Ақмола облысында өткен Shaiqas-2026 алғашқы ұлттық инженерлік чемпионаты аяқталды, деп хабарлайды DKNews.kz.
Үш күндік бәсекеде командалар дрондар, жерүсті роботтары, киберқауіпсіздік және тактикалық-инженерлік даярлық бағыттарында сынға түсті. Бас жүлде – 10 миллион теңге.
Щучинск қаласындағы «Амандық» полигонында өткен чемпионатқа 17 команда қатысты. Олардың арасында студенттер, инженерлік мектептердің мамандары, өнеркәсіптік кәсіпорындар мен күштік құрылымдардың өкілдері болды.
Бұл жолғы жарыста әдемі прототип немесе қызықты идея көрсету жеткіліксіз еді. Қатысушылардан техниканы, бағдарламалық қамтамасыз етуді және команданың іс-қимылын біртұтас жұмыс істейтін жүйеге айналдыру талап етілді.
Дроннан киберқауіпсіздікке дейін
Shaiqas-2026 тапсырмалары Қазақстан Қарулы күштерінің нақты қызмет бағыттарына барынша жақындатылды.
Командалар бірнеше бағыт бойынша сыналды:
- әуеден барлау жүргізу;
- жерүсті роботтандырылған кешендерді басқару;
- киберқауіпсіздік;
- тактикалық даярлық;
- инженерлік тапсырмаларды орындау.
Яғни чемпионаттағы басты сұрақ – «кімнің құрылғысы әдемі?» емес, «кімнің технологиясы нақты жағдайда тиімді жұмыс істейді?» дегенге келіп тірелді.
Қорғаныс министрі авиация генерал-лейтенанты Дәурен Қосановтың айтуынша, қазіргі армиядағы технологияның рөлі бұрынғыдан да артып келеді.
– Бүгінде ұрыстың нәтижесін сол алаңды кімнің бірінші көретіні, қарсыластың барлауынан өз әрекетін жасыра алатыны, байланысты сақтап, әскерлердің маневрін қамтамасыз етуі айқындайды. Сондықтан заманауи армия жауынгердің әскери даярлығымен ғана емес, оның ұрыс алаңындағы басымдығын қамтамасыз ететін технологиялық шешімдерімен де мықты, – деді Қорғаныс министрі инженерлік бағыттың стратегиялық маңызын атап өтіп.
10 миллион теңгелік бас жүлде кімге бұйырды?
Чемпионат қорытындысында бірінші орын мен Shaiqas-2026 чемпионы атағын «Қазақстан инжиниринг» R&D орталығының командасы жеңіп алды.
Команда құрамында Қазақ технология және бизнес университетінде «Киберқауіпсіздік» мамандығы бойынша білім алып жүрген әскери кафедра студенттері өнер көрсетті.
Жүлделі орындар былай бөлінді:
- I орын – «Қазақстан инжиниринг» R&D орталығы – 10 млн теңге;
- II орын – ҚР ҚК «Қайсар» командасы (Qaisar VS RK) – 5 млн теңге;
- III орын – Saiman командасы – 3 млн теңге.
Осылайша негізгі үш жүлденің жалпы қоры 18 миллион теңгені құрады.
Үздік дрон, робот және киберкоманда анықталды
Чемпионатта негізгі жүлделерден бөлек, жекелеген технологиялық бағыттар бойынша үздіктер де таңдалды.
«Үздік жерүсті жүйелері» номинациясында – Sunqar Engineering Team,
«Үздік әуе жүйелері» аталымында – Visvo,
ал «Үздік киберқауіпсіздік» номинациясында – «Бүркіт» командасы жеңіске жетті.
Әр номинация жеңімпазына 600 мың теңгеден ақшалай сыйлық берілді.
Қорғаныс министрі чемпионатқа қатысқан барлық командаларға арнайы сертификаттар табыстады.
Жеңімпаз жобалар сөреде шаң басып қалмайды
Shaiqas-2026-ның ең маңызды тұсы жарыстың аяқталуымен бірге жобалардың да тарихы аяқталмайтынында.
Ұйымдастырушылардың мәліметінше, үздік әзірлемелер прототип күйінде қалдырылмайды. Оларды өнеркәсіптік серіктестермен бірге қосымша сынақтан өткізу жоспарланып отыр.
Келесі кезеңде перспективалы технологияларға техникалық сүйемелдеу көрсетіліп, оларды сериялық өндіріске шығару мүмкіндігі қарастырылады.
Егер сынақ нәтижелері сәтті болса, кейбір әзірлемелер кейін Қазақстан Қарулы күштерінің қажеттілігіне енгізілуі мүмкін.
Чемпионаттың басты мақсаты не?
Shaiqas-2026 тек жеңімпаз анықтайтын жарыс ретінде емес, инженерлер, студенттер, әскери мамандар мен отандық технологиялық компанияларды бір алаңға жинаған практикалық платформа ретінде ұйымдастырылды.
Дәурен Қосанов чемпионатты өткізуге атсалысқан Ақмола облысының басшылығына, Ғылым және жоғары білім министрлігіне, Defence Tech Center инновациялық хабына, Barys Dynamics және Saiman компанияларына, сондай-ақ Әскери колледж басшылығына алғыс білдірді.
Министр төрешілер алқасының да жұмысын атап өтіп, қатысушылардың өнерін бағалаудағы объективтілігі мен кәсіби көзқарасы үшін ризашылығын жеткізді.
Ал чемпионаттың нәтижесі бір нәрсені көрсетті: қазіргі инженерлік жарыстарда идеяның өзі ғана емес, оның нақты жағдайда жұмыс істеуі, басқа жүйелермен бірігуі және практикалық міндетті шеше алуы шешуші мәнге ие.
Shaiqas-2026 жеңімпаздары үшін ендігі басты сынақ – чемпионаттағы табысты технологияны өндірісте қолдануға болатын нақты өнімге айналдыру.
