Алматыда 2008 жылы болған резонансты кісі өлтіру ісіне қатысты үкім шықты. Қылмыстан кейін Қазақстаннан қашып, Еуропада өзге деректермен жасырынған Ю. Юсупов 17 жылдан кейін сот алдында жауап берді, деп хабарлайды DKNews.kz.
Қылмыстық ортада «Кинг-Конг» лақап атымен белгілі болған ер адам 15 жылға бас бостандығынан айырылды.
Алматы орталығындағы қанды түн
Қылмыс 2008 жылғы 19 мамырға қараған түні Алматының орталығында болған.
Сот материалдарына сәйкес, Юсупов пен оның сыбайласы А. Коваленко қылмыстық орта өкілімен жанжалдасқан. Кейін олар жәбірленушіні Фурманов көшесіндегі үйдің маңында күтіп тұрған.
Ер адамға бірнеше рет дәлдеп оқ атылған. Соның бірі желке тұсына тиген. Жәбірленуші алған жарақаттарынан оқиға орнында көз жұмды.
Осыдан кейін Юсупов Қазақстаннан кетіп, халықаралық іздеуге жарияланды.
Сыбайласы 23 жылға сотталған
Юсупов қашып жүрген уақытта оның сыбайласы А. Коваленко қылмыстық әрекетін жалғастырған.
2008 жылдың жазында Қапшағайдағы «Старая крепость» демалыс аймағында қарулы оқиға болып, полиция қызметкері қаза тапты. Тағы төрт адам ауыр жараланды.
Коваленко сол оқиғадан кейін ұсталып, 2009 жылы 23 жылға бас бостандығынан айырылды.
Ал Юсуповты іздеу жалғаса берді.
«Кинг-Конг» деген лақап аты болған
Қолда бар мәлімет бойынша, Юсупов қылмыстық ортада «Кинг-Конг» деген лақап атпен танылған.
Сондай-ақ оның қырғызстандық белгілі қылмыстық авторитеттің айналасына кіргені айтылады. Қырғызстанның құқық қорғау органдары да Юсуповты іздеген.
Оған 2007 жылы Бішкекте көлік жуу орны иесінің өліміне қатысты күдік болған.
Осылайша, іздеудегі ер адам бір ғана Қазақстанның емес, көрші елдің де құқық қорғау органдарының назарына түскен.
Еуропада басқа деректермен өмір сүрген
Тергеу мәліметіне қарағанда, Юсупов кейінгі жылдарын Еуропа елдерінде өткізген. Ол жеке басын анықтауды қиындату үшін өзгертілген анкеталық деректерді пайдаланған.
Бұл жағдай оның ұзақ уақыт бойы құқық қорғау органдарының қолына түспей жүруіне мүмкіндік берген.
Алайда 17 жылға созылған іздеу ақыры нәтижесін берді.
2025 жылғы тамызда Юсупов Литва шекарасынан өтпек болған кезде ұсталды. Сол жылдың қарашасында Қазақстан Бас прокуратурасының сұрауы бойынша Литвадан елге экстрадицияланды.
15 жылға бас бостандығынан айырылды
2026 жылғы шілдеде Алматы қаласының қылмыстық істер жөніндегі мамандандырылған ауданаралық соты істі қарап, Юсуповты адамдар тобының алдын ала сөз байласуы арқылы жасалған кісі өлтіруге көмектескені үшін кінәлі деп таныды.
Оған 15 жыл бас бостандығынан айыру жазасы тағайындалды.
Осылайша, 2008 жылы басталған іс бойынша негізгі фигуранттардың бірі араға 17 жылдан астам уақыт салып Қазақстан сотының алдына келді.
17 жыл өтсе де, іс жабылған жоқ
Бас прокуратура Юсуповтың елге қайтарылуын халықаралық ынтымақтастықтың жаңа тәсілдерімен және шетелдік әріптестермен жолға қойылған тікелей байланыстың нәтижесі деп бағалады.
Шетелдік құқық қорғау органдарымен ақпаратты жедел алмасу, халықаралық іздестіру тетіктерін пайдалану және тікелей байланыс орнату жылдар бойы шетелде жасырынған адамдарды анықтауға мүмкіндік беріп отыр.
Ведомство бұл істің негізгі мәнін «Заң мен Тәртіп» қағидатымен байланыстырады.
«Заң мен Тәртіп» қағидаты, соның ішінде жауаптылықтың бұлтартпастығын білдіреді: іздеуде болған уақыттың ұзақтығы да, жеке деректерін өзгерту де, елден тыс жерде жүру де сот төрелігінен жалтаруға мүмкіндік болмауы тиіс.
Құзырлы органдар шетелде жасырынып жүрген іздеудегі адамдарды анықтау, ұстау және Қазақстанға қайтару жұмыстары жалғасатынын мәлімдеді.
