5 млрд теңге қарастырылған.
Қайтарылған активтер есебінен жүзеге асырылып жатқан мұндай жобалар ауылдардағы инженерлік инфрақұрылымды жаңартып қана қоймай, тұрғындардың күнделікті өмір сапасын жақсартуға да мүмкіндік беріп отыр.
