Экологиялық тәрбие іс жүзінде жалғасып жатыр. Оқу-ағарту министрі Жұлдыз Сүлейменова Астанадағы №109 «Келешек мектебінің» оқушылары және педагогтерімен бірге ағаш отырғызып, мектеп аумағын абаттандыруға қатысты. Іс-шара «Таза Қазақстан» республикалық экологиялық акциясы аясында өтті, деп хабарлайды DKNews.kz.
Мемлекет басшысы Қасым-Жомарт Тоқаев айқындаған экологиялық мәдениет пен қоршаған ортаға жауапкершілік қағидаттарын балалардың бойына сіңіру білім беру жүйесіндегі тәрбие жұмысының маңызды бағыттарының біріне айналып келеді.
Министр оқушылармен бірге сенбілікке шықты
Сенбілік №109 «Келешек мектебінің» аумағында ұйымдастырылды. Жұлдыз Сүлейменова оқушылар және мұғалімдермен бірге ағаш отырғызып, мектеп аумағын абаттандыру жұмыстарына қатысты.
Министр балалармен әңгімелесу барысында қоршаған ортаға ұқыпты қарау, тазалықты сақтау, еңбекқорлық пен жауапкершілік мәселелерін талқылады. Сондай-ақ мектеп ұжымымен кездесіп, білім беру мен тәрбие жұмысына қатысты пікір алмасты.
Оқу-ағарту министрлігінің ұстанымы бойынша, экологиялық мәдениетті тек сабақ арқылы емес, күнделікті әрекет пен практикалық жұмыс арқылы да қалыптастыру маңызды.
«Таза Қазақстан» құндылықтарын өскелең ұрпақтың бойына сіңіру – экологиялық мәдениетті қалыптастырудың маңызды негізі. Табиғатты аялау, туған жерге жанашырлық таныту және ортақ кеңістікке жауапкершілікпен қарау күнделікті әрекеттен басталады».
«Таза Қазақстан» мектептегі тәрбие жұмысына енуде
Экологиялық бағыттағы жұмыстар қазір бір реттік сенбіліктермен шектелмейді.
Мектептерде экологиялық білім беру жаратылыстану, география, биология, химия, физика және технология пәндерімен ұштастырылған. Сонымен бірге елімізде 4 мыңнан астам «Жасыл клуб» жұмыс істейді, оларға 125 мыңнан астам бала қатысады.
Экологиялық жобаларға қызығушылық та артып келеді. Республикалық ProEko экологиялық жобалар байқауына 38,7 мың оқушы қатысқан.
Үкімет деңгейінде экологиялық ағартудың бірыңғай стандартын қалыптастыру және «Жасыл мектеп» моделін кеңейту мәселесі де қарастырылып жатыр. Қазір бұл модель 85 мектепте сынақтан өтуде, кейін оны 1 мың мектепке дейін кеңейту жоспарланған.
«Келешек мектептері» практикалық алаңға айналуда
№109 мектептің «Келешек мектептері» желісіне кіруі де назар аударарлық.
Жаңа форматтағы мектептерде заманауи инфрақұрылыммен қатар тәрбие жұмысына, оқушылардың әлеуметтік жауапкершілігіне және мектеп кеңістігін тиімді пайдалануға мән беріледі.
«Таза Қазақстан» аясындағы сенбіліктер бұған дейін де «Келешек мектептерінде» ұйымдастырылды. Оқушылар мектеп аумағын және оған жақын қоғамдық кеңістіктерді тазалап, көгалдандыру жұмыстарына қатысқан.
Бұл тәсілдің негізгі мақсаты – баланың қоршаған ортаға жауапкершілігін тек теориялық түсінік ретінде емес, өзінің күнделікті тәжірибесі арқылы қалыптастыру.
Нәтиже отырғызылған ағаш санымен ғана өлшенбейді
Мектеп аумағын абаттандыру бір күнде аяқталуы мүмкін. Ал экологиялық мәдениетті қалыптастыру ұзақ мерзімді жұмысты талап етеді.
Осы себепті «Таза Қазақстанның» білім беру саласындағы бағыты балалардың тазалыққа, табиғатқа және ортақ кеңістікке деген көзқарасын өзгертуге негізделіп отыр.
«Мұндай шаралар оқушылардың еңбекке құрметін арттырып, қоршаған ортаға жауапкершілікпен қарау мәдениетін қалыптастыруға ықпал етеді».
Отырғызылған ағашты кейін күтіп-баптау, мектеп ауласын таза ұстау және ортақ кеңістікке ұқыпты қарау осы жұмыстың күнделікті жалғасына айналмақ.
