Жүйе болжам маусымына дайындалып жатыр.
Қазақстандық мамандар Нидерланд әзірлеушілерімен бірге су тасқыны мен құрғақшылықты ерте болжауға арналған платформаны жетілдіруде. Қазір жүйе 11 өзен бассейнін қамтиды, ал жыл соңына дейін олардың санын 16-ға жеткізу жоспарланған, деп хабарлайды DKNews.kz.
Жоба бойынша техникалық сессияны Су ресурстары және ирригация вице-министрі Аслан Абдраимов ашты. Сессияны «Су ресурстарының ақпараттық-талдау орталығы» КЕАҚ басқарма төрағасы Хайрулла Қайратғали өткізді.
Жыл соңына дейін 16 бассейн қамтылады
Жобаның негізінде Нидерландтың Deltares институты әзірлеген Delft-FEWS платформасы жатыр. Қазақстан осы жүйе арқылы су тасқынын болжау және модельдеу тетіктерін қалыптастырып келеді.
Қазір платформа 11 өзеннің су жинау бассейнін қамтиды. Жыл соңына дейін бұл көрсеткішті 16 бассейнге жеткізу көзделген.
Техникалық сессия барысында Deltares бағдарламашылары мен инженерлері қазақстандық мамандармен бірге платформаның кеңейтілген мүмкіндіктерін, деректерді өңдеу тәртібін және жобаның келесі кезеңіндегі міндеттерді талқылады.
Жиынға Нидерланд Корольдігі елшілігінің және Agip Karachaganak B.V. (Eni) компаниясының өкілдері де қатысты. БҰҰ Даму бағдарламасының техникалық кеңесшісі Хьюберт Лор TALSIM-NG моделі бойынша жұмысқа онлайн қосылды.
Су нысандарын спутниктен бақылау көзделген
Deltares-пен ынтымақтастық тек платформаны техникалық баптаумен шектелмейді. Жоба аясында жұмыс процестерін реттеу және Ақпараттық-талдау орталығы мамандарын оқыту қарастырылған.
Жеке бағыттардың бірі — су нысандарын бақылау үшін спутниктік деректерді өңдеу құралдарын меңгеру.
Бұл су ресурстары туралы ақпаратты жинау мен талдауды кеңейтіп, болжам жасау кезінде пайдаланылатын деректер көлемін арттыруға мүмкіндік береді.
Құрғақшылық бойынша есептер автоматтандырылады
Жобаның тағы бір бағыты құрғақшылықты болжауға арналған.
Техникалық сессия барысында қажетті көрсеткіштер зерделеніп, есептеулерді автоматтандыру жұмысы басталған. Бұл бағыттағы жұмыс әлі жалғасып жатыр.
Мамандардың міндеті — деректерді алдын ала тексеріп, есептеу алгоритмдерін реттеу және болжам маусымы басталғанға дейін жүйенің мүмкіндіктерін толық пайдалануға дайындау.
«Біз платформаны әзірлеушілермен бірге жүйеге терең техникалық талдау жүргіздік және қазірдің өзінде болжам жасаудың ақпараттық негізін қалыптастырып жатырмыз — есептеулерді реттеп, деректерді тексеріп, бағалаудың дәлдігін арттырудамыз. Бұл жұмыс болжам маусымы басталғанға дейін жүйенің барлық мүмкіндігін пайдалану үшін алдын ала жүргізіліп жатыр», — деді Су ресурстары және ирригация вице-министрі Аслан Абдраимов.
Қазақстан бірнеше модельді қатар дамытуда
Delft-FEWS платформасымен жұмыс су тасқыны мен құрғақшылықты болжаудың бірыңғай цифрлық жүйесін қалыптастыруға бағытталған.
Жоба шеңберінде платформаның конфигурациясы жетілдіріліп, жұмыс процестері бапталады және қазақстандық мамандар оқытылады.
Негізгі практикалық нәтиже — болжам жасауға қажетті деректерді алдын ала жинау, есептеулерді автоматтандыру және су жағдайын бағалау дәлдігін арттыру.
Қазір жүйе 11 бассейнде жұмыс істеп тұр. Жыл соңына дейін тағы бес бассейн қосылса, қамтылған аумақ саны 16-ға жетеді.
