Көпшілік үшін әскер – тәртіп пен жауапкершіліктің мектебі.
Ал Қазақстанның Ұлттық ұланында мұнымен қатар көпшілікті таңғалдырмай қоймайтын тағы бір ерекше дәстүр бар, деп хабарлайды DKNews.kz.
Мұнда егіз ағайындыларды бір-бірінен ажыратпай, бір әскери бөлімде бірге қызмет өткеруіне мүмкіндік беріледі.
Бүгінде ҚР ІІМ Ұлттық ұланының қатарында 40-қа жуық егіз жұп Отан алдындағы борышын бірге атқарып жүр. Олар күн сайын қоғамдық қауіпсіздікті қамтамасыз етуге қатысып, әскери міндеттерін қатар орындап келеді.
Павлодарлық егіздер екі қалада қызмет етіп жүр
Осындай ерекше жұптардың қатарында Астанадағы жедел бригадада қызмет ететін Алмас пен Олжас Сүлейменовтер бар. Ал Ростислав пен Ярослав Таран 6636 әскери бөлімінде әскери борышын өтеп жүр.
Бір қызығы, екі егіз жұптың да туған жері бір – Павлодар қаласы.
Сүлейменовтер елордадағы қоғамдық тәртіпті қамтамасыз етуге қатысса, Тарандар әскери бөлімнің қарауыл қызметін абыроймен атқарып келеді.
Егіздерді ажырату оңай емес
Алғаш көрген адам үшін егіз сарбаздарды бірден ажырату қиын. Дегенмен, олармен күнделікті бірге қызмет ететін әскери қызметшілер уақыт өте келе әрқайсының мінезі, сөйлеу мәнері мен қимыл-қозғалысы арқылы айырмашылығын оңай таниды.
Бұл жағдай әскери ұжым ішінде де ерекше атмосфера қалыптастырған.
«Бала кезден бірге өстік»
5573 әскери бөлімінің сарбазы Алмас Сүлейменов егіз бауырымен бірге қызмет етудің өзі үлкен қолдау екенін айтады.
– Бала кезден бірге өстік, енді Отан алдындағы борышымызды да қатар өтеп жатырмыз. Бұл біз үшін үлкен мақтаныш әрі ұмытылмас кезең. Бір-бірімізге әрдайым қолдау көрсетіп, қатар дамып келеміз. Отан алдындағы борышымызды бірге өтеп жатқанымызды мақтан тұтамыз, – дейді қатардағы Алмас Сүлейменов.
Бауырластық пен сенімнің көрінісі
Ұлттық ұландағы егіз сарбаздардың қызметі тек қызықты дерек қана емес. Бұл – бауырластықтың, өзара сенімнің және Отанға адал қызмет етудің жарқын үлгісі.
Олар әскери антқа адал болып, жүктелген міндеттерін күн сайын жауапкершілікпен орындап келеді. Егіздердің бірге қызмет етуі әскери өмірді жеңілдетіп қана қоймай, қиын сәтте бір-біріне тірек болуға мүмкіндік береді.
Бүгінде Қазақстанның түкпір-түкпірінде қызмет етіп жүрген осындай ондаған егіз жұп Ұлттық ұланның ерекше дәстүрін жалғастырып, ел қауіпсіздігі жолындағы ортақ миссияны бірге атқарып жүр. Бұл – бауырлықтың да, патриотизмнің де нақты көрінісі.
