Алғашқы сауда 2027 жылға жоспарланған.
Инвесторларға қазір мемлекеттік геологиялық зерттеу аясында дайындалып жатқан перспективалы жер қойнауы учаскелері ұсынылмақ, деп хабарлайды DKNews.kz.
Бұл жоспар туралы ҚР Өнеркәсіп және құрылыс министрі Ерсайын Нағаспаевтың Ұлытау облысына жұмыс сапары кезінде айтылды. Министр Президент Қасым-Жомарт Тоқаевтың Қазақстан аумағын геологиялық тұрғыдан зерттеу деңгейін арттыру жөніндегі тапсырмаларының орындалу барысын тексерді.
100 мың шаршы шақырымнан астам аумақ қайта зерттеліп жатыр
2026 жылы Қазақстанның 11 өңіріндегі 20 учаскеде 1:50 000 масштабтағы геологиялық түсірілім жұмыстары басталды. Зерттеу қамтитын жалпы аумақ 100 мың шаршы шақырымнан асады.
Жұмыстың елеулі бөлігі Ұлытау облысына тиесілі. Мұнда жеті учаскеде 36 мың шаршы шақырым аумақта кешенді геологиялық зерттеу жүргізіліп жатыр.
Осы жұмыстардың нәтижелері кейін инвесторларға ұсынылатын жаңа перспективалы учаскелерді қалыптастыруға негіз болмақ. Мемлекет тек геологиялық дерек жинаумен шектелмей, әлеуеті жоғары аумақтарды аукционға шығаруға дейін дайындауды көздеп отыр.
Бұған дейін біз Қазақстанда жер қойнауын геологиялық зерттеуді кеңейту және саланы цифрландыру жоспарлары туралы жазған едік.
Пайдалы қазбаларды іздеуге дрондар мен аэрогеофизика тартылды
Ұлытаудағы зерттеу нысандарында министрге геологиялық барлауда қолданылып жатқан жаңа технологиялар таныстырылды.
Мамандар Жерді қашықтан зондтау деректерін, ұшқышсыз аэрогеофизикалық кешендерді және жоғары дәлдіктегі Ionic Leach геохимиялық әдісін пайдаланып жатыр.
«Kazakhmys Barlau» ЖШС озық аэрогеофизикалық зерттеулер жүргізуде. Оған аэромагниттік түсірілім, аэрогамма-спектрометрия және аэрогравиметрия кіреді.
Бұл әдістер қысқа мерзім ішінде үлкен аумақтар бойынша геофизикалық мәлімет жинауға және зерттелетін учаскелердің перспективалылығын жедел бағалауға мүмкіндік береді.
«Тау-Кен Самұрық» ҰТК» АҚ тобына кіретін «Қазгеология» АҚ да заманауи ұшқышсыз кешендерді қолданады. Олар жоғары дәлдіктегі позициялауды қамтамасыз ететін RTK-навигация жүйесімен жабдықталған.
Цифрлық технологиялар мамандарға дрондардың ұшуын және деректердің үздіксіз келуін нақты уақыт режимінде бақылауға мүмкіндік береді.
Ұлытау мен Абай облыстарында 300-ге жуық ұңғыма бұрғыланды
Зерттеу тек әуеден түсірілім жасаумен шектелмейді. Ұлытау және Абай облыстарында барлығы 300-ге жуық ұңғыма бұрғыланған.
Жұмыстар Мемлекеттік геологиялық жер қойнауын зерттеу бағдарламасы — Мемлекеттік геологиялық зерттеу аясында жүргізілуде. Бағдарламаны іске асыру үшін «Ұлттық геологиялық қызмет» АҚ басшылығымен геологиялық барлау компанияларының тобы құрылды.
Ерсайын Нағаспаевтың айтуынша, алынатын геологиялық ақпараттың сапасы жаңа жобалардың инвесторлар үшін қаншалықты тартымды болатынына тікелей әсер етеді.
«Жер қойнауын толық ауқымда геологиялық зерттеу — Мемлекет басшысы Қасым-Жомарт Кемелұлы Тоқаев министрлік пен жалпы сала алдына қойған негізгі стратегиялық міндеттердің бірі. Біздің басты міндетіміз — сапалы геологиялық ақпарат алу. Геологиялық барлауға инвестиция тарту мен өнеркәсіп салаларының дамуы осыған тікелей байланысты», — деді ҚР Өнеркәсіп және құрылыс министрі Ерсайын Нағаспаев.
Әр перспективалы учаскенің цифрлық паспорты болады
Бағдарламаның тағы бір бағыты инвесторлардың геологиялық ақпаратқа қолжетімділігін арттыруға қатысты.
Мемлекеттік геологиялық зерттеу аясында жер қойнауының бірыңғай цифрлық кадастры қалыптастырылып жатыр. Әр перспективалы учаске үшін электрондық паспорт жасау қарастырылған.
Бұл геологиялық ақпараттың ашықтығы мен қолжетімділігін арттыруға, оны өңдеу мен дайындауға кететін уақытты қысқартуға тиіс.
Бизнес үшін мұндай деректердің сапасы шешуші мәнге ие. Өйткені инвестордың геологиялық барлау жобасына қатысу-қатыспау туралы шешімі көбіне нақты учаске жөніндегі бастапқы ақпараттың толықтығына байланысты.
Алғашқы перспективалы учаскелер 2027 жылы нарыққа шығарылмақ
Бағдарламаның келесі кезеңінің нақты мерзімі де белгіленіп отыр.
Мемлекеттік геологиялық зерттеу нәтижесінде дайындалған алғашқы перспективалы аумақтарды 2027 жылдан бастап инвесторларға аукцион арқылы ұсыну жоспарланған.
Бұл мемлекеттік геологиялық зерттеуді тікелей инвестициялық циклмен байланыстырады: алдымен аумақ егжей-тегжейлі зерттеледі, кейін цифрлық деректер қоры қалыптастырылады, содан соң перспективалы учаске нарыққа ұсынылады.
Сонымен қатар мемлекет зерттеудің толық циклін қамтитын инфрақұрылымды дамытып жатыр. Геологиялық кластерге барған Ерсайын Нағаспаев кернді қабылдау және сақтау, зертханалық және геофизикалық зерттеу жұмыстарының ұйымдастырылуымен танысты.
Кластер Орталық Азиядағы ең ірі ғылыми-өндірістік және білім беру кешендерінің бірі саналады.
Жұмыс сапарының қорытындысы бойынша министр зерттеулердің сапасын қамтамасыз ету, белгіленген көлем мен мерзімдерді сақтау жөнінде бірқатар тапсырма берді. Бұл жұмыстың нәтижесі келесі практикалық кезеңге — алғашқы учаскелерді 2027 жылғы аукциондарға дайындауға тікелей әсер етеді.
Бұған дейін біз Қазақстанның неге егжей-тегжейлі геологиялық түсірілімге және жер қойнауы туралы деректерді цифрландыруға басымдық беріп отырғаны туралы жазғанбыз.
