Қазақстанда арнайы мақсаттағы әскери бөлімдерге қойылатын талап күшейіп келеді.
Енді Арнайы операциялар күштерінде қызмет еткісі келетін әрбір әскери қызметші міндетті түрде «Nomad» курсын аяқтауы тиіс. Бұл – тек кезекті оқу емес, бірнеше айға созылатын іріктеу мен кәсіби шыңдалу мектебі, деп хабарлайды DKNews.kz.
Қонаев гарнизонына жасаған жұмыс сапары барысында Қазақстан Республикасы Қорғаныс министрінің бірінші орынбасары – Қарулы күштері Бас штабының бастығы генерал-лейтенант Қаныш Әбубәкіров курсты өткізуге дайындық барысын тексеріп, оның салтанатты ашылуына қатысты.
Алдымен оқу базасы тексерілді
Жұмыс сапары аясында Бас штаб бастығы оқу сыныптарын, нұсқаушылардың орналасу орындарын, спорт залды және Қапшағай су қоймасының акваториясында су даярлығын өткізуге арналған оқу-материалдық базаны аралап шықты.
Арнайы операциялар күштерінің дайындығында дәл осындай инфрақұрылым шешуші рөл атқарады. Себебі курс қатысушылары теориямен ғана шектелмей, әртүрлі жағдайда әрекет етуге бағытталған тәжірибелік машықтарды меңгереді.
«Nomad» курсынан өтпей арнайы жасаққа қабылданбайды
Салтанатты ашылу рәсімінде сөз сөйлеген генерал-лейтенант Қаныш Әбубәкіров бұл бағдарламаның маңызын ерекше атап өтті.
– «Nomad» курсынан өту – арнайы мақсаттағы бөлімдерде әскери қызмет өткерудің міндетті шарты. Оқу бағдарламасы кез келген жағдайда жеке және топ құрамында жауынгерлік міндеттерді тиімді орындай алатын әмбебап мамандарды даярлауға бағытталған, – деді генерал-лейтенант Қаныш Әбубәкіров.
Бұл талап арнайы операциялар күштеріне тек физикалық тұрғыдан мықты емес, сонымен қатар түрлі жағдайда жедел шешім қабылдай алатын жан-жақты дайындалған мамандарды іріктеуге мүмкіндік береді.
8,5 айлық сынақ: курс қалай өтеді?
«Nomad» бағдарламасы екі негізгі кезеңнен тұрады – «Сынақ» және «Жетілу».
Алғашқы кезеңде әскери қызметшілер іріктеуден өтіп, су және атыс даярлығы бойынша қабілеттерін жетілдіреді. Сонымен қатар әскери топографияны меңгеріп, күрделі жерде бағдарлау машықтарын дамытады. Осыдан кейін әрқайсысы өзінің қызметтік бағытына сәйкес мамандандырылған даярлыққа кіріседі.
Ал «Жетілу» кезеңінде басты назар нақты жауынгерлік жағдайға барынша жақын ортада тәжірибе жинақтауға аударылады. Бұл уақытта әскери қызметшілер алған білімін іс жүзінде қолданады, бақылау-тексеру сабақтарынан өтеді және оқу соңында тактикалық-арнайы оқу-жаттығуларға қатысады.
Даярлық Қапшағайда өтеді
Бағдарлама жалпы 8,5 айға есептелген. Оқу сабақтары 20030 әскери бөлімінің базасында, сондай-ақ Қапшағай су қоймасының акваториясындағы әскери нысандарда ұйымдастырылады.
Осындай ұзақ мерзімді әрі кешенді даярлық бағдарламасы арнайы операциялар күштерінің кәсіби деңгейін арттырып, кез келген жағдайда тапсырманы орындауға қабілетті әскери мамандарды қалыптастыруға бағытталған.
