Шақыру науқаны жалғасып жатыр.
Шымкентте биыл күзде 1300-ден астам азаматты мерзімді әскери қызметке жіберу жоспарланған, деп хабарлайды DKNews.kz.
1 қыркүйектен бері 18 бен 27 жас аралығындағы азаматтар медициналық тексеруден, психологиялық тестілеуден және жеке әңгімелесуден өтуде. Бұл туралы Өңірлік коммуникациялар қызметінің ақпараттық алаңында Шымкент қаласы қорғаныс істері жөніндегі департаментінің бастығы, полковник Әбдіғабит Шегебаев мәлімдеді.
320-ға жуық шымкенттік әскерге аттанды
Күзгі науқан кезінде әскери құрылымдар кезең-кезеңімен жасақталады. Алдымен ҰҚК Шекара қызметі, ІІМ Ұлттық ұланы және Мемлекеттік күзет қызметінің бөлімшелері толықтырылады. Одан кейін Қарулы күштер мен Төтенше жағдайлар министрлігінің әскери бөлімдеріне шақырылушылар жіберіледі.
Қазірдің өзінде Шымкенттен:
- 160-қа жуық азамат Шекара қызметінің бөлімшелеріне аттанды;
- тағы 160-қа жуық жас ІІМ Ұлттық ұланының бөлімдеріне жіберілді.
Олардың барлығы шақыру комиссиясынан өтіп, әскери қызметке жарамды деп танылған.
Әбдіғабит Шегебаевтың айтуынша, әскерге шақыру науқанын жергілікті атқарушы органдар ұйымдастырып, қамтамасыз етеді. Шақыру комиссиясына Шымкент қаласы әкімінің орынбасары төрағалық етеді.
Әскерге кімнің қай бөлімге баратыны қалай анықталады
Шақырылушыларды әскери қызмет түрлері бойынша бөлу кезінде денсаулық жағдайы ғана емес, кәсіптік-психологиялық іріктеу мен дайындық деңгейі де ескеріледі.
«Әскерге шақыру науқаны бекітілген жоспарға сәйкес жүргізіледі. Азаматтар медициналық тексеру нәтижелеріне, кәсіптік-психологиялық іріктеуге, денсаулық жағдайы мен дайындық деңгейіне қарай әскери қызмет түрлеріне бөлінеді. Сонымен қатар заңнамада азаматтық және әскери жоғары оқу орындарына түсу кезінде берілетін жеңілдіктер қарастырылған. Әскери қызметті аяқтағаннан кейін жастар қосымша артықшылықтарға, оның ішінде білім беру гранттарына ие бола алады», – деді полковник Әбдіғабит Шегебаев.
Көктемгі әскерге шақыру науқаны кезінде Шымкенттен Қарулы күштерге, басқа да әскерлер мен әскери құралымдарға 1200-ге жуық азамат жіберілген.
Әскери қызметтен кейін қандай мүмкіндіктер бар
Брифингте мерзімді әскери қызметшілерге қарастырылған әлеуметтік және білім беру мүмкіндіктері де айтылды.
Олардың қатарында:
- 14 айға кредиттік демалыс беру — әскери қызмет кезіндегі 12 айға және қызмет аяқталғаннан кейінгі 2 айға несие төлемдерін кейінге қалдыру;
- ҰБТ тапсырмай жоғары оқу орындарына түсу мүмкіндігі;
- жұмысшы мамандықтары бойынша мемлекеттік үлгідегі куәлік алу;
- әскери қызметтен запасқа шығарылғаннан кейін жұмысқа орналасу мүмкіндігі;
- белгіленген талаптарға сәйкес білім беру гранттарына ие болу мүмкіндігі бар.
Полковник білім алуға байланысты міндеттемелерге қатысты заңнамадағы тағы бір норманы түсіндірді.
