Некені ұзартудың қажеті жоқ.
Қазақстанда алаяқтар неке тіркеу мерзімі аяқталады деген жалған хабарламалар таратып, азаматтарды күмәнді сілтемелерге өтуге итермелеуде, деп хабарлайды DKNews.kz.
Бұл туралы Қазақстан Республикасының Әділет министрлігі ескертті. Ақпаратты ведомствоның ресми өкілі Талғат Уәли хабарлады.
Алаяқтар некеге «жарамдылық мерзімін» ойлап тапқан
Жалған ақпарат әлеуметтік желілерде таралып жатыр. Хабарламалар екінші деңгейлі банктердің қосымшаларына қатысты ескерту секілді көрсетіледі.
Азаматтарға «неке тіркеу мерзімін ұзарту қажет» деген мазмұндағы хабарламалар жіберіледі. Әділет министрлігі мұндай ақпараттың алаяқтық сипатта екенін мәлімдеді.
Қазақстанның неке-отбасы заңнамасына сәйкес, неке бір рет тіркеледі және оның қолданылу мерзімі болмайды. Сондықтан бұрын тіркелген некені мерзімді түрде растау немесе қайта ұзарту талап етілмейді.
Некені тіркеуге байланысты мемлекеттік қызметтер туралы ақпаратты ресми мемлекеттік порталдан тексеруге болады.
«Неке тіркеу мерзімін ұзарту» ұғымы нені білдіреді
Алаяқтардың қолданған тіркесі азаматтарды шатастыруы мүмкін. Қазақстан заңнамасында мемлекеттік неке тіркеу мерзімін ұзарту ұғымы кездеседі, бірақ ол неке қиылғаннан кейінгі мерзімге емес, некені тіркеуге дейінгі кезеңге қатысты.
Атап айтқанда, «Неке (ерлі-зайыптылық) және отбасы туралы» кодекстің 223-бабында белгілі бір жағдайларда неке тіркеуді күту мерзімін қысқарту немесе ұзарту мүмкіндігі қарастырылған.
Бұл бұрын тіркелген некені кейін қайта рәсімдеу немесе «жаңарту» керек дегенді білдірмейді.
Қазақстанда неке қалай тоқтатылады
Әділет министрлігінің түсіндіруінше, неке ерлі-зайыптылардың біреуінің немесе екеуінің өтініші бойынша бұзылуы мүмкін. Заңнамада көзделген басқа да жағдайлар бар.
Некені бұзу тіркеуші орган арқылы немесе сот тәртібімен жүзеге асырылады.
Егер неке тіркеуші орган арқылы бұзылса, ол ажырасуды мемлекеттік тіркеген күннен бастап тоқтатылады. Ал сот арқылы бұзылған жағдайда неке сот шешімі заңды күшіне енген күннен бастап тоқтайды.
Некені бұзуға қатысты мемлекеттік қызмет туралы ресми ақпарат та мемлекеттік органдар порталында жарияланған.
Күмәнді сілтеме жеке деректерге қауіп төндіреді
Министрлік азаматтарды «некені ұзарту» туралы хабарламалардағы сілтемелерге өтпеуге және жеке мәліметтерін үшінші тұлғаларға бермеуге шақырды.
Егер хабарламада некенің күшін сақтау үшін бөгде сайтқа өту, жеке немесе банк деректерін енгізу талап етілсе, мұндай әрекетті орындамау қажет. Ақпаратты тек ресми дереккөздерден тексерген жөн.
Бұған дейін біз төрт күн ішінде 150 мың фишингтік SMS таратылғаны туралы жазған едік: алаяқтар пайдаланушыларды жеке және банк деректерін қолға түсіру үшін жалған парақшаларға бағыттаған.
