Қазақстандағы сайлауалды науқан өңірлерде барған сайын қарқын алып келеді.
Партиялар енді тек дәстүрлі кездесулермен шектелмей, зауыттарға барып, ауыл тұрғындарымен сөйлесіп, экологиялық акциялар өткізіп, мобильді штабтар арқылы шалғай елді мекендерді қамтып жатыр, деп хабарлайды DKNews.kz.
Күн тәртібіндегі мәселелер де сан алуан: жұмыс орындары, тұрғын үй, өнеркәсіп, экология, әлеуметтік қолдау, жастардың болашағы мен отандық өндіріс. Сонымен қатар партиялар арасындағы пікірталас пен өзара сын да сайлау науқанының бір бөлігіне айналды.
«Әділет»: әлеуметтік қолдаудан өнеркәсіпке дейін
«Әділет» партиясының төрағасы Айбек Дәдебай бастаған республикалық штаб Семейдегі Шәкәрім университетінде өңір ақсақалдарымен, ғалымдармен және шығармашылық зиялы қауым өкілдерімен кездесті.
Басты тақырыптардың бірі — әлеуметтік қорғау жүйесін цифрландыру. Талқылау барысында азаматтарға тиісті қолдау шараларын анықтама жинамай-ақ, проактивті түрде тағайындау мүмкіндігі сөз болды.
Сонымен бірге кітапхана ісін және кітап шығаруды дамыту, жас зерттеушілерді қолдау, ғылыми ортаның мүмкіндіктерін кеңейту мәселелері көтерілді.
Партия өкілдері Семейдегі өндіріс орындарына да барды. «SemAZ» машина жасау зауыты мен «Қазполиграф» полиграфиялық кешенінің қызметкерлерімен кездесуде орта бизнестің ел экономикасындағы орны, өнеркәсіпті дамыту және маман даярлау мәселелері талқыланды.
Жастар үшін баспана қолжетімділігі де назардан тыс қалған жоқ. Соның ішінде кейін сатып алу мүмкіндігі қарастырылған жалдамалы тұрғын үй тетігі мен жоғары оқу орнын бітірген жастарды мамандығы бойынша жұмысқа орналастыру жайы сөз болды.
Ұлттық ядролық орталықтың бас директоры, кандидат Эрлан Батырбеков өңірдің технологиялық дамуы жаңа жұмыс орындарын ашумен қатар жүруі керектігіне тоқталды.
Мобильді керуен ауылдарға жетіп жатыр
«Әділет» партиясы «Әділетті Қазақстан үшін» мобильді керуенінің аралық нәтижелерін де жариялады.
Партияның мәліметінше, Жамбыл облысында төрт күн ішінде ауылдық елді мекендердің 930 тұрғынымен жеті кездесу өткен. Оларға Құрылтай депутаттығына 13 кандидат, соның ішінде партия төрағасы қатысқан.
23 шілдеден бері керуеннің алты бағыты Қазақстанның 14 өңірін қамтып, 58 кездесу өткізген. Оларға 7,8 мыңнан астам адам қатысып, керуен шамамен 7,5 мың шақырым жол жүрген.
19 тамызға дейін жоба барлық макроөңірді қамтып, қатысушылар санын 10 мыңнан асыруды жоспарлап отыр.
Ал партияның жастар штабы «Есіктен есікке» акциясы арқылы партия бағдарламасымен еліміздің бір миллионнан астам тұрғыны танысқанын хабарлады.
Зейнеткерлер үшін жеке орталық мәселесі көтерілді
Жалпыұлттық социал-демократиялық партияның Алматы облыстық филиалы Қонаевтағы саябақта зейнеткерлер және белсенді тұрғындармен кездесті.
Мұнда Белсенді ұзақ өмір сүру орталығының жеке ғимаратының болмауы негізгі мәселелердің бірі ретінде көтерілді. Партияның мәліметінше, бүгінде орталыққа 250-ге жуық адам барып жүр.
Кездесуде егде жастағы азаматтардың өмір сапасы мен оларға жасалатын жағдай да талқыланды.
«Байтақ» экологияны алдыңғы қатарға шығарды
Астанада «Байтақ» партиясының экологиялық сенбілігі өтіп, 50-ге жуық волонтер мен партия өкілі су айдындарының бірінің маңынан 30 қаптан астам қоқыс жинады.
Экология мәселесі басқа өңірлердегі кездесулерде де жалғасты.
«Табиғат – ұлттық мұра» дөңгелек үстелдері аясында «Іле-Балқаш» резерватындағы биоалуантүрлілікті сақтау, браконьерлікке қарсы күрес және экотуризмді дамыту жолдары талқыланды.
Жамбыл облысының Байзақ ауданында партия өкілдері тұрғындармен жергілікті экологиялық мәселелерді көтерсе, Алматы облысындағы ЖЭО-3 қызметкерлерімен жылу энергетикасын жаңғырту тақырыбын талқылады.
Атырауда түнгі ауысымда еңбек ететін теміржолшылармен кездесу өтті.