«Әскери қызметшілерге бірқатар әлеуметтік жеңілдіктер қарастырылған. Олардың қатарында 14 айға кредиттік демалыс беру, яғни әскери қызмет өткеру кезеңіне 12 ай және қызмет аяқталғаннан кейінгі 2 ай мерзімге несие төлемдерін кейінге қалдыру; ҰБТ тапсырмай-ақ жоғары оқу орындарына түсу мүмкіндігі; Жұмысшы мамандықтары бойынша мемлекеттік үлгідегі куәлік алу; Әскери қызметтен запасқа шығарылғаннан кейін жұмысқа орналасу мүмкіндігі бар; Сонымен қатар, Қазақстан Республикасы азаматтарының әскери қызмет міндеттерін орындауы кезіндегі кепілдіктерді көздейтін «Әскери қызмет және әскери қызметшілердің мәртебесі туралы» Қазақстан Республикасы Заңының 50-1-бабына сәйкес, мемлекеттік білім беру тапсырысы негізінде білім алуға байланысты және «Білім туралы» Қазақстан Республикасы Заңының 47-бабының 17-тармағында көзделген жұмыспен өтеу жөніндегі міндетті бюджет қаражаты есебінен жұмсалған, білім алуға байланысты шығыстарды өтемей тоқтатуға құқығы бар», – деді полковник Әбдіғабит Шегебаев.
Шақыру бойынша келмегендерге не болады
Қорғаныс істері жөніндегі департамент әскери қызмет заңмен белгіленген міндет екенін еске салды.
Шақыру бойынша дәлелді себепсіз келмеу әкімшілік жауапкершілікке әкелуі мүмкін. Медициналық куәландырудан жалтарған жағдайда да заңда жауапкершілік қарастырылған.
«Әкімшілік құқық бұзушылық туралы кодекске сәйкес, дәлелді себепсіз шақыру бойынша келмегені үшін айыппұл қарастырылған. Ал медициналық куәландырудан өтуден жалтарған жағдайда ескерту немесе айыппұл салынады. Заңды негіздер болмаған кезде әскери қызметтен жалтарғаны үшін қылмыстық жауапкершілік көзделген. Мұндай жағдайда айыппұл салу, түзеу жұмыстарына, қоғамдық жұмыстарға тарту немесе бас бостандығынан айыру жазасы қолданылуы мүмкін», – деді ол.
Шақыру қағазы SMS арқылы да келеді
Шымкенттегі күзгі әскерге шақыру науқаны 31 желтоқсанға дейін жалғасады.
Шақыру қағаздары азаматтарға тұрғылықты немесе жұмыс орны бойынша жеткізіледі. Сонымен бірге хабарлама 1414 сервисі арқылы SMS түрінде де жолданады.
Әскери қызметтен кейінге қалдыру немесе босату рәсімдерін жергілікті атқарушы органдар арқылы немесе электрондық үкімет порталы арқылы жүргізуге болады.
Кейінге қалдыру процесі қазір автоматтандырылған. Бұрын студенттер қағаз анықтама тапсыруға тиіс болса, енді олар туралы мәлімет Қорғаныс министрлігінің ақпараттық жүйесіне Оқу-ағарту министрлігі мен Ғылым және жоғары білім министрлігінің ақпараттық базаларынан тікелей беріледі.
Шетелде білім алып жүрген азаматтар электрондық үкімет порталы арқылы студент ретінде тіркеле алады.
Бұл өзгерістер әскерге шақыру рәсімінің бір бөлігін цифрлық форматқа көшіріп, азаматтардың анықтама жинауға кететін уақытын азайтуға мүмкіндік береді.
Бұған дейін біз Шымкентте күзгі әскерге шақыруға дайындық қалай жүргізілгені және көктемгі науқанның қорытындысы туралы жазған едік. Ал қыркүйекте қаладағы күзгі науқан аясында 31 желтоқсанға дейін 1300-ден астам азаматты әскерге жіберу жоспары туралы да хабарланған болатын.
