Екі мерзімді әскери қызметші демалыспен марапатталды.
Қорғаныс министрлігі, Бас штаб және Қарулы күштер бөлімшелері арасында өткен мини-футбол чемпионаты осындай ерекше ынталандырумен аяқталды, деп хабарлайды DKNews.kz.
Жарыс Астанадағы «Сайран Арена» спорт кешенінде өтті. Биыл чемпионат алғаш рет Қорғаныс министрінің бірінші орынбасары – Бас штаб бастығының кубогы үшін ұйымдастырылды.
Кубок үшін 35 команда бақ сынады
Турнирге 35 команда құрамында 350-ден астам әскери қызметші қатысты. Командалар екі топқа бөлінді.
Бірінші топта Қорғаныс министрлігінің департаменттері, басқармалары мен орталықтары сынға түсті. Екінші топта Қарулы күштердің бас басқармалары, басқармалары және әскери бөлімдері өнер көрсетті.
Жеңімпаздар мен жүлдегерлерді Қорғаныс министрінің бірінші орынбасары – Қарулы күштер Бас штабының бастығы, генерал-лейтенант Қаныш Әбубәкіров марапаттады.
«Футбол алаңында команданың нәтижесі әр ойыншының іс-қимылына байланысты қалыптасады. Мұндай жарыстар әскери қызметшілердің дене даярлығын жетілдіруге, өзара іс-қимыл мен үйлесімділікті дамытуға, командалық рухты нығайтуға ықпал етеді. Осындай іс-шараларға қатысу дене дайындығын жоғары деңгейде ұстап қана қоймай, әскери ұжымдардың бірлігін де күшейтуге мүмкіндік береді», — деді Қаныш Әбубәкіров.
Әскери полиция өз тобында чемпион атанды
Бірінші топтың жалпыкомандалық есебінде Ұлттық әскери-патриоттық орталықтың құрамасы жеңіске жетті.
Екінші орынды Әскери-ғарыштық бағдарламалар орталығы, үшінші орынды Халықаралық ынтымақтастық департаментінің командасы иеленді.
Екінші топта Әскери полиция бас басқармасының командасы чемпион атанды.
14776 әскери бөлімінің құрамасы екінші орынға, Қазақстан Республикасының Ұлттық қорғаныс университетінің командасы үшінші орынға тұрақтады.
Алты аталым бойынша үздіктер анықталды
Бірінші топта сержант Сержан Жандыбаев «Үздік қақпашы», ал сержант Нұргелді Жәкенов «Үздік шабуылшы» атанды. Екі әскери қызметші де Ұлттық әскери-патриоттық орталықтың атынан өнер көрсетті.
Әскери-ғарыштық бағдарламалар орталығының майоры Думан Шаймерденов «Үздік ойыншы» деп танылды.
Екінші топта Әскери полиция бас басқармасынан ефрейтор Жандос Айтмағамбетұлы үздік қақпашы атанды.
14776 әскери бөлімінің кіші сержанты Қуат Хажмұханов үздік шабуылшы деп танылса, Ұлттық қорғаныс университетінің қатардағы жауынгері Мәди Мәлікұлы үздік ойыншы атағын алды.
Екі сарбазға 10 күндік демалыс берілді
Чемпионат жүлдегерлері қатардағы жауынгерлер Мәди Мәлікұлы мен Байжан Райымбек ерекше марапатқа ие болды.
Ұлттық қорғаныс университетінің коменданттық взводында мерзімді әскери қызмет өткеріп жүрген екі сарбазды Қаныш Әбубәкіров 10 күндік демалыспен ынталандырды.
Осылайша, олардың турнирдегі нәтижесі медальмен ғана шектелмей, әскери қызмет барысындағы нақты марапатқа ұласты.
Чемпионат жеңімпаздары мен жүлдегерлеріне кубоктар, медальдар және дипломдар табысталды.