Ал Астанадағы Ұлттық травматология және ортопедия ғылыми орталығында медицина қызметкерлерімен кездесу барысында еңбек жағдайымен қатар Арал теңізін қалпына келтіру және атом электр станциясын салу мәселесі де сөз болды.
Халық партиясы өндіріс пен жұмыс орындарына назар аударды
Қазақстан Халық партиясының өкілдері Павлодар облысындағы «Metzer» компаниясы және ет өнімдерін өндіретін «Рубиком» кәсіпорнының еңбек ұжымдарымен кездесті.
Тараптар отандық өндірушілерді қолдау, жұмыс орындарын сақтау және еңбек жағдайын жақсарту мәселелерін талқылады.
Өндіріс саласындағы мұндай кездесулер сайлауалды науқан барысында партиялардың экономикалық мәселелерге ерекше назар аударып отырғанын көрсетеді.
«Ауыл»: жастар, азық-түлік және патриоттық акция
Қостанайда «Ауыл» партиясы «Менің Қазақстаным» патриоттық акциясын өткізді. Оған партия төрағасының бірінші орынбасары Серік Егізбаев қатысты.
50-ден астам адам Қазақстан өңірлерінің бірлігін бейнелейтін символикалық пазл-композиция құрастырды.
Павлодарда Ертіс жағасында партия кандидаттары ауыл жастарымен жүздесіп, жұмысқа орналасу, білім алу және жастар бастамаларын қолдау мәселелерін талқылады.
Ал Алматыда партия төрағасы Қайрат Айтуғанов кандидаттармен бірге «BRB APK» ЖШС-нің жылыжай шаруашылығына барды.
Кездесуде азық-түлік қауіпсіздігі, агроөндірушілерге мемлекеттік қолдау көрсету және ірі қалалар айналасында азық-түлік белдеулерін қалыптастыру мәселелері көтерілді.
«Ақ жол» коммуналдық инфрақұрылым мен Салық кодексін талқылады
Дәния Еспаева бастаған «Ақ жол» партиясының республикалық штабы Екібастұздағы кездесулерін «Горводоканал» және «ГорЭлектроСеть» кәсіпорындарынан бастады.
Негізгі тақырып — қаланың коммуналдық және энергетикалық инфрақұрылымын дамыту.
Қызылорда облысында партия төрағасының орынбасары Қазыбек Иса кандидаттармен бірге Қармақшы ауданына барып, шағын бизнес өкілдерімен кездесті.
Кәсіпкерлермен әңгіме барысында қабылданған Салық кодексіне қатысты мәселелер қозғалды.
Сонымен бірге партия Respublica өкілінің подкасттардың бірінде айтқан сынына жауаптар топтамасын жариялады. Осылайша партияаралық пікірталас та сайлауалды күн тәртібінің бір бөлігіне айналып отыр.
Respublica кәсіпорындарды аралады
Respublica партиясы Алматы және Ақтөбе облыстарындағы еңбек ұжымдарымен кездесулер өткізді.
Талғардағы «Fruit Art» кәсіпорнында отандық өндірушілерді қолдау мәселесі қаралды.
Aluminium of Kazakhstan ЖШС-де білім беру бағдарламалары мен еңбек нарығы сұранысының сәйкес келмеуі талқыланды. Сонымен бірге атом саласына арнайы кадр даярлау жөніндегі партия бастамасы сөз болды.
Ақтөбеде партия өкілдері «РОКОС», «Молочные истории-А» және қой жүнін өңдейтін «KazFeltec» кәсіпорындарының қызметкерлерімен кездесті.
Мұнда өндірісті қолдау, кадр тапшылығы және кәсіпорындарды қажетті шикізатпен қамтамасыз ету проблемалары көтерілді.
Сайлауалды науқанның басты тақырыптары қандай?
Өңірлердегі кездесулерге қарағанда, партиялардың бағдарламаларында әртүрлі басымдық болғанымен, сайлаушылар көтеріп отырған мәселелердің арасында ортақ тақырыптар көп.
Жұмыс пен тұрақты табыс, қолжетімді баспана, сапалы инфрақұрылым, әлеуметтік қолдау, отандық кәсіпорындардың жағдайы, жастардың болашағы мен экология — сайлауалды кездесулерде ең жиі айтылып жүрген мәселелердің қатарында.
Тағы бір байқалатын өзгеріс — партиялар аудиториямен жұмыс істеудің форматын кеңейтіп келеді. Зауыттағы кездесуден ауылдағы мобильді штабқа, сенбіліктен жастар акциясына дейінгі әртүрлі форматтар қолданылып жатыр.
Ал сайлау күні жақындаған сайын бағдарламаларды таныстырумен бірге партиялардың бір-бірінің ұсыныстарына жауап беруі, сын айтуы және өз ұстанымын қорғауы да жиілей түсуі мүмкін.
Сондықтан өңірлердегі қазіргі белсенділік — жай ғана сайлаушылармен кездесу емес. Бұл партиялардың қоғамды толғандырып отырған нақты мәселелерге қандай жауап ұсынатынын көрсетуге тырысатын кезең.
