Әлеуметтік желі әскери қызметке жол ашты.
Шымкенттік кәсіби барабаншы Әлішер Олжабай TikTok пен Instagram арқылы Ұлттық ұланның әскери оркестріндегі мүмкіндіктер туралы біліп, бүгінде ІІМ Ұлттық ұланының 5573 әскери бөлімінде қызмет етіп жүр, деп хабарлайды DKNews.kz.
Оның оқиғасы әскердегі мамандықтардың тек әскери даярлықпен шектелмейтінін көрсетеді. Сахнада жинаған кәсіби тәжірибе енді әскери оркестрде қажет болып отыр.
Бір видео Әлішердің жоспарын өзгертті
Әскерге дейін Әлішер кәсіби барабаншы ретінде түрлі сахнада өнер көрсетіп, көрерменнің қошеметіне бөленген.
Оның әскери қызметке қызығушылығына TikTok пен Instagram-дағы ақпарат себеп болды. Әлеуметтік желі арқылы Ұлттық ұланның әскери оркестрлерінде кәсіби музыканттарға мүмкіндік берілетінін білген Әлішер өнерін армияда жалғастыруды шешті.
Осылайша әлеуметтік желідегі бір видео музыкант өміріндегі жаңа кезеңнің басталуына түрткі болды.
Бірақ кәсіби шеберлік әскери тәртіптен босатпайды. Қатардағы Әлішер Олжабай қызметінің алғашқы күндерінде саптық дайындықтан өтіп, әскери күн тәртібіне бейімделді.
Музыкада дирижердің қимылына қарап үйренген барабаншы енді командирдің пәрменін орындауға дағдыланды.
Ұлттық ұланда 17 әскери оркестр жұмыс істейді
Әлішердің оқиғасының артында әскери музыканттарды біріктіретін тұтас жүйе тұр.
Ұлттық ұланда 17 әскери оркестр жұмыс істейді, олардың құрамында 320-дан астам келісімшарт бойынша әскери қызметші мен офицер бар. Әскери музыканттар кәсіби шеберлігін жетілдірумен қатар ансамбльдік және саптық даярлықтан өтеді.
Оркестрлер әскери шерулерге, салтанатты іс-шаралар мен рәсімдерге қатысады. Мұндай жағдайда барабаншының міндеті тек музыкалық шығарманы орындаумен шектелмейді.
Барабан үні әскери саптың қозғалысына ырғақ беріп, рәсімнің бір бөлігіне айналады. Сондықтан Әлішердің сахнада қалыптасқан кәсіби машығы әскери ортада да тікелей қолданыс тапты.
5573 әскери бөлімінде музыкаға ерекше орын берілген
Әлішер қызмет ететін 5573 әскери бөлімінде музыкалық бағыт бұрыннан қалыптасқан.
Бұл бөлімде Ұлттық ұланның Ән-би ансамблі жұмыс істейді. Оның әскери қызметшілері кәсіби музыкалық байқауларға да қатысып келеді.
Мәселен, Ұлттық ұланның әскери музыканттары арасындағы алғашқы байқауда 5573 әскери бөлімінің Ән-би ансамблінің аға музыканты Диана Рүстембекова екінші орын алған. Байқаудың мақсаты әскери музыканттардың кәсіби шеберлігін арттыру және әскери музыка өнерін дамыту болды.
Әлеуметтік желілер де әскери музыканттарды көпшілікке танытатын құралға айналып келеді. Бұған дейін осы бөлімнің әскери қызметшісі Александр Нетесовтың «Анашым» әнін орындаған видеосы TikTok-та шамамен 100 мың қаралым жинағанын Қазақстан ІІМ хабарлаған.
Әлішер Олжабайдың жағдайында бұл үрдіс керісінше жұмыс істеді: әскери музыкант әлеуметтік желі арқылы танылған жоқ, әлеуметтік желідегі контент кәсіби музыкантты Ұлттық ұланға алып келді.
Әлішер келісімшартпен қызметін жалғастырғысы келеді
Оркестр ұжымы Әлішердің кәсіби деңгейін байқап, оған қолдау көрсетіп келеді. Бос уақытында барабаншыға жаттығуға мүмкіндік берілген.
Оның келесі мақсаты да айқын. Әлішер әскери қызметін келісімшарт негізінде жалғастырып, Ұлттық ұлан оркестрінің құрамында өнер көрсетуді жоспарлап отыр.
Мұндай жол Ұлттық ұланда бар. Бұған дейін срочно қызметтен кейін әскери оркестрде қалып, келісімшарт бойынша қызметін жалғастырған музыканттардың тәжірибесі туралы DKNews.kz жазған еді.
Сонымен қатар Ұлттық ұланда әскери оркестр сержанттарын арнайы даярлау жүйесі енгізілген. Келісімшарт бойынша қызмет ететін музыканттар кәсіби даярлықтан кейін жаңа лауазымдарға тағайындалып, әскери мансабын жалғастыра алады.
Әлішер үшін бұл әскери қызмет аяқталғаннан кейін музыкадан бас тарту емес, керісінше кәсіби жолын басқа ортада жалғастыру мүмкіндігі.
Осыған ұқсас тағы бір оқиғада біз бес музыкалық аспапта ойнайтын мерзімді әскери қызметші Ербол Әзімовтің «Бүркіт» музыкалық тобын құрғанын жазған едік. Ол Ақтау гарнизонында әскери борышын өтей жүріп, музыкаға қызығатын қаруластарын бір ұжымға біріктірген.
