Әскери білімнің басымдықтары өзгеріп жатыр.
Қазақстанның әскери оқу орындары жаңа оқу жылында ұшқышсыз технологиялар, цифрлық құралдар және курсанттардың практикалық даярлығына көбірек назар аударады, деп хабарлайды DKNews.kz.
Негізгі міндеттер Алматыдағы Радиоэлектроника және байланыс әскери-инженерлік институтының базасында өткен оқу-әдістемелік жиында айқындалды. Қорғаныс министрінің орынбасары, генерал-майор Асқар Мұстабековтің басшылығымен әскери оқу орындарының жетекшілері болашақ офицерлерді даярлау сапасын арттыру жолдарын талқылады.
Дрон мамандарын даярлауға ерекше назар аударылады
Жаңа оқу жылындағы ең айқын бағыттардың бірі – технологиялық даярлықты күшейту.
Әскери оқу орындары бірнеше бағытқа басымдық бермек:
- ұшқышсыз технологиялар бойынша мамандар даярлау;
- цифрлық құралдарды оқу процесіне енгізу;
- интерактивті оқыту әдістерін пайдалану;
- курсанттардың көшбасшылық қасиеттерін дамыту;
- командирлерді даярлау жүйесін жетілдіру;
- әскери ғылым мен зерттеу жобаларын дамыту.
Бұл бағыттар әскери білім беру жүйесінде бұған дейін басталған технологиялық жаңғыруды жалғастырады.
Мәселен, әскери оқу бағдарламаларына жасанды интеллект, ұшқышсыз авиациялық жүйелер, киберқауіпсіздік, криптология және радиоэлектрондық күрес сияқты бағыттар енгізіліп жатыр. Қазір Қазақстандағы әскери білім беру жүйесі үш әскери институтты, бес әскери колледжді және Ұлттық қорғаныс университетін қамтиды.
Курсанттар дрондар мен роботтарды өздері әзірлеп жүр
Жаңа талаптардың практикада қалай жүзеге асып жатқанын жиын өткен институттың өзінен көруге болады.
Радиоэлектроника және байланыс әскери-инженерлік институтының курсанттары биыл Shaiqas-2026 ұлттық инженерлік чемпионатына өздері әзірлеген ұшқышсыз авиациялық жүйе және жерүсті роботтандырылған платформамен қатысты.
Болашақ офицерлер «Әуе» және «Жер» бағыттарында дронмен барлау жүргізу, FPV-жүйелерді басқару, техниканы жедел құрастыру, робот көмегімен манекендерді эвакуациялау секілді практикалық міндеттерді орындауға дайындалды.
Бұл әскери білімдегі өзгерістің маңызды бөлігін көрсетеді: курсант тек дайын техниканы пайдаланушы емес, оны әзірлеуге, сынауға және нақты міндеттерге бейімдеуге қатысатын маман ретінде даярланып жатыр.
Әскери және азаматтық университеттер тәжірибе алмасады
Жиынға азаматтық жоғары оқу орындарының өкілдері де қатысты.
Әл-Фараби атындағы Қазақ ұлттық университеті мен Халықаралық ақпараттық технологиялар университетінің мамандары заманауи оқыту тәсілдерін таныстырып, цифрлық шешімдерді білім беру процесінде қолдану мүмкіндіктері туралы айтты.
Жиын аяқталғаннан кейін қатысушылар Қ.И. Сәтбаев атындағы Қазақ ұлттық зерттеу техникалық университетіне барып, заманауи техникалық әзірлемелермен және ғылыми жобалармен танысты.
Мұндай ынтымақтастықтың практикалық маңызы артып келеді. Қазіргі әскери маманға дәстүрлі командирлік даярлықпен бірге байланыс, бағдарламалау, ақпараттық қауіпсіздік, радиоэлектроника, робототехника және ұшқышсыз жүйелер бойынша білім қажет.
Әскери білім беру цифрлық жүйеге көшіп жатыр
Өзгеріс тек оқу бағдарламаларына жаңа пәндерді қосудан тұрмайды.
Қазақстанда әскери білім беру инфрақұрылымының өзі цифрландырылып жатыр. Қорғаныс министрлігі барлық әскери жоғары оқу орындары мен колледждерді біріктіретін Askeri Ziyat көпфункционалды платформасын іске қосты. Онда ведомствоаралық электрондық кітапхана мен даярлық курстары қарастырылған.
Әскери оқу орындарына қабылдау да электрондық форматқа көшті. 2026 жылғы 1 ақпаннан бастап өтініштер eGov.kz арқылы онлайн қабылданады, ал қажетті мәліметтердің едәуір бөлігі мемлекеттік ақпараттық жүйелерден автоматты түрде тексеріледі.
Радиоэлектроника және байланыс әскери-инженерлік институтының өзінде де цифрлық даярлық дамып келеді. Мұнда курсанттар электрондық атыс тирлерін пайдаланып, ұшқышсыз ұшу аппараттарын басқару, барлау және оларды әртүрлі жағдайда қолдану дағдыларын меңгереді.
Әскери ғылымның нәтижесі әскерге жетуі тиіс
Жиында ғылыми-зерттеу жұмыстарына да жеке назар аударылды.
Әскери оқу орындарының алдында перспективалы жобаларды әзірлеп қана қоймай, зерттеу нәтижелерін білім беру процесіне және әскерлердің практикалық қызметіне енгізу міндеті тұр.
Бұл жерде нәтиже нақты технология, оқыту әдісі немесе әскери бөлімдерде қолдануға болатын практикалық шешім түрінде көрінуі тиіс.
Асқар Мұстабеков әскери оқу орындарының басшыларына қойылған міндеттерді орындауда жеке жауапкершілік жүктелетінін атап өтті.
«Жаңа оқу жылы нақты міндеттер мен түсінікті нәтижелерден басталуы тиіс. Жұмыс бағыттарын айқындап қана қоймай, олардың әр деңгейде жүйелі түрде орындалуын қамтамасыз ету маңызды», – деді генерал-майор Асқар Мұстабеков.
Демек, жаңа оқу жылындағы негізгі өлшем жаңа технологияларды оқу жоспарында көрсету ғана емес, оларды курсанттардың күнделікті даярлығына және кейін әскердің практикалық жұмысына енгізу болмақ.
Бұған дейін біз Қазақстанда болашақтың қандай әскери мамандықтары сұранысқа ие болып келе жатқанын жазған едік. Олардың қатарында жасанды интеллект, киберқауіпсіздік, радиоэлектрондық күрес және ұшқышсыз авиациялық жүйелер бар.
