Запастағы әскери қызметшілер жауынгерлік даярлыққа қайта кірісті.
Ақтауда әскери міндеттілер жауынгерлік кемелермен теңізге шығып жатса, Аягөзде 250 адам қару-жарақ пен әскери техникамен жұмыс істеу дағдыларын жетілдіруде, деп хабарлайды DKNews.kz.
Даярлық туралы 1 қыркүйекте Қазақстан Республикасының Қорғаныс министрлігі хабарлады.
30 әскери міндетті жауынгерлік кемелерде даярлықтан өтуде
Ақтау гарнизонында 30 әскери міндетті 30 күндік әскери жиынға қатысып жатыр. Даярлық тікелей Әскери-теңіз күштерінің кемелерінде өтуде.
Қатысушылар кеме экипажы құрамында қызмет етудің ерекшеліктерін меңгеріп, штурмандық дағдыларын жетілдіреді, қару-жарақ пен автоматтандырылған басқару жүйелерін оқып-үйренеді.
Бағдарламаның жеке бөлігі кеменің өміршеңдігі үшін күреске арналған. Әскери міндеттілер экипаж қауіпсіздігі мен кеменің жауынгерлік қабілетін сақтауға бағытталған іс-қимылдарды пысықтайды.
Теориялық білім теңізге шығу кезінде тәжірибемен бекітіледі. Мұнда запастағы әскери қызметшілер нақты теңіз жағдайында әрекет етіп, экипаж құрамында үйлесімді жұмыс істеуді үйренеді.
«Бұл жиындардағы ең құнды нәрсе – практикалық тәжірибе алу мүмкіндігі. Теңізде білім бірден іс жүзінде сыналады, ал экипаждың үйлесімді әрекеті ерекше маңызға ие болады», — деді әртекті кемелер дивизионының командирі, 2-дәрежелі капитан Руслан Яхьяров.
Аягөзде тағы 250 запастағы әскери қызметші дайындалып жатыр
Әскери жиындардың тағы бір ірі кезеңі Аягөз гарнизонында өтуде. Мұнда Шығыс Қазақстан облысынан 250 әскери міндетті даярлықтан өтіп жатыр.
Олардың арасында 30 офицер және запастағы 220 сержант пен сарбаз бар.
Бұл жерде негізгі назар тактикалық даярлыққа, қару-жарақ пен әскери техниканы қолдануға аударылған. Қатысушылар бөлімше құрамында бірлесіп әрекет ету дағдыларын да жетілдіруде.
«Мен үшін бұл жиындар бұрын алған дағдыларымды еске түсіріп, жаңа тәжірибе жинауға мүмкіндік береді. Мұнда тәртіптің, жауапкершіліктің және бірлесе әрекет ете білудің қаншалықты маңызды екенін тағы бір түсінесің», — деді әскери міндетті Еркебұлан Кәкімов.
Әскери жиын кезінде жұмыс орны сақталады
Жұмыс істейтін қазақстандықтар үшін маңызды талаптардың бірі — әскери жиынға қатысқан кезеңде олардың жұмыс орны мен атқаратын лауазымы сақталады. Бұл кепілдік Қазақстанның әскери қызмет туралы заңнамасында да көзделген.
Жиынға қатысушылар әскери киіммен, тамақпен және медициналық қызметпен қамтамасыз етіледі.
Мұндай даярлық Қарулы күштерге дайын резервті сақтауға мүмкіндік береді. Ал әскери міндеттілер бұрынғы дағдыларын жаңартып, жаңа тәжірибе жинайды.
Жиындар емтихан және сынақпен аяқталады
Даярлық аяқталғаннан кейін қатысушылар емтихандар мен сынақтар тапсырады.
Әскери жиынды сәтті аяқтау белгіленген тәртіппен кезекті әскери атақ алуға мүмкіндік береді.
Қазақстанда мұндай даярлық тұрақты түрде өткізіледі. Бұған дейін біз Алматы облысында өткен запастағы әскери қызметшілердің жиыны туралы жазған едік. Онда әскери міндеттілер бір ай бойы әскери білімін жетілдіріп, қорытынды емтихандарға дайындалған.
